ރައްޔިތުންގެ މަޖިލީހުގެ މިއަހަރުގެ ދެ ވަނަ ދައުރު ފެށިގެން ކުރިއަށްދާއިރު، މިހާތަނަށް ބާއްވާފައިވަނީ ކުރު ޖަލްސާތަކެކެވެ. މާ ގިނަ ކަންކަން އެޖެންޑާ ކޮށްފައެއް ނުވެ އެވެ. މިގޮތުން މިއަދުގެ ޖަލްސާގައި ވެސް އެޖެންޑާ ކޮށްފައިވަނީ ތިން މަސައްކަތެކެވެ.
މަޖިލީހުގެ މިއަދުގެ ޖަލްސާގައި ވަނީ ލާމަރުކަޒީ ގާނޫނުން ލޯކަލް ކައުންސިލްތަކަށް ދީފައިވާ ބާރުތައް ތަންފީޒު ނުކުރެވޭތީ އެ ކަންކަން ހައްލު ކުރުމަށް ގޮވާލާ، އިދިކޮޅު ޕީޕީއެމް/ޕީއެންސީ ކޯލިޝަނުން ހުށަހަޅާ ގަރާރުގެ ފުރަތަމަ ކިޔުން އިއްވާފަ އެވެ.
ނައިފަރު ދާއިރާގެ މެންބަރު އަހުމަދު ޝިޔާމް ހުށަހަޅުއްވި މި ގަރާރުގައި ވަނީ ކައުންސިލްތަކަށް ދިމާވާ ގިނަ ގޮންޖެހުންތަކަކާ ކަންބޮޑުވުންތަކެއް ހިމަނާފަ އެވެ. ގަރާރުގައި ބުނެފައިވާ ގޮތުގައި ސިޓީ ކައުންސިލްތަކާއި އަތޮޅު ކައުންސިލްތަކާއި ރަށު ކައުންސިލްތަކަށް ގާނޫނުން ދީފައިވާ ބާރުތައް އެންމެ ފުރިހަމަ ގޮތުގައި ތަންފީޒު ނުކުރެވޭތީ، އެ ކަމުގެ ސަބަބުން ރައްޔިތުންނަށް ލިބެން ޖެހޭ ގިނަ ހިދުމަތްތަކެއް ވަނީ ހުއްޓިފަ އެވެ.
ތަޅުމުގައި މިއަދު ދެން ކުރިއަށް ގެންގޮސްފައިވަނީ ޕްލޭނިން މިނިސްޓަރު މުހައްމަދު އަސްލަމްއާ ސުވާލު ކުރުމެވެ. މިއަދުގެ ޖަލްސާއަށް އަސްލަމް ހާޒިރުކޮށްފައިވަނީ ދެ މެންބަރެއް ސުވާލު ކުރުމަށެވެ. ފާއިތުވީ ހަފްތާގައި ވެސް އަސްލަމް މަޖިލީހަށް ހާޒިރުކޮށް ސުވާލުކޮށްފައިވެ އެވެ.
މިނިސްޓަރާ ކުރެއްވި ފުރަތަމަ ސުވާލަކީ ތ. ވޭމަންޑޫ އަދި ކިނބިދޫ ގުޅާލަދޭ ކޯޒްވޭގެ މަސައްކަތް ނިމޭނެ ތާރީހެއް ހޯދުމަށް ތިމަރަފުށީ ދާއިރާގެ މެންބަރު ޢަބްދުﷲ ރިޔާޒު ކުރެއްވި ސުވާލެވެ. އެ ސުވާލަށް ޖަވާބު ދެއްވަމުން މިނިސްޓަރު ވަނީ އެއީ ރައީސްގެ ވައުދެއް ނަމަވެސް، ބަޖެޓު ނުލިބޭތީ އެ މަސައްކަތް މި ދައުރުގެ ކުރިން ނުނިމޭނެ ކަމަށް ވިދާޅުވެފަ އެވެ.
