ރަޝިއާ އިން ދޭ ހަމަލާތަކުން ދިފާއުވުމުގެ ގާބިލުކަން އިތުރުކުރުމުގެ ގޮތުން ޔޫކްރެއިނަށް މެދު ރާސްތާ ރޮކެޓު ސިސްޓަމްތަކެއް ފޮނުވަން ނިންމާފައިވާ ކަމަށް އެމެރިކާއިން ހާމަކޮށްފި އެވެ.
މިފަދަ ސިސްޓަމްތަކަކީ ޔޫކްރެއިނުން ފޮނުވައިދޭން އެދިފައިވާ ހަތިޔާރެކެވެ. މި ސިސްޓަމާ އެކު ޔޫކްރެއިނަށް ވެރިވެގަންނަން މަސައްކަތްކުރާ ރަޝިއާ ސިފައިންނާ ސީދާ އަމާޒަށް ހަމަލާ ދިނުމުގެ ގާބިލުކަން ޔޫކްރެއިނަށް ލިބިގެންދާނެ އެވެ.
މީގެކުރިން އެމެރިކާ އިން ވަނީ މިފަދަ ސިސްޓަމްތައް ދޭން ދެކޮޅު ހަދާފަ އެވެ. އެއީ، އެ ސިސްޓަމްތައް ބޭނުންކޮށްގެން ޔޫކްރެއިނުން ރަޝިއާ އަށް ހަމަލާދީފާނެ ކަމުގެ ބިރު އޮތުމުންނެވެ.
ޔޫކްރެއިނަށް އިތުރު ހަތިޔާރު ފޮނުވަން އެމެރިކާ އިން ނިންމުމުން ކްރެމްލިންގެ ސްޕޯކްސްޕާސަން ވަނީ އެއީ ހަނގުރާމަ ކުރިއަށް ގެންދިޔުމަށް އެމެރިކާ އިން ހިތްވަރުދޭ ކަމަށް ވިދާޅުވެފަ އެވެ.
އެމެރިކާގެ އިތުރުން ޖަރުމަނުގެ ސަރުކާރުން ވެސް ވަނީ ޔޫކްރެއިނަށް އެއާ ޑިފެންސް ސިސްޓަމެއް ފޮނުވާނެ ކަމަށް ވައުދުވެފަ އެވެ.
އާ ސިސްޓަމްތަކަކީ ޔޫކްރެއިނަށް މަޝްވަރާގައި ބަސް ބުނުމުގެ ފުރުސަތު ހޯދުމަށް ދޭ ތަކެތި ކަމަށް އެމެރިކާ އިން ބުނެ އެވެ. އަދި، އެކަމުގެ ސަބަބުން މަޝްވަރާގެ ތެރެއިން ހައްލެއް ހޯދުމަށް މަގުފަހިވެގެންދާނެ ކަމަށް އެމެރިކާގެ ރައީސް ޖޯ ބައިޑެން ދެކެވަޑައިގަންނަވަ އެވެ.
އަލަށް ފޮނުވާ ސިސްޓަމްތަކުން 70 ކިލޯމީޓަރު ދުރަށް ހަމަލާ ދެވޭނެ އެވެ. މިއީ މިވަގުތު ޔޫކްރެއިންގެ އަސްކަރިއްޔާގައި ހުރި ސިސްޓަމްތަކަށް ވުރެ މާ ވަރުގަދަ ރޮކެޓު ސިސްޓަމްތަކެކެވެ. އަދި، ރަޝިއާ އިން ބޭނުންކުރާ އެ ރޭންޖުގެ ސިސްޓަމްތަކަށް ވުރެ މާ ބޮޑަށް ވެސް އަމާޒު ރަނގަޅުވާނެ ކަމަށް ރިޕޯޓުތައް ބުނެ އެވެ.
