ސްރީލަންކާގެ ދަރަނި ރީސްޓްރަކްޗާ ކުރުމުގެ މަސައްކަތް ކުރިއަށް ގެންދަން ބައިނަލްއަގްވާމީ ދެ ކުންފުންޏަކާ ހަވާލު ކުރަން ނިންމައިފި އެވެ.
ލަންކާގެ ނޫސްތަކުން ބުނީ ކެބިނެޓުން އެކަމަށް ރަސްމީކޮށް ހުއްދަ ދީފައިވާ ކަމަށެވެ.
އިންޓަނޭޝަނަލް ފައިނޭންޝަލް އެޑްވައިޒަރެއް ހޯދަން އިއުލާން ކުރުމުން 28 ޕްރޮޕޯޒަލް އަދި އިންޓަނޭޝަލް ލީގަލް އެޑްވައިޒަރެއް ހޯދަން ކުރި އިއުލާނަށް 23 ޕްރޮޕޯޒަލް ލިބުނު ކަމަށް ޑިޕާޓްމަންޓް އޮފް ގަވަމަންޓް އިންފޮމޭޝަންގެ ލިޔުމެއްގައިވެ އެވެ.
އެ ހުށަހެޅުންތައް މުރާޖައާ ކުރުމަށް ފަހު ކެބިނެޓުން ނިންމީ ލީގަލް އެޑްވައިޒަރުގެ ގޮތުގައި ކްލިފޯޑް ޗާންސް އަދި ފައިނޭންޝަލް އެޑްވައިޒަރުގެ ގޮތުގައި ލަޒާޑް ހަމަޖެއްސުމަށެވެ.
އިގްތިސާދީ، އިޖްތިމާއީ އަދި ސިޔާސީ ކާރިސާއެއް ކުރިމަތިވެފައިވާ ލަންކާގެ ބޭރުގެ ދަރަނީގެ ގޮތުގައި 12 ބިލިއަން ޑޮލަރު އޮތް އިރު، އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ އެހީ ލިބޭނީ ދަރަނި ރީސްޓްރަކްޗާ ކުރުމުން ކަމަށް ޝަރުތުކޮށްފައިވެ އެވެ.
