ސޯލް، ދެކުނު ކޮރެއާ (ޖޫން، 4) - އުތުރު ކޮރެއާ އިން ނިއުކްލިއާ ޓެސްޓެއް ކުރަން އުޅޭ ކަމަށް ރިޕޯޓުކޮށްފައި ވަނިކޮށް ދެކުނު ކޮރެއާ އާއި އެމެރިކާ އިން ގުޅިގެން އަސްކަރީ ތަމްރީނުތަކެއް ބާއްވައިފި އެވެ.
މިފަހަރުގެ ތަމްރީނުތައް ކުރިއަށް ގެންދިޔައީ ޖަޕާނުގެ އޮކިނާވާގެ ބޭރުން ބައިނަލްއަގްވާމީ ކަނޑުގެ ސަރަހައްދުގަ އެވެ.
މި ތަމްރީނުތަކުގައި ވަނީ ސަބްމެރިން އަށް ދޭ ހަމަލާ އާއި ކަނޑުގެ އުޅަނދުތަކާއި ވައިގެ އުޅަނދުތަކާ ގުޅޭ ތަމްރީނުތައް ފުރިހަމަކޮށްފަ އެވެ. އަދި، މިދިޔަ ހަތަރު އަހަރު ތެރޭ ފުރަތަމަ ފަހަރަށް ވަނީ އެމެރިކާގެ އެއާކްރާފްޓް ކެރިއަރެއް ވެސް އަސްކަރީ ތަމްރީނުތަކުގައި ބައިވެރިކޮށްފަ އެވެ.
މި ތަމްރީނުތައް ކުރިއަށް ގެންދިޔައީ ތިން ދުވަހުގެ މުއްދަތަށެވެ.
ދެކުނު ކޮރެއާގެ އިންޓެލިޖެންސުން ވަނީ 2017 ގެ ފަހުން ފުރަތަމަ ފަހަރަށް ނިއުކްލިއާ ޓެސްޓެއް ކުރުމަށް އުތުރު ކޮރެއާ އިން މަސައްކަތްކުރަމުންދާ ކަމަށް ރިޕޯޓުކޮށްފަ އެވެ. މިއީ އެ ގައުމުން ބިމު އަޑީގައި ކުރާނެ މިފަދަ ހަތް ވަނަ ޓެސްޓު ކަމަށް ވެސް ދެކުނު ކޮރެއާ އިން ހާމަކޮށްފައިވެ އެވެ.
އުތުރު ކޮރެއާ އިން ދީފާނެ ކޮންމެ ހަމަލާއަކަށް ރައްދުގައި ހަމަލާ ދޭނެ ކަމުގެ ގާބިލްކަން އެމެރިކާ އާއި ދެކުނު ކޮރެއާ އަށް ލިބިފައިވާކަން މި ތަމްރީނުތަކުން ހާމަކޮށްދޭނެ ކަމަށް ދެ ގައުމުން ނެރުނު ބަޔާނެއްގައި ބުނެފައިވެ އެވެ.
ދެކުނު ކޮރެއާ އާއި އެމެރިކާ އިން ކުރިއަށްގެންދާ ތަމްރީނުތަކަކީ ހަނގުރާމައަށް ތައްޔާރުވުމަށް ކުރިއަށްގެންދާ ހަރަކާތްތަކެއް ކަމަށް ބުނެ އުތުރު ކޮރެއާ އިން އަބަދުވެސް ފާޑުކިޔަ އެވެ.
