ހިލޭ ސާބަހަށް މަސައްކަތް ޖަމިއްޔާތަކުން އިޖުތިމާއީ ކަންކަމަށް ބޭނުންވާ ފަންޑު ހޯދަން "ކައިންޑްލީ ބައި ބީއެމްއެލް"ގެ ނަމުގައި ރާއްޖޭގެ ފުރަތަމަ "ކްރައުޑްފަންޑިން" ޕްލެޓްފޯމް މިއަދު ތައާރަފުކޮށްފި އެވެ.
ހަމައެކަނި ރާއްޖޭގައި ރަޖިސްޓްރީކޮށްފައިވާ އަދި ރަޖިސްޓްރީކުރިތާ ދެ އަހަރު ވެފައިވާ އެންޖީއޯތަކަށް ބޭނުންކުރެވޭ ގޮތަށް ބީއެމްއެލް އިން ތައާރަފުކުރި މި ޕްލެޓްފޯމުގެ މައިގަނޑު ބޭނުމަކީ ރައްކާތެރި ގޮތެއްގައި މީހުންގެ އަތުން އެހީ ހޯދާނެ މަގުފަހިކޮށްދިނުމެވެ.
އެގޮތުން "ކައިންޑްލީ" ޕްލެޓްފޯމް ބޭނުންކޮށްގެން އެންޖީއޯތަކުން ފައިސާ ބޭނުންވާ ކަންކަމުގެ ކެމްޕެއިން ހިންގޭނެ ކަމަށް ބީއެމްއެލް އިން ބުންޏެވެ. މި ޕްލެޓްފޯމު ފަރުމާކޮށްފައިވަނީ އެއްފަހަރާ ގިނަ ކެމްޕެއިންތަކެއް ހިންގާ، ފަސޭހައިން ރިޕޯޓުތައް ނެގޭ ގޮތަށެެވެ.
މިގޮތުން އެހީ ހޯދާ ސަބަބާއި އަދަދު ބަޔާންކޮށް، ހިންގާ ކެމްޕެއިންތަކުން ލިބޭ ފައިސާ ސީދާ އެންޖީއޯގެ އެކައުންޓުން ނެގޭނެ އެވެ. އަދި ސޯޝަލް މީޑިއާގައި ކެމްޕެއިން ޝެއާކޮށް، ބޭނުންވާ އަދަދަށް ވާސިލުވެވެންދެން ކެމްޕެއިން ހިންގޭނެ އެވެ.
މިއީ އެންޖީއޯތަކުގެ އިތުރުން އެހީ ދޭން ބޭނުންވާ ބީއެމްއެލްގެ ކަސްޓަމަރުންނަށް ވެސް ރައްކާތެރި ޕްލެޓްފޯމެކެވެ. ބީއެމްއެލްގެ ޑެބިޓް ކާޑެއް އޮންނަ ކޮންމެ މީހަކަށް ފައިސާގެ އެހީ ދެވޭނެ އެވެ. އަދި އިތުރު މީހުންގެ އެހީ ހޯދަން ރިވިއު ލިޔެ، އާއިލާ އާއި ރައްޓެހިން މިކަމުގައި ބައިވެރިކުރެވޭނެ އެވެ.
"އެންމެންނަށް ވެސް ވަރަށް ގިނަ ގޮތްގޮތުން އެހީތެރިކަން ފޯރުކޮށްދެވޭނެ. އަދި ދިވެހިންގެ ދިރިއުޅުމަށް ހެޔޮ ބަދަލެއް ގެނައުމަށް އަޅުގަނޑުމެންގެ މި މުހިންމު ޕްލެޓްފޯމުގެ ޒަރިއްޔާއިން މަގުފަހިވާނެ ކަމަށް އުއްމީދުކުރަން" ބީއެމްއެލްގެ ސީއީއޯ އަދި މެނޭޖިން ޑިރެކްޓަރު ޓިމް ސޯޔާ ވިދާޅުވި އެވެ.
"ކައިންޑްލީ" ޕްލެޓްފޯމަކީ ބީއެމްއެލް އަށް 40 އަހަރު ފުރޭތީ، މަހަކު އެއްފަހަރު ތައާރަފުކުރަމުން އަންނަ އިޖުތިމާއި ގޮތުން ފައިދާ ހުރި ކަންކަމުގެ ތެރޭގައި ހިމެނޭ ކަމެކެވެ. ކުރިން އެ ބޭންކުން ތައާރަފުކުރި ކަންކަމުގެ ތެރޭގައި ހިމެނެނީ؛
- ސްމޯލް ގްރާންޓްސް ސްކީމް - އިޖުތިމާއީ ޕްރޮޖެކްޓުތަކަށް ފަންޑިން ދޭން
- ސްކޮލާޝިޕް ފަންޑު - ބޭންކިން ދާއިރާއިން މަތީތައުލީމު ހާސިލުކުރަން ފުލް ސްކޮލާޝިޕް
- ސްޓާޓްއަޕް ގްރާންޓު - ފަށާ ވިޔަފާރިތަކަށާއި ވިޔަފާރި ފުޅާކުރަން ފަންޑިން ދޭން
- ހައުސިން ގްރާންޓް - ހާލުގައި އުޅޭ އާއިލާތަކަށް ގެދޮރު އަޅަން އެހީ ދޭން
- ގައުމީ ކުތުބުހާނާ ޒަމާނީ ފެންވަރަށް އަޕްގްރޭޑު ކުރުމުގެ މަސައްކަތް
ބީއެމްއެލް އިން ވަނީ އަހަރީ ދުވަހާ ހަމައަށް އަލަށްް ފަށާ ކަންކަން އިއުލާނުކުރަމުން ގެންދާނެ ކަމަށް ބުނެފަ އެވެ.
