ބ. ކެންދޫ ފަޅު ތެރޭގައި އަޅާފައި އޮތް ތިން ދޯންޏަކާއި ލޯންޗެއް ރޯކޮށްލި މައްސަލާގައި ހައްޔަރު ކުރި އެ ރަށު މޯނިންހައުސް، އަބްދުއްސަލާމް ޔޫސުފް ދެ އަހަރާއި ނުވަ މަސް ދުވަހަށް ޖަލަށް ލާން ކްރިމިނަލް ކޯޓުން މިއަދު ހުކުމް ކޮށްފި އެވެ.
މި ހާދިސާ ހިނގީ އޭޕްރީލް 24، 2015 ގަ އެވެ. އެ ދުވަހުގެ ރޭ ކެންދޫ ފަޅު ތެރޭގައި އޮތް "މަހޯރާ" ނަމަކަށް ކިޔާ ދޯނީގައި ރޯވި އަލިފާންގަނޑު ފެތުރި އެ ފަޅުތެރޭގައި އޮތް "ސަރަކަ-2" ދޯންޏާއި"އަރަމަ-2" ދޯންޏާއި "ފެހިވިނަ" ނަމަކަށް ކިޔާ ލޯންޗެއް ރޯވި އެވެ.
މި މައްސަލާގައި އަބްދުލްސަލާމް ޔޫސުފް އޭރު ހައްޔަރުކޮށް އޭނާގެ މައްޗަށް ދައުވާ އުފުލާފައިވަނީ އޭރުގެ ޓެރަރިޒަމް މަނާ ކުރުމުގެ ގާނޫނުގެ ދަށުން ޓެރަރިޒަމް އަމަލެއް ކުރަން އުޅުމުގެ ކުށުގެ ދައުވާއަށެވެ. އޭރުގެ ގާނޫނު އޮތް ގޮތުން އޭނާގެ މައްޗަށް 10 އަހަރާއި 15 އަހަރާ ދެމެދުގެ ޖަލު ހުކުމެއް އަންނާނެ އެވެ.
ނަމަވެސް، މިހާރު އޭނާ ކުރި ކުށް ފެތެނީ ގާނޫނޫލް އުގޫބާތުގައި ހިމެނޭ ކުށަކަށް ކަން ދައުލަތުން ވެސް ބުނެފައިވާއިރު ގާނޫނުލް އުގޫބާތުގައި އެ ކުށް ދަރަޖަކޮށް ކަނޑައަޅާފައިވާ އަދަބަކީ ދެ އަހަރާއި ނުވަ މަހާއި 18 ދުވަހަށް ޖަލަށް ލުމެވެ.
މައްސަލަ ބެއްލެވި ގާޒީ ހަސަން ސައީދު އިއްވެވި ހުކުމުގައި ވަނީ ދައުވާއަށް އަބްދުއްސަލާމް ޔޫސުފް އިންކާރު ކުރި ނަމަވެސް ދައުލަތުން ހުށަހެޅި ސިއްރު ހެކިންނާއި އިތުރު ހެކިތައް ވަޒަން ކުރުމުން އޭނާގެ މައްޗަށް އެ ކުށް ސާބިތުވާ ކަމަށެވެ.
ދައުވާ ކުރިއިރު ގާނޫނުގައި އޮތް އަދަބަށް ރިއާޔަތްކޮށް ދައުވާ ހުށަހެޅި ނަމަވެސް ޝަރީއަތް ނިމޭއިރު ގާނޫނުގައި ކަނޑައެޅިފައިވާ އަދަބު ބަދަލުވެފައިވާނަމަ އިއްވަން ވާނީ އެއިން ކުޑަ އަދަބެއް ކަން ގާނޫނު އަސާސީގައި ބަޔާން ކޮށްފައިވާ ކަން ގާޒީ ފާހަގަ ކުރެއްވި އެވެ.
އެހެންވެ އަބްދުއްސަލާމް ޔޫސުފް ދެ އަހަރާއި ނުވަ މަހާއި 18 ދުވަހަށް ޖަލަށް ލާން ހުކުމް ކުރެއްވި އެވެ. އަދި، އޭނާ މި މައްސަލާގައި މިހާތަނަށް ޖަލުގައި ހޭދަކުރި މުއްދަތު އުނިކުރުމުން ޖަލު ހުކުމުން ތަންފީޒު ކުރަން ޖެހެނީ ދެ އަހަރާއި އަށް މަހާއި 10 ދުވަސް ކަމަށް ވެސް ގާޒީ ވިދާޅުވި އެވެ.
