އަންހެނުންގެ ކޮމިޓީތަކަށް ހޮވޭ މީހުން އިސްތިއުފާދިނުން ކަންބޮޑުވާ ހިސާބަކަށް ގޮސް، އެ ކޮމިޓީތަކުގެ ބޭނުމާ މެދު ސުވާލު އުފެދިފައި އޮއްވައި، އިއްޔެ އުކުޅަހު ކޮންފަރެންސްގައި އެ މެންބަރުން ހާމަކުރީ ފުންޏަކަށް ފުދޭވަރުގެ ޝަކުވާ ތަކެކެވެ - ކައުންސިލަށް ބަލަދު އަރާ ގޮތަށް ކޮމިޓީތައް އޮންނައިރު، ބައެއް ކައުންސިލުތަކުން އ.ތ.މ ކޮމިޓީ މުޅިން ބާކީކޮށް، އެއީ ތިބޭ ބައެއްކަން ވެސް ނުބަލާ މައްސަލަ އެވެ. އިދާރީ މަސައްކަތްކުރަން ޖާގައެއް ނެތް ތަނުގައި އެ ކޮމިޓީއަށް ހާއްސަ ގޮނޑިއެއް، މޭޒެއް ވެސް ކައުންސިލު އިދާރާގައި ނުހުންނަ ކަމުގެ ޝަކުވާ އެވެ. ޕާޓްޓައިމް ބައެއްގެ ގޮތުގައި ތިބެންޖެހުމާއި މުސާރައިގެ ދަތިކަމެވެ.
"އިސްތިއުފާ ދެނީ ވަރަށް ގިނަ ކަންބޮޑުވުންތަކެއް ހުރީމައި. އަންހެނުންގެ ކޮމިޓީއަށް ކައުންސިލް ބަޖެޓުން ފަސް ޕަސެންޓް ލިބޭއިރު, މުސާރަ އާއި އެލެވެންސް ދީފައި ބާކީ އެއްޗެއް ނޯވޭ. ކައުންސިލުތަކުގައި އަންހެނުންގެ ކޮމިޓީތައް މަސައްކަތް ކުރާނެ އެކަށީގެންވާ މާހުއުލެއް ނެތް،" ފ.ނިލަންދޫ އަންހެނުންގެ ކޮމިޓީގެ ރައީސް ވިދާޅުވި އެވެ.
އަންހެނުންގެ ކޮމިޓީތަކުން މެންބަރުން އިސްތިއުފާދޭ މައްސަލަ އިލެކްޝަން ކޮމިޝަނަށް ވެސް އޮތީ ބޮޑުވެފަ އެވެ. ހަފުތާއެއް ކުރިން އެ ކޮމިޝަނުން ބޭއްވި ނޫސްވެރިންގެ ބައްދަލުވުމެއްގައި ކޮމިޝަނުގެ ރައީސް ފުއާދު ތައުފީގު މައްސަލައިގެ ކަންބޮޑުވުން ފާޅުކުރެއްވި އެވެ. ވިދާޅުވީ، މަހަކު ދެތިން މެންބަރުން އިސްތިއުފާ ދޭއިރު ހުސްވާ މަގާމުތަކަށް މީހުން ހޮވަން ބައި-އިލެކްޝަން ބާއްވަން ޖެހުމުގެ ސަބަބުން ކޮމިޝަނުގެ އިދާރީ ބަޖެޓަށް ނުއުފުލޭ ވަރުގެ ބުރައަކަށް އެކަން ވެފައިވާ ކަމަށެވެ.
މި ކަންބޮޑުވުން ލޯކަލް ގަވާމަންޓް އޮތޯރިޓީއަށް ވެސް އެބަ އޮތްކަމަށް އެ އޮތޯރިޓީ (އެލްޖީއޭ)ގެ ސީއީއޯ އަފްޝަން ލަތީފް ވިދާޅުވި އެވެ. އޭނާ ވިދާޅުވީ، މައްސަލައިގެ ފުނަށް ދާން ކުރި މަސައްކަތުން އެނގުނީ ކޮމިޓީތަކުގެ މެންބަރުންނަށް ޒިންމާ އަދާކުރުމުގައި ގިނަ ދަތިތަކެއް ހުރިކަން ކަމަށެވެ.
