ފްރާންސްގެ ޕެރިހުގައި ހުންނަ އެންމެ މަޝްހޫރު ދާރުލްއާސާރު ކަމަށްވާ "ލޫވާ"ގައި ދައްކަން ބަހައްޓާފައި ހުރި އިޓަލީގެ ކުރެހުންތެރިޔާ ލިއޮނާޑޯ ޑާވިންޗީގެ "މޮނާލީޒާ" ކުރެހުމަށް ވިގެއް އަޅައިގެން ހުރި މީހަކު ކޭކެއް އެއްލައިފި އެވެ.
އޭނާ ކޭކު އެއްލި ނަމަވެސް ދުނިޔޭގެ އެންމެ މަޝްހޫރު ކުރެހުމަށް އެއްވެސް ގެއްލުމެއް ލިބިފައެއް ނުވެ އެވެ. އެވަގުތު ޑިސްޕްލޭގައި ކުރެހުން ހުރީ ވަޒަން ނާރާ ބިއްލޫރީގެ ފަހަތުގަ އެވެ.
ކޭކު ބިއްލޫރިގަނޑުގައި ޖެހުމުގެ ސަބަބުން ކޮންމެވެސް ވަރަކަށް އައިސިން ހޭކިފައި ހުއްޓެވެ. މިއީ އަޖައިބުކުރަނިވި މަންޒަރެއްގެ ގޮތުގައި އެތަނުގައި އެވަގުތު ތިބި މީހުން ވަނީ ސިފަކޮށްފަ އެވެ.
މޭކަޕް ކޮށްގެން ހުރި މީހާ ކޭކު އެއްލި ވަގުތު ދިޔައީ ދުނިޔެއާ މެދު ވިސްނުމަށް އެތަނުގައި ތިބި މީހުންގެ ކައިރީގައި ބުނަމުންނެވެ. އެވަގުތު އޭނާ އިނީ ވެސް ފުރޮޅުލީ ގޮނޑިއެއްގަ އެވެ.
އެ މީހާ ހައްޔަރުކޮށްގެން ގެންދިޔަ ގަޑީގައި ވަނީ ކުރެހުންތެރިން ވެސް ދުނިޔެއާ މެދު ވިސްނާ ފިކުރި ކުރި ކަމަށާއި އޭނާ ވެސް އެކަން ކުރީ އެހެންވެ ކަމަށެވެ.
އުމުރުން 36 އަހަރުގެ އެ ފިރިހެން މީހާ ހައްޔަރުކުރުމަށްފަހު މިހާރު ވަނީ ސައިކޭޓްރިކް ޔުނިޓަކަށް ބަދަލުކޮށްފަ އެވެ. ފްރާންސްގެ ފުލުހުން އަންނަނީ އެ މައްސަލަ ތަހުގީގު ކުރަމުންނެވެ.
"ލޫވާ"ގައި 1950 އިން ފެށިގެން "މޮނާލީޒާ" ދައްކަން ބަހައްޓާފައި ހުންނަނީ ބިއްލޫރިގެ ފަހަތުގަ އެވެ. އެއީ، އެ އަހަރު އެ ކުރެެހުން ހަލާކުކޮށްލުމަށްޓަކައި ދެވުނު އެސިޑް ހަމަލާއަކަށް ފަހު އެވެ.
