ސުލްހަވެރި ސިޔާސީ ހަރަކާތްތަކަކީ ގައުމީ ސަލާމަތަށް ހުރި ނުރައްކަލެއް ކަމަށް ކަނޑަނޭޅޭ ގޮތަށް ގާނޫނެއް ހަދަން ރައްޔިތުންގެ މަޖިލީހުގެ މަޑުއްވަރީ ދާއިރާގެ ޕީއެންސީ މެމްބަރު އާދަމް ޝަރީފު މަޖިލީހަށް ބިލެއް ހުށަހަޅުއްވައިފި އެވެ.
މިދިޔަ އާދީއްތަ ދުވަހު އާދަމް ޝަރީފު ހުށަހެޅުއްވި ބިލުގައިވާ ގޮތުން، ގައުމީ ސަލާމަތަށް ނުރައްކާ ވެއްޖެ ކަމަށް ކަނޑައެޅޭނީ، ގައުމީ ސަލާމަތަށް ހުރި ނުރައްކާ ތަކެއްގެ ގޮތުގައި އެ ބިލުގައި ބަޔާންކޮށްފައިވާ ކަންތައްތަކުގެ ތެރެއިން ކަމެއް ނުވަތަ ކަންތައްތަކެއް ހިނގުމުންނެވެ. "ދިވެހިރާއްޖޭގެ ގައުމީ ސަލާމަތުގެ ބިލު"ގެ ނަމުގައި ހުށަހެޅުއްވި އެ ބިލުގެ ފުރަތަމަ ކިއުން އިއްވީ މަޖިލީހުގައި މިހާރު ކުރިއަށްދާ ޖަލްސާގަ އެވެ.
ސުލްހަވެރި އިހުތިޖާޖްތަކާއި ހަރަކާތްތަކަކީ ގައުމީ ސަލާމަތަށް ހުރި ނުރައްކަލެއް ކަމަށް ކަނޑަނޭޅޭ ގޮތަށް އެ ބިލުގައި ހިމަނާފައި އޮތީ އިސްތިސްނާ އެކެވެ. ބިލުގައި އެ އިސްތިސްނާ އޮތީ ނުރައްކަލެއް ކަމަށް ކަނޑައެޅޭ ކަންތައްތަކުގެ ލިސްޓަކަށް ފަހު ގަ އެވެ.
ގައުމީ ސަލާމަތަށް ނުރައްކާވުން ކަމަށް ބަލާ ބައެއް ކަންތައްތައް
ގައުމީ ސަލާމަތަށް ނުރައްކާވުން ކަމަށް ބަލާނެ ގިނަ ކަންތައްތަކެއް އާދަމް ޝަރީފު ހުށަހެޅުއްވި ބިލުގައި ހިމަނުއްވާފައި ވެ އެވެ. އޭގެ ތެރެއިން ބައެއް ކަންތައްތަކަކީ ގައުމީ ސަލާމަތަށް ނުރައްކާވުން ކަމަށް މިހާރުވެސް ބަލާ ކަންތައްތަކެކެވެ.
- މިނިވަންކަމާއި ސިޔާދަތާއި އިސްތިގުލާލާއި ގާނޫނު އަސާސީއާއި ރައްޔިތުންގެ ހައްގުތަކާއި އަދުލު އިންސާފަށް އުނިކަން ލިބޭ ކަމެއް ކުރުން
- ރާއްޖޭގެ ތިމާވެށްޓައި ސިޔާސީ މަސްލަހަތުތަކަށް އުނިކަން ލިބޭ ކަމެއް ކުރުން
- ދަތުރުފަތުރާއި މުވާސަލާތީ ހިދުމަތަށް އުނިކަން ލިބޭ ކަމެއް ކުރުން
- ރައްޔިތުންގެ ފުރާނައަށް ގެއްލުންވާ ކަމެއް، މުދަލަށް ބޮޑު ގެއްލުމެއް ލިބިދާނެ ކަމެއް، ބަލިމަޑުކަމެއް ނުވަތަ ކާރިސާއެއް ކުރިމަތިވުން
- ޓެރަރިސްޓް ހަމަލާއެއް ދިނުން، އެފަދަ ހަމަލާއެއް ރޭވުން، ސައިބަ ސެކިއުރިޓީގެ ދާއިރާއިން ގައުމީ ސަލާމަތަށް ނުރައްކާވާ ފަދަ ކަމެއް ކުރުން
- ބޭރުގެ ހަނގުރާމަވެރި އުޅަނދެއް، ސަރުކާރުގެ ހުއްދަ ނެތި ރާއްޖޭގެ ސަރަހައްދަށް ވަނުން
- ގާނޫނީ ސަރުކާރު ވައްޓައިލަން އުޅުމާއި ބަޣާވާތްކުރުން ނުވަތަ ބަޣާވާތްކުރަން ރޭވުން
މި ކަންތައްތަކާއި މީގެ އިތުރުން ވެސް އެތައް ކަންތައްތަކެއް ހިމެނުމަށް ފަހު އިސްތިސްނާގެ ގޮތުގައި ބިލުގައި ހިމަނުއްވާފައި އޮތީ ދެކަމެކެވެ. އެއީ ރައްޔިތުންގެ އަސާސީ ހައްގުތަކުގެ ދަށުން ހިންގާ ސުލްހަވެރި ހަރަކާތްތަކާއި މައުލޫމާތު ހޯދުމެވެ.
