ހުލާސާކޮށް މަޖިލިސް: ޖަރުމަނުގައި ހުންނަވާ ރާއްޖޭގެ ސަފީރަކަށް ޝާން އަށް ރުހުން ދިނުން

ރައްޔިތުންގެ މަޖިލީހުގެ މި ދައުރުގެ އެހެން ޖަލްސާތަކެކޭ އެއްފަދައިން މިއަދުގެ ޖަލްސާގައި ވެސް ކުރާނެ މާާ ގިނަ މަސައްކަތްތަކެއް އެޖެންޑާކޮށްފައެއް ނުވެ އެވެ. މިއަދު ދެ މިނިސްޓަރަކާ ލިޔުމުން ޖަވާބު ހޯދަން ސުވާލުކޮށްފައިވެ އެވެ.

ފުރަތަމަ ސުވާލަކީ ޓެކްސީ ހިދުމަތުގައި ހުރި ކަންބޮޑުވުންތަކާ ގުޅިގެން ތިމަރަފުށި ދާއިރާގެ މެންބަރު ޢަބްދުﷲ ރިޔާޟް، މިނިސްޓަރ އޮފް ޓްރާންސްޕޯޓް އެންޑް ސިވިލްއޭވިއޭޝަން އަލްފާޟިލާ ޢާއިޝަތު ނަހުލާއާ ކުރެއްވި ސުވާލެކެވެ.

ތިމަރަފުށި ދާއިރާގެ މެމްބަރު ރިޔާޒް، ޓްރާންސްޕޯޓް މިނިސްޓަރާ ކުރެއްވި ސުވާލުގައި އެއްސެވީ މާލޭގައި މިހާރަށް ވުރެެ ފަސޭހައިން ޓެކްސީ ހިދުމަތް ލިބޭ ގޮތް ހަދަން ސަރުކާރުން ގެންގުޅޭ ވިސްނުމަކީ ކޮބައިތޯ އެވެ. އެ ސުވާލަށް ދެއްވި ޖަވާބުގައި ވިދާޅުވީ ޓެކްސީ ހިދުމަތް ހޯދުމުގައި ރައްޔިތުންނަށް ދިމާވާ ދަތިތަކުގެ ޝަކުވާ ހުށަހަޅާނެ ހޮޓްލައިނެއް ގާއިމްކޮށްފައިވާ ކަމަށެވެ. އަދި އެގޮތުން ހުށަހަޅާ ޝަކުވާތައް ބަލައި ފިޔަވަޅު އަޅަމުން އަންނަ ކަމަށް ވެސް އޭނާ ވިދާޅުވި އެވެ.

ނަހުލާ ވިދާޅުވި ގޮތުގައި ޓެކްސީ ހިދުމަތާ ގުޅޭ ޖުމްލަ 57 ޝަކުވާއެއް ހުށަހަޅާފައި ވާއިރު އެ ހުރިހާ މައްސަލައެއް ދިރާސާކޮށް، 15 މައްސަލައެއް ފުލުހުންނަށް ވަނީ ހުށަހަޅައިފަ އެވެ. އޭނާ ވިދާޅުވި ގޮތުގައި މިނިސްޓްރީއަށް ހުށަހަޅާފައި ވަނީ އަގުބޮޑުކޮށް ދަތުރުކުރިކަމުގެ ޝަކުވާތަކެކެވެ.

ދެ ވަނަ ސުވާލަށް މިއަދު ކޮށްފައިވަނީ މަނަދޫ ދާއިރާގެ މެންބަރު އަޙްމަދު ހާރޫން، މިނިސްޓަރ އޮފް ހެލްތް އަލްފާޟިލް އަޙްމަދު ނަސީމް އާ އެވެ. މާފަރު ސިއްހީ މަރުކަޒާ ގުޅިގެން ކުރި މި ސުވާލުގައި މިނިސްޓަރު ވަނީ މަރުކަޒުގެ އާ އިމާރާތުގެ ޓެންޑާ މަސައްކަތް ކުރުމަށް މިހާރު ފިނޭންސަށް ފޮނުވާފައިވާ ކަމަށް ވިދާޅުވެފަ އެވެ.

މަޖިލީހުގައި އިތުރު މަސައްކަތެއްގެ ގޮތުގައި މިއަދު ކޮށްފައިވަނީ ރާއްޖެއިން ޖަރުމަނު ވިލާތުގައި ހުންނަވާ ސަފީރަކަށް، އާއިޝަތު ޝާން ޝާކިރު އައްޔަން ކުރަން ކޮމިޓީން ފާސްކުރި ރިޕޯޓު އިއްވައި، ވޯޓަށް އެހުމެވެ. މަޖިލީހުގެ މިއަދުގެ ޖަލްސާގައި ޝާންއަށް ރުހުން ދިނުމަށް ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 29 މެންބަރުންގެ އިއްތިފާގުންނެވެ.

މަޖިލީހުގެ ހާޒިރީ

ހާޒިރުވެވަޑައިގެންނެވި: 32 މެމްބަރުން

ސަލާމުގައި: 7 މެމްބަރުން

މިއަދުގެ ފޮޓޯ

ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު، "ޕްރެކްޓިސް ޕާލަމެންޓް ފޯ ވިމެން"ގެ ބައިވެރިންނާ ބައްދަލުކުރެއްވުން

މިއަދުގެ ކުއޯޓޭޝަން

"އަޅުގަނޑުމެން މި މަޖލީހުގައި ކުރަންޖެހޭ މަސައްކަތްތައް ކުރުމުގައި ރައްޔިތުންގެ ކަންބޮޑުވުންތައް އިންތިހާއަށް ހުރި ކަންކަމުގެ ވާހަކަ އިއްޒަތްތެރި ރައީސް، މިތާ ނުދެކެވޭ ކަމަށް ވެއްޖއްޔާ ދެން އަޅުގަނޑު ހަމަ ތަކުރާރުކޮށް ދަންނަވާލަން ބޭނުން، މި މަޖިލީހުގެ މާ މުހިންމު ބޭނުމެއް ނެތް." މަޑުއްވަރީ ދާއިރާގެ މެންބަރު އާދަމް ޝަރީފް އުމަރު