ކުނި އުކާލުމުން ލިބެން ޖެހޭ 42 މިލިއަނަށް ވުރެ ގިނަ ރުފިޔާ މާލޭގެ ގޭބީސީތަކުން ނުލިބިވާ ކަމަށާއި ނުދައްކާ ހުރި ފީތައް މައާފު ކުރުމުގެ ވިސްނުމެއް ނެތް ކަމަށް ވޭސްޓް މެނޭޖްމަންޓް ކޯޕަރޭޝަންގެ ޑެޕިއުޓީ މެނޭޖިން ޑިރެކްޓާ ޔޫސުފް ސިރާޖު އިއްޔެ ވިދާޅުވެއްޖެ އެވެ.
ވެމްކޯއިން ކުނި އުކައިދިނުމުން ލިބެން ޖެހޭ އުޖޫރަ ނުލިބުމަކީ އަބަދުވެސް އެ ކުންފުނީގެ ކަންބޮޑުވުމެކެވެ. އެ މައްސަލައަށް ގާނޫނީ ގޮތުން ދާއިމީ ހައްލެއް ގެންނަން ޖެހޭ ކަމަށާއި އެ ކަން ކުރަމުން އަންނަ ކަމަށް އިއްޔެ ބޭއްވި ނޫސްވެރިންގެ ބައްދަލުވުމުގައި ސިރާޖު ވިދާޅުވި އެވެ.
"މިވަގުތަށް އަޅުގަނޑުމެންގެ ބުކްސްއިން އެބަ ދައްކާ 42 މިލިއަނަށް ވުރެ ގިނަ ރުފިޔާ ވެމްކޯއަށް ނުލިބި ހުރި ކަމަށް ކަލެކްޝަން ފައިސާގެ ގޮތުގައި. އެއީ ވެމްކޯގެ ތާރީހުގައި ނުލިބި ހުރި އެއްޗެއް. މިހާރު އަޅުގަނޑުމެން ކުރެވެމުންދާ ކަމެއް އެގޮތަށް ހުރި ބިލްތައް ސަސްޕެންޑުކޮށް، އޭގެ ތެރެއިން ރަނގަޅު ޑާޓާ ކަލެކްޓު ކުރުން،" ސިރާޖު ވިދާޅުވި އެވެ.
ކުރިއާ އަޅާ ބަލާއިރު، ފީ ދެއްކުމުގެ ކަންކަން ވަރަށް ބޮޑަށް ރަނގަޅުވެފައިވާ ކަމަށާއި އެގޮތުން 80 އިންސައްތައަށް ވުރެ ކަސްޓަމަރުން ގަވާއިދުން ފީ ދައްކަމުން އަންނަ ކަމަށް އޭނާ ވިދާޅުވި އެވެ. އެހެންނަމަވެސް ނުދައްކާ ހުރި ބިލުތައް މާފުކުރުމުގެ ވިސްނުމެއް ނެތް ކަމަށް ސިރާޖު ވިދާޅުވި އެވެ.
"ބިލުތައް މާފުކޮށް އެކަހަލަ ކަމެއް ކުރުމުގެ ވިސްނުމެއް މިވަގުތަކަށް ނެތް، އެއީ އަޅުގަނޑު ކުންފުނި މިހާރު ވެސް މިދަނީ ވަރަށް ބޮޑު ގެއްލުމުގައި ކުންފުނި ހިންގަމުން،" ސިރާޖު ވިދާޅުވި އެވެ.
ސިރާޖު ވިދާޅުވީ މީގެ ކުރިން ރެޖިސްޓްރޭޝަންގެ ކަންކަން ކުރިއަށް ގޮސްފައި އޮތީ އެންމެ ރަނގަޅަށް ނޫން ކަމަށާއި އެ ޑާޓާތައް ކްލިއާކުރުމުގެ މަސައްކަތް ކުރަމުން އަންނަ ކަމަށާއި އޭރުން މި މައްސަލައަށް ކުޑަ ނަމަވެސް ހައްލެއް ލިބިގެންދާނެ ކަމަށެވެ.