މިނިސްޓަރާ ދެ ވަނަ ސުވާލެއް ކުރައްވާފައިވަނީ ލ. ކުނަހަންދޫ ނަރުދަމާގެ މަސައްކަތް ނިމޭނެ ތާރީހަކާ ގުޅޭ ގޮތުން އެ ދާއިރާގެ މެންބަރު މުހައްމަދު ސައީދު ކުރެއްވި ސުވާލެކެވެ. މި ސުވާލަށް ޖަވާބު ދެއްވަމުން މިނިސްޓަރުން ވިދާޅުވީ ކޮންޓްރެކްޓު ހަވާލުކޮށްފައިވާ 540 ދުވަހުގެ ތެރޭގައި އެ މަސައްކަތް ނިމޭނެ ކަމަށެވެ.
މިނިސްޓަރާ އިތުރު ސުވާލު ކުރުމުގެ ފުރުސަތު ގަޑިއިރަކަށް މިއަދު ކުރިއަށް ގެންގޮސްފައި ވެއެވެ. މި ފުރުސަތުގައި އެކި މެންބަރުން ވަނީ އެކިއެކި މަޝްރޫއުތަކާ ގުޅޭ ގޮތުން ސުވާލުކުރައްވާފަ އެވެ.
ކުރާނެ އިތުރު މަސައްކަތެއް އެޖެންޑާކޮށްފައި ނެތުމުން، މިއަދުގެ ޖަލްސާ ވެސް ވަނީ ދޮޅު ގަޑިއިރުގެ ތެރޭގައި ނިންމާލާފަ އެވެ.
ޖަލްސާ ނިންމާލުމުގެ ކުރިން ރިޔާސަތުގައި އިންނެވި ރައީސް މުހައްމަދު ނަޝީދު ވަނީ ސަރުކާރުން ހުށަހަޅަން ޖެހޭ ބިލުތައް ފޮނުވަން ލަސްވާތީ އެކަމުގެ ކަންބޮޑުވުން ފާޅުކުރައްވާފަ އެވެ. ނަޝީދު ވިދާޅުވީ މި ދައުރުގައި ސަރުކާރުން 22 ބިލެއް ހުށަހަޅަން ޖެހޭ ކަމަށާއި މިހާތަނަށް ލިބިފައިވަނީ ދެ ބިލެއް ކަމަށެވެ. އެ ދެ ބިލުގެ ފުރަތަމަ ކިޔުން ވެސް މިހާރު އިއްވައި ނިމިފައިވާ ކަމަށް ވިދާޅުވި އެވެ.
"މަޖިލީހަށް ނުލިބި އެބަ ވޭ 20 ބިލް. މީގެ ތެރޭގައި ފާހަގަކުރެވޭ ވަރަށް ހާއްސަ ބިލް އެބަހުރި. ދިވެހިރާއްޖޭގެ ކޯޓްތަކުގެ ގާނޫނަށް އިސްލާހު ގެނައުމުގެ ބިލް. ދިވެހިރާއްޖޭގެ ފަނޑިޔާރުންގެ ގާނޫނަށް އިސްލާހު ގެނައުމުގެ ބިލް، ޖުޑިޝަލް ސާވިސް ކޮމިޝަންގެ ގާނޫނަށް އިސްލާހު ގެނައުމުގެ ބިލް، ދިވެހިރާއްޖޭގެ ގާނޫނީ ފަންނުގެ ގާނޫނަށް އިސްލާހުގެނައުމުގެ ބިލް،" ނަޝީދު ވިދާޅުވި އެވެ.
މަޖިލީހުގެ ހާޒިރީ
ހާޒިރުވެވަޑައިގެންނެވި: 28 މެމްބަރުން
ސަލާމުގައި: 8 މެމްބަރުން
މިއަދުގެ ފޮޓޯ
މިއަދުގެ ޖަލްސާގައި ބައެއް މެންބަރުން: ދޮޅު ގަޑިއިރުގެ ތެރޭގައި މިއަދު ވެސް ޖަލްސާ ވަނީ ނިންމާލާފައި--
މިއަދުގެ ކުއޯޓޭޝަން
އަޅުގަނޑުމެން [ރައްޔިތުން] ކޮންމެ ސަރުކާރެއްގައި ވެސް މި ތިބެނީ އުންމީދެއްގައި، އިއުލާން ކުރުމާއި ހިތު އެޅުމާއި، އެ ބާވަތުގެ ކިތަންމެ ކަމެއްހިނގަމުންދޭ،" ރައްޔިތުންގެ މަޖިލީހުގެ ރައީސް މުހައްމަދު ނަޝީދު
