ލޯކަލް ކައުންސިލްތަކުން ތައްޔާރު ކުރާ ތަރައްގީގެ ޕްލޭނާއި ބިން ބޭނުން ކުރާނެ ގޮތުގެ ޕްލޭން ނުވަތަ ލޭންޑް ޔޫސް ޕްލޭން ފާސްނުކޮށް ގައުމީ އިދާރާގައި ދިގު މުއްދަތަކަށް ހިފަހައްޓާފައި އޮތުމަކީ މިހާރު ގިނަ ކައުންސިލްތަކުގެ ކަންބޮޑުވުމެކެވެ.
މިކަންބޮޑުވުމަށް ހައްލު ގެނައުމުގެ ގޮތުން ކައުންސިލްތަކުން ގައުމީ އިދާރާއަށް ހުށަހެޅޭ އެ ޕްލޭންތައް ގިނަވެގެން 60 ދުވަހުގެ ތެރޭގައި ގައުމީ އިދާރާއިން ފާސްކުރަން ލާޒިމުކުރާ ގޮތަށް، ލާމަރުކަޒީ ގާނޫނަށް އިސްލާހު ގެނައުމަށް މޯލްޑިވްސް ނެޝަނަލް ޕާޓީ (އެމްއެންޕީ)އިން ވަނީ މަޖިލީހަށް ހުށަހަޅާފަ އެވެ.
މަޖިލީހުގެ އިއްޔެގެ ޖަލްސާގައި މި ބިލުގެ ބަހުސް ކުރިއަށް ގެންގޮސްފައިވާއިރު، ބިލާ އެއްކޮޅަށް ވާހަކަ ދައްކާފައިވަނީ އިދިކޮޅު ޕީޕިއެމް/ޕީއެންސީގެ މެންބަރުންގެ އިތުރުން، އެމްއެންޕީގެ މެންބަރުންނެވެ.
ލާމަރުކަޒީ ގާނޫނުގައި ލޭންޑް ޔޫސް ޕްލޭން ހެދުން އުނި ކުރުމަށް އަދި އެ މާއްދާގައި ބަޔާން ކުރާ ޝަރުތުތައް މަދު ކުރުމަށް ވަކާލާތު ކުރުމަކީ އެންމެ ރަނގަޅު ގޮތް ނޫން ކަމަށް ސަރުކާރު ހިންގާ އެމްޑީޕީގެ ގިނަ މެންބަރުން ވަނީ ވިދާޅުވެފަ އެވެ.
އެމްޑީޕީން ބަހުސް ކުރި ހުރިހާ މެންބަރުން ވެސް މައިގަނޑު ގޮތެއްގައި ފާހަގަކުރެއްވި ކަމަކީ އެމްއެންޕީން ހުށަހަޅާފައިވާ އިސްލާހުގެ ސަބަބުން މައްސަލައަށް އެއްވެސް ހައްލެއް ނުލިބޭ ކަމެވެ.
އެމްޑީޕީ މެންބަރުން ވަނީ ލޭންޑް ޔޫސް ޕްލޭންތައް ފާސްނުވެ، ލަސްވަނީ ކައުންސިލްތަކުގައި ފަންނީ ގޮތުންނާއި މާލީ ގޮތުން ހުރި ދަތިތަކެއްގެ ސަބަބުން ކަމަށް ފާހަގަކުރައްވާފަ އެވެ. އަދި އެކަން ހައްލު ކުރުމުގެ ގޮތުން ސަރުކާރުން މަސައްކަތް ފަށައި، ކައުންސިލްތަކަށް އެހީ ފޯރުކޮށްދޭން ނިންމާފައިވާ ކަމަށް ވެސް މެންބަރުން ވިދާޅުވި އެވެ.
މަޖިލީހުގެ ހާޒިރީ
- ހާޒިރުވެވަޑައިގެންނެވީ: 26 މެމްބަރުން
- ސަލާމުގައި: 7 މެމްބަރުން
އިއްޔެގެ ޖަލްސާގައި ވަނީ ސަރުކާރުގެ ފަރާތުން ދެ ބިލެއް މަޖިލީހަށް ހުށަހަޅައިފަ އެވެ. ފުރަތަމަ ކިޔުން އިއްވި ބިލުތަކަކީ:
- ކަނޑިތީމު ދާއިރާގެ މެންބަރު އަބްދުﷲ ޝަހީމް އަބްދުލްހަކީމް ހުށަހަޅުއްވި ދިވެހި ފަނޑިޔާރުންގެ ގާނޫނަށް އިސްލާހު ގެނައުމުގެ ބިލު
- ފޭދޫ ދާއިރާގެ މެންބަރު މުހައްމަދު ނިހާދު ހުށަހެޅުއްވި ދިވެހިރާއްޖޭގެ ކޯޓުތަކުގެ ގާނޫނަށް އިސްލާހު ގެނައުމުގެ ބިލު
ދުވަހުގެ ފޮޓޯ
މިއަދުގެ ޖަލްސާގެ ތެރެއިން ލާމަރުކަޒީ ގާނޫނަށް އިސްލާހު ހުށަހެޅުއްވި ދަނގެތީ ދާއިރާގެ މެންބަރު މުހައްމަދު ނާޒިމް--
ދުވަހުގެ ކޯޓޭޝަން
"ލޭންޑް ޔޫސް ޕްލޭން ފުރިހަމަ ކުރުމަށް ޓަކައި ގާނޫނުގައި ހުރި ޝަރުތުތަކަށް، ކޮންމެ ޝަރުތަކަށް ވެސް ޕްލޭނިން މިނިސްޓްރީން ވަނީ ލުއި ހައްލެއް ގެނެސްދީފައި. އިރާދަކުރެއްވިއްޔާ ކުރިއަށް އޮތް ތަނުގައި ލޭންޑް ޔޫސް ޕްލޭންތައް ފާސްނުވެގެން ތާށި ވެފަ، އަދި އެކަމަށް ބޭނުންވާ ޓެކްނޮލޮޖީއާއި ފައިސާ ހައްލުވެގެން ދާނެ،" އަލި ނިޔާޒް
