އަލް ޖަޒީރާގެ ތަޖުރިބާކާރު ނޫސްވެރިޔާ ޝިރީން އަބޫ އަކްލެހް ހުޅަނގު އައްސޭރީގައި އިޒްރޭލް ސިފައިން ހިންގަމުން ދިޔަ އޮޕަރޭޝަނެއް ރިޕޯޓު ކުރަން އުޅެނިކޮށް ބަޑި ޖަހައި މަރާލި މައްސަލަ ތަހުގީގު ކޮށްދިނުމަށް އިޒްރޭލުގެ ޖަމިއްޔާތަކަކުން އދ. ގެ ސްޕެޝަލް ރެޕެޓުއާގެ އަރިހުން އެދިއްޖެ އެވެ.
އިޒްރޭލުން ވެރިވެގަނެގެން އުޅޭ ފަލަސްތީނުގެ ހުޅަނގު އައްސޭރީގެ ޖެނިން އަވަށުގައި މެއި 11، ގެ ހެނދުނު އިޒްރޭލް ސިފައިން ހިންގި އޮޕަރޭޝަނެއް ރިޕޯޓު ކުރުމަށް މަސައްކަތްކުރަމުން ދަނިކޮށް އޭނާ ގަޔަށް ބަޑި ޖަހައި މަރާލީ ގަސްތުގަ އެވެ.
އިޒްރޭލުގައި އިންސާނީ ހައްގުތަކަށް މަސައްކަތްކުރާ "ލުކިން ދަ އޮކިއުޕޭޝަން އިން ދަ އައި" އާއި "މަދާސް އަގެއިންސްޓް ވަޔޮލެންސް" އަދި އެހެނިހެން ބައެއް ޖަމިއްޔާތަކުން ވެސް ވަނީ އދ. ގެ ސްޕެޝަލް ރެޕެޓުއަރުން ކަމަށްވާ މޮރިސް ޓިޑްބޯލް އަދި ފްރެންޗެސްކާ އަލްބަނީސް އަށް ޝިރީންގެ މަރު ތަހުގީގު ކޮށްދިނުމަށް އެދި ސިޓީއެއް ފޮނުވާފަ އެވެ.
ފަލަސްތީނުގެ އިންފޮމޭޝަން މިނިސްޓްރީން ހާމަކޮށްފައިވާ ގޮތުގައި 2000 ގެ ފަހުން މިހާތަނަށް އެ ގައުމުގެ 45 ނޫސްވެރިން ވަނީ އިޒްރޭލުން މަރާލާފަ އެވެ. އެ މައްސަލަތަކުގައި އިޒްރޭލުގެ އެއްވެސް ސިފައިންގެ މީހަކަށް ފިޔަވަޅު އަޅާފައެއް ނުވެ އެވެ.
"މީގެ ކުރިން ކަންކަން ވެފައިވާ ގޮތަށް ބަލާއިރު މި މައްސަލާގައި އެއްވެސް ތަހުގީގެއް އިޒްރޭލުން ކުރިއަށްގެންދާނެ ކަމަކަށް ނުބެލެވޭ. ބައިނަލްއަގްވާމީ މުޖުތަމައުގައި އިޒްރޭލު ޖަވާބުދާރީ ކުރެވޭނެ އެއްވެސް ގޮތެއް ނެތް،" އެ ސިޓީގައި ބުނެފައިވެ އެވެ.
އިޒްރޭލުން ހިފާފައިވާ ފަލަސްތީނުގެ ބިންތައް ކަނޑައަޅާފައިވާ ސްޕެޝަލް ރެޕެޓުއާ އަލްބަނީސް ވަނީ މި ސިޓީއަށް މަރުހަބާ ކިޔާ ކަމަށް ވިދާޅުވެފަ އެވެ. އަދި، އެންމެ ރަނގަޅަށް ކުރިއަށް ދެވެން އޮތް މަގެއް ހޯދަމުންދާ ކަމަށް ވެސް ވިދާޅުވި އެވެ.
ޝިރީންގެ މަރުގެ މައްސަލައިގައި ޖިނާއީ އެއްވެސް ތަހުގީގެއް ނުހިންގާނެ ކަމަށް އިޒްރޭލުގެ އަސްކަރިއްޔާއިން މީގެކުރިން ހާމަކޮށްފައިވެ އެވެ.