"...ރައްޔިތުންނަށް ލިބިދޭ އަސާސީ ހައްގުތަކުގެ ދަށުން، އެކި ކަންކަމަށް އިހުތިޖާޖްކުރުމަށް، ގާނޫނުތަކާ ހިލާފު ނުވެ ހިންގާ ސުލްހަވެރި ހަރަކާތްތައް، ގައުމީ ސަލާމަތަށް ނުރައްކާވުމުގެ ތެރެއިން އިސްތިސްނާވާނެ އެވެ. ގައުމީ ސަލާމަތަށް އުނިކަމެއް ނުވަތަ ނުރައްކަލެއް ކުރިމަތިވެދާނެ ކަމަކާ ބެހޭ ގޮތުން މީޑިއާއިން މައުލޫމާތު ހޯދުމަކީ ޖާސޫސްކުރުން ކަމުގައެއް ނުބެލެވޭނެ އެވެ،" ބިލުގައި އާދަމް ޝަރީފު ލިއުއްވާފައި ވެ އެވެ.
ގައުމީ ސަލާމަތަށް ނުރައްކާ ވެއްޖެ ކަމަށް ކަނޑައެޅުމާއި އެކަމާ ބެހޭ ގަރާރުތައް ނެރުއްވުން ފަދަ ކަންކަމުގައި ރައީސުލް ޖުމްހޫރިއްޔާއަށް ލަފާދޭން ކައުންސިލަކާއި ކޮމިޓީއެއް އުފައްދަން ވެސް އެ ބިލުގައި އެބަ އޮތެވެ.
އާދަމް ޝަރީދު މިއަދު "އަދަދު"އަށް ވިދާޅުވީ އެ ބިލަކީ އޭނާ ޑިފެންސް މިނިސްޓަރަކަށް ހުންނެވި އިރު ކުރައްވާފައިވާ މަސައްކަތެއް ކަމަށާއި ބިލު ހުށަހަޅުއްވީ އިދިކޮޅުގައި މަސައްކަތް ކުރައްވައިގެން ލިބިވަޑައިގެންނެވި އިތުުުރު ތަޖުރިބާއާ އެކީގައި ކަމަށެވެ.
"[ބިލު އެކުލަވައިލުމަށް ޓަކައި] އޭޝިއާގެ ގައުމުތަކާއި އިސްލާމީ ބައެއް ގައުމުތަކުގެ ނެޝަނަލް ސެކިއުރިޓީ ގާނޫނު ދިރާސާކުރިން،" އޭނާ ވިދާޅުވި އެވެ.
އާދަމް ޝަރީފު މި ބިލު ހުށަހެޅުއްވި އިރު، އޭނާ ހިމެނިވަޑައިގަންނަވާ އިދިކޮޅު ޕީޕީއެމް/ޕީއެންސީން "އިންޑިއާ އައުޓް"ގެ ނަމުގައި ހިންގާ ހަރަކާތުގެ ސަބަބުން ގައުމީ ސަލާމަތަށް ނުރައްކާވާ ކަމަށް ސަރުކާރުން އަންނަނީ ތަކުރާރުކޮށް ބުނަމުންނެވެ. އެ ހަރަކާތް ހުއްޓުވަން ރައީސް އިބްރާހީމް މުހައްމަދު ސޯލިހު ވަނީ ރިޔާސީ ގަރާރެއް ވެސް ނެރުއްވައިފަ އެވެ.
