ކުނި އުކާލުމުގައި ބޭނުން ކުރާ ސިންގަލް ޔޫސް ޕްލާސްޓިކް މަދުކުރުމުގެ ގޮތުން، ތިމާވެއްޓާ ރައްޓެހި "ސްޓާޗް ކޮތަޅު" ރާއްޖެ ގެނައުމަށް މަސައްކަތް ކުރަމުން އަންނަ ކަމަށް ވޭސްޓް މެނޭޖުމަންޓް ކޯޕަރޭޝަން (ވެމްކޯ) އިން އިއްޔެ ބުނެފި އެވެ.
އަންނަ މަހުން ފެށިގެން އުކާލާ ކުނި ނެރެން ޖެހެނީ އެކި ބާވަތްތައް ވަކިކޮށްގެންނެވެ. އެކަމުގައި ގިނަ ބައެއްގެ ކަންބޮޑުވުން ހުރިއިރު، ބޭނުންކުރަންޖެހޭ ޕްލާސްޓިކް ކޮތަޅު އިތުރުވުމަކީ ވެސް ކަންބޮޑުވުމެކެވެ. މިކަމަށް ހައްލެއް ގެނައުމުގެ ގޮތުން ކުނި އުކާލަން ހާއްސަކޮށްގެން ތިމާވެއްޓާ ރައްޓެހި ކޮތަޅު ރާއްޖެއަށް އެތެރެ ކުރުމުގެ މަސައްކަތް ކުރަމުން އަންނަ ކަމަށް ވެމްކޯގެ ޑެޕިއުޓީ މެނޭޖިން ޑިރެކްޓާ ޔޫސުފް ސިރާޖު ވިދާޅުވި އެވެ.
"އަޅުގަނޑުމެން ޕްލާސްޓިކް ބޭގްގެ އިތުރުން ސްޓާޗް ބޭގް ހަމަ ރާއްޖެއަށް އެތެރެކޮށް، ބޭނުން ކުރުމުގެ މަސައްކަތް ކުރަމުން މިދަނީ،" ސިރާޖު ވިދާޅުވި އެވެ.
އެހެންނަމަވެސް ތިމާވެއްޓާ ރައްޓެހި ކޮތަޅާ ތައާރަފް ކުރާނީ ކޮން އިރަކު ކަމެއް އަދި ވެމްކޯއިން ހާމައެއް ނުކުރެ އެވެ.
ކުނި ވަކި ކުރުމުން ޕްލާސްޓިކް މަދުކުރުމަށް އެންވައިރަމެންޓް މިނިސްޓްރީން ގެންގުޅޭ ސިޔާސަތަށް ފުށޫ ނާރާނެ ކަމަށް އެ ނޫސްވެރިންގެ ބައްދަލުމުގައި ތިމާވެއްޓާ ބެހޭ މިނިސްޓަރު އައިމިނަތު ޝައުނާ ވިދާޅުވި އެވެ.
ސްޓާޗް ކޮތަޅަކީ ތިން މަސް ދުވަހުގެ ތެރޭގައި ނެތިފަތާނެވެގެން ދާނެ ފަދަ ގޮތަކަށް، އުފައްދާފައިވާ އެއްޗެކެވެ.
