ވޮލީބޯޅަ އެސޯސިއޭޝަން ކަޕްގެ ޕްރިލިމިނަރީ ބުރުގައި ރޭ ފޯރިގަދަ މެޗަކަށް ފަހު އައްޑޫ ސްޕޯޓްސް ކްލަބް 3-2 ސެޓުން ބަލިކޮށް އޮއްފު އެފްސީ ފައިނަލް ބުރުން ފުރުސަތު ހޯދައިފި އެވެ.
ޕްރިލިމިނަރީ ބުރުގައި ވާދަކުރީ ހަތަރު ޓީމެވެ. ކުޅުނު ތިން މެޗުން ވެސް މޮޅުވެ، އެއް ވަނައިގެ ގޮތުގައި ކްލަބް ވެމްކޯ ވަނީ އެއް ވަނަ ޓީމުގެ ގޮތުގައި ފައިނަލް ބުރަށް ކޮލިފައިވެފަ އެވެ. ދެ ވަނައިގެ ގޮތުގައި ފައިނަލް ބުރަށް ކޮލިފައިވާ ޓީމެއް، ކަނޑައަޅަން އޮތީ ރޭ އައްޑޫ ސްޕޯޓްސް ކްލަބާއި އޮއްފު ކުޅޭ މެޗުންނެވެ. އޮއްފު މި މެޗުން މޮޅުވެ، މި ވަނީ އަނެއް ބުރަށް ހޮވިފަ އެވެ. ތިން ވަނަ ލިބުނީ އައްޑޫ ސްޕޯޓްސް ކްލަބަށެވެ. އަދި ތިން މެޗުން ވެސް ބަލިވި، އެސްޕިރޭޝަން ފޯ އޯލް އިނީޝިއޭޓިވް ސްޕޯޓްސް (އާއި ސްޕޯޓްސް) އޮތީ ފުލުގަ އެވެ.
ތިން ވަނަ މެޗުން ވެމްކޯ ވަނީ ސީދާ ތިން ސެޓުން އާއި ބަލިކޮށްފަ އެވެ. އެ މެޗުގެ ސެޓުތައް ދިޔައީ 25-10، 25-12 އަދި 25-22 އިންނެވެ. މެޗުގެ މޮޅު ކުުޅުންތެރިއަކީ އިސްމާއިލް ސާޖިދު (ކުޑަކާއްޓެ) އެވެ.
ވެމްކޯ ޓީމުގެ އަޝްފާގު އާދަމް (އައްކަޅޭ) ބޯޅައެއް ފޮނުވާލަނީ.-- ފޮޓޯ: އަދަދު
ރޭ ކުޅުނު މެޗުގެ ފުރަތަމަ ސެޓު ދެ ގެންދިޔައީ އޮއްފު އިންނެވެ. އެއީ 25-19، 25-16 އިންނެވެ. އާ ހިތްވަރަކާ އެކު ކުޅެ، ދެން ކުޅުނު ދެ ސެޓު ގެންދިޔައީ އައްޑޫ ސްޕޯޓްސް އިންނެވެ. މި ސެޓުތައް އައްޑޫ ޓީމުން ގެންދިޔައީ، 24-27، 21-25 އިންނެވެ. ނަތީޖާ ނެރެން ކުޅުނު ފަހު ސެޓުން އޮއްފު މޮޅުވީ 17-15 އިންނެވެ.
މެޗުގެ މޮޅު ކުޅުންތެރިއަކަށް ހޮވުނީ އޮއްފު ޓީމުގެ މުހައްމަދު އަލީ (ޑެންޒޯ) އެވެ.
އެސޯސިއޭޝަން ކަޕާއި ގައުމީ ވޮލީ ބޯޅަ ލީގުގައި ކުޅޭނެ ހަ ޓީމެއް މިހާރު ވަނީ ކަށަވަރުވެފަ އެވެ. އެއީ މިދިޔަ އަހަރުގެ ގަދަ ހަތަރު ޓީމު ކަމަށްވާ ދިވެހި ސިފައިންގެ ކްލަބް (ޑިއެސްސީ)، ޕޮލިސް ކުލަބް، ގުޑީސް އަދި ސްޕޯޓްސް ކުލަބް ސިޓީގެ އިތުރުން ކޮލިފައިން ބުރުން ހޮވުނު ކްލަބް ވެމްކޯ އާއި އޮއްފު އެފްސީ އެވެ.
އެސޯސިއޭޝަން ކަޕްގެ އަންހެން ޑިވިޝަނުގެ ކުޅުން މިރޭ ފަށާނެ އެވެ. ޖުމްލަ 10 ޓީމު މި ޑިވިޝަނުގައި ވާދަކުރާއިރު، ޓީމުތައް ވަނީ ފަސް ޓީމުގެ ދެ ގްރޫޕަށް ބަހައިފަ އެވެ.
ގްރޫޕް އޭ ގައި އޮތީ ކްލަބް ވެމްކޯ، ކްލަބް ވޮލީބޯލް، އަލްމާ ސްޕޯޓްސް ކްލަބް، ޔޫތު ނިއު ޖެނެރޭޝަން އަދި ހިންމަފުށީ ވިކްޓޯރިއަސް ސްޕޯޓްސް ކްލަބް އެވެ. ގްރޫޕް ބީގައި ހިމެނެނީ ޕޮލިސް ކްލަބް، ވޮލީބޯލް ޔޫތު ނިއު ޖެނެރޭޝަން، ކްލަބް އީގަލްސް، ދިވެހި ސިފައިންގެ ކްލަބް އަދި ކްލަބް ހާފްލައިންލިންޖްއޭޖް އެވެ. މުބާރާތުގައި މިރޭ ދެ މެޗެއް ކުޅޭނެ އެވެ. ފުރަތަމަ މެޗުގައި ކްލަބް ވޮލީބޯލް ކުޅޭނީ އަލްމާ ސްޕޯޓްސް ކްލަބާ އެވެ. ދެ ވަނަ މެޗުގައި ވޮލީބޯލް ޔޫތު ނިއު ޖެނެރޭޝަން ކުޅޭނީ ކްލަބް އީގަލްސްއާ އެވެ.
