ހައިކޯޓުގެ ފަނޑިޔާރު އަބްދުއްރައޫފް އިބްރާހިމް މިއަދު އިސްތިއުފާ ދެއްވައިފި އެވެ. އޭނާ އިސްތިއުފާ ދެއްވީ ސުލޫކީ މައްސަލައެއް ސާބިތުވެ, މަގާމުން ވަކިކުރުމަށް ރައްޔިތުންގެ މަޖިލީހަށް ފޮނުވާފައިވަނިކޮށެވެ.
ފަނޑިޔާރު ކަމުގެ މަގާމުން ރައޫފް އިސްތިއުފާ ދެއްވިކަން ޖުޑީޝަލް ސާވިސް ކޮމިޝަނުން މި ނޫހަށް ވަނީ ޔަގީންކޮށްދީފަ އެވެ.
ރައޫފްގެ މައްޗަށް ސުލޫކީ މައްސަލަ ސާބިތުވުމުން, އޭނާ ވަކިކުރުމަށް މަޖިލީހަށް ފޮނުވި ނަމަވެސް, އެ މައްސަލާގައި މިހާތަނަށް އޮތީ ގޮތެއް ނުނިމި އެވެ. މައްސަލަ ޖުޑީޝަލް ސާވިސް ކޮމިޝަނުން ކުރިއަށް ގެންގޮސްފައިވަނީ އިޖުރާއަތާ ހިލާފަށް ކަމަށް ބުނެ މަޖިލީހުގެ ޖުޑިޝަރީ ކޮމިޓީން މައްސަލަ އަނބުރާ ކޮމިޝަނަށް ފޮނުވި އެވެ.
އެކަމަކު, މައްސަލާގައި ކުރިއަށް ގެންދިޔަ އިޖުރާއަތްތައް ޖުޑީޝަލް ސާވިސް ކޮމިޝަނުން ދިފާއުކުރެ އެވެ.
މި މައްސަލާގައި ހައިކޯޓުގެ ފަނޑިޔާރު އަބްދުالله ހަމީދު ވެސް ހިމެނެ އެވެ. އޭނާ ވަކިކުރުމަށް ވެސް ނިންމާފައިވާއިރު, މިހާތަނަށް އޭނާ ހުންނެވީ މަގާމުގަ އެވެ. ދެ ފަނޑިޔާރުން ވަކިކުރަން ޖޭއެސްސީން ފޮނުވީ ފަނޑިޔާރުންތަކަކަށް ފްލެޓްތަކެއް ދިން މައްސަލައެއްގަ އެވެ. ޖޭއެސްސީން ކުރިން ބުނެފައިވާ ގޮތުން، އެ ދެ ފަނޑިޔާރުންނަށް ހައުސިން ހަމަޖެއްސީ ދައުލަތުން ބަލާ އާންމު އުސޫލުން ބޭރުންނެވެ. އެހެންވެ ފްލެޓްތަކާ އެ ފަނޑިޔާރުން ހަވާލުވީ ގާނޫނީ އަސާސީއާ ހިލާފަށް ކަމަށް ނިންމި އެވެ.
މި މައްސަލަ ޖޭއެސްސީއަށް ހުށަހެޅިއިރު މައްސަލާގެ ތެރޭ ހައިކޯޓުގެ ކުރީގެ ފަނޑިޔާރު އަލީ ސަމީރު ވެސް ހިމެނެ އެވެ. ނަމަވެސް, ސުލޫކީ މައްސަލަ ކުރިއަށް ދަނިކޮށް އަލީ ސަމީރު ވަނީ އިސްތިއުފާ ދެއްވާފަ އެވެ. އޭނާ މިހާރު ހުންނެވީ ޑެޕިއުޓީ ޕްރޮސިކިއުޓާ ޖެނަރަލްގެ މަގާމުގަ އެވެ.