"ކައުންސިލު އިދާރާގެ ޖާގަ ކުޑަވުމުން ބައެއް ފަހަރަށް މަސައްކަތްކުރަން ދަތިވޭ. ކައުންސިލް އިދާރާގެ މުވައްޒަފުން މަދުވީމަ އިދާރީ ކަންކަމަށް މުވައްޒަފުންގެ ދަތިކަން އެބަހުރި. ފުލްޓައިމް ވަޒީފާތަކުގައި މަސައްކަތް ކުރައްވާ ބޭފުޅުންނަށް ވަޒީފާ ނިމިގެން ދެން ބާކީ އޮންނަ ވަގުތުގައި ކޮމިޓީއަށް ވަގުތު ދޭން ދަތިވޭ." އަފްޝަން ވިދާޅުވި އެވެ.
އޭނާ ވިދާޅުވީ، އޭޕްރިލް މަހު، މަޖިލީހުގެ ނައިބު ރައީސާ އީވާ އަބްދުﷲ ހުށަހެޅުއްވި ގަރާރާ ވިދިގެން މި މައްސަލަތައް ހިމަނައިގެން ރިޕޯޓެއް އެކުލަވާލައި، މެންބަރުންނާ ހިއްސާކޮށްފައިވާނެ ކަމަށެވެ.
އިއްޔެގެ ކޮންފަރެންސްގައި އެކި ރަށްރަށުގެ އތމ ކޮމިޓީގެ ރައީސުން، ރައީސް އިބްރާހިމް މުހައްމަދު ސޯލިހަށް ޝަކުވާ ހުށަހެޅުއްވި އެވެ. ޝަކުވާތައް އައްސަވައި، ރައީސް ވިދާޅުވީ ދަތި ތަކަށް ހައްލު ގެނައުމުގެ ގަސްދު ގެންގުޅުއްވާ ކަމަށެވެ. އެގޮތުން ކައުންސިލްތަކުގެ ބަޖެޓް ބޮޑުކުރުމަކީ މިހާރު ވެސް މަޝްވަރާގެ މޭޒުމަތީ އޮތް ކަމެއްކަން ރައީސް ފާހަގަކުރެއްވި އެވެ. ކޮމިޓީތަކަށް އޮތް ޖާގައިގެ ދަތިތައް މިހާރުން މިހާރަށް ހައްލު ކުރައްވަން މަސައްކަތް ކުރައްވާނެ ކަމަށް ވެސް ވިދާޅުވި އެވެ.
ކޮމިޓީތަކުގެ ގިނަ މެންބަރުންތަކެއް އިސްތިއުފާ ދެއްވަމުންދާކަން ރާއްޖޭގެ ފުރަތަމަ އަންހެން ޑިފެންސް މިނިސްޓަރު މާރިޔާ އަހުމަދު ދީދީއަށް އެނގިވަޑައިގެންނެވުމާއެކު, އޭނާ ވެސް ވަނީ ކަންބޮޑުވުން ފާޅުކުރައްވައި މެންބަރުން މަގާމުގައި ދެމިތިބުމަށް ހިތްވަރު ދެއްވާފަ އެވެ.
"އެއްވެސް ގޮތަކަށް އަޅުގަނޑު ގަބޫލުކުރާ ކަމެއް ނޫން ކަމެއް ނުވީމަ އިސްތިއުފާ ދިނުމަކީ, ހަމަ ގޮތްގޮތް ހޯދޭނެ, ވިސްނައިގެން ހޯދޭނެ," މާރިޔާ ވިދާޅުވި އެވެ. "ތިޔަ ބޭފުޅުން އަތްޕުޅު މަތީ ބާރުވެރިކަން އެކި ގޮތްގޮތަށް ނަންގަވައިގެން އެކަން ކުރުމަށްޓަކައި ކުރެވެން ހުރި ހުރިހާ މަސައްކަތެއް ކުރައްވާށޭ, އެއްގޮތަކަށް ވެސް ދުރަށްޖެހިވަޑައިނުގަންނަވާތި, ފިރިހެން ބޭފުޅުން ބޭނުން ވާނެ އެގޮތް, އެގޮތަށް އެކަން ނުކުރައްވާތި,"
