ގދ. ތިނަދޫ މެޖިސްޓްރޭޓް ކޯޓުގައި ހިނގަމުންދާ މައްސަލައެއްގައި ހަސްމަކަށް (މައްސަލައިގައި ހިމެނޭ ފަރާތަކަށް) ދިވެހި އާންމު ބަހުރުވަ ފަހުމުނުވާތީ ޝަރީއަތުގެ ވާހަކަތައް ހުވަދޫ ބަހަށް ތަރުޖަމާ ކޮށްދޭނެ ފަރާތެއް ހޯދަން އިއުލާން ކޮށްފި އެވެ.
ތިނަދޫ މެޖިސްޓްރޭޓް ކޯޓުން ކުރި އިއުލާނެއްގައި ވަނީ އެ ކޯޓުން ބަލަމުންދާ މައްސަލައަކާ ގުޅިގެން ހޯދަމުންދާ ތަރުޖަމާނަކަށް، ކޯޓުގައި ހޭދަވާ ކޮންމެ އަޑުއެހުމަކަށް 400ރ.ގެ އުޖޫރައެއް ކަނޑައަޅާފައި އެވެ.
"ކޯޓުގައި ހިނގާ މައްސަލައެއްގައި ހިމެނޭ ހަސްމަކަށް އާންމު ބަހުރުވަ އެންމެ ރަނގަޅަކަށް ސާފެއް ނުވޭ، އެހެންވެ ޝަރީއަތުގައި ދައްކާ ވާހަކަތައް ހުވަދޫ ބަހުން އޭނައަށް ތަރުޖަމާ ކޮށްދޭން ޖެހޭތީ ތަރުޖަމާނަކަށް ކޯޓުން އިއުލާން ކުރީ،" ތިނަދޫ ކޯޓުގެ އޮފިޝަލަކު މި ނޫހަށް ވިދާޅުވި އެވެ.
ރާއްޖޭގެ ދެކުނުގެ އަތޮޅުތަކުގައި ވާހަކަ ދައްކާ ބަހުރުވައަކީ ރާއްޖޭގެ އެހެން ސަރަހައްދުތަކުގައި ވާހަކަ ދައްކާ ބަހުރުވައާ ތަފާތު ބަހުރުވަ އެކެވެ. ނަމަވެސް ދެކުނު އަތޮޅުގެ މަދަރުސާތަކުގައި އާންމު ދިވެހި ބަހުރުވަ ދަސްކޮށްދެ އެވެ.
