ސިލްހެތް، ބަންގްލަދޭޝް (މޭ 23) - ބަންގްލަދޭޝްގެ އިރުއުތުރުގައި 20 އަހަރުގެ ތެރޭގައި ކުރިމަތިވި އެންމެ ބޮޑު ފެންބޮޑުވުމުގެ ހާދިސާގައި ގާތްގަނޑަކަށް ހަތަރު މިލިއަން މީހުންނަށް އަސަރުކޮށްފައިވާ ކަމަށް އދ. އިން ބުނެފި އެވެ.
ބަންގްލަދޭޝްގެ ސަރުކާރުން ބުނީ މިދިޔަ ހަފްތާގައި ފެންބޮޑުވާން ފެށުމުގެ ސަބަބުން އިރުއުތުރުގައި އޮންނަ ސިލްހެތް ޑިސްޓްރިކްޓުގެ 70 ޕަސެންޓު އަދި ސުނަމްގާންޖް ޑިސްޓްރޮކްޓުގެ 60 ޕަސެންޓު އޮތީ ފެނު އަޑީގައި ކަމަށެވެ. މިހާތަނަށް 10 މީހުން މަރުވެ، ދެ މިލިއަން މީހުން ވަނީ ހާލުގައި ޖެހިފަ އެވެ.
ފެންބޮޑުވާން މެދުވެރިވީ ބޯކޮށް ވާރޭ ވެހުމާ އެކު އިންޑިއާ އާއި ބަންގްލަދޭޝް ގުޅޭ ބޯޑަރު ކައިރީގައި އޮންނަ ސުރްމާ އަދި ކުޝިއަރާ ކޯރުތައް ފުރިގެން ބަންޑުންވުމުންނެވެ.
ފްލަޑް ފޯކާސްޓިން އެންޑް ވޯނިން ސެންޓަރުގެ ވެރިޔާ އަރީފުއްޒަމާން ބުއިޔާން ވިދާޅުވީ 1970 ވަނަ އަހަރުން ފެށިގެން އެ ދެ ކޯރުގެ ފެންގަނޑު އުފުލިފައި ނުވާ މިންވަރަށް މި އަހަރު އުފުލުނު ކަމަށެވެ.
ޔުނިސެފުން ބުނީ ބަންގްލަދޭޝްގެ އިރުއުތުރުގެ ހަތަރު ޑިސްޓްރިކްޓަރުކް ހަތަރު މިލިއަން މީހުންނަށް ފެންބޮޑުވުމުގެ އަސަރުކޮށްފައިވާ ކަމަށެވެ. އެ ސަރަހައްދުގައިވާ ހުރިހާ ސްކޫލަކާއި ކޮލެޖެއް ވަނީ ބަންދުކޮށްފަ އެވެ.
ޑިޒާޒްޓާ މެނޭޖްމަންޓްގެ އިސް އޮފިޝަލެއް ކަމަށްވާ ނޭތާއި ޑެ ސަރްކޭރް ވިދާޅުވީ ބައެއް ހިސާބުތަކުން ފެންގަނޑު ހިނދެން ފެށި ނަމަވެސް، 1.23 މިލިއަން މީހުންނަށް އަދިވެސް އަނބުރާ ގެތަކަށް ނުދެވޭ ކަމަށެވެ.
އޭނާ ވިދާޅުވީ ފެނުގެ ޒަރިއްޔާއިން ބަލިތައް ފެތުރިދާނެތީ ސަމާލުވުމަށް 140 ސިއްހީ ޓީމު ސަރުކާރުގެ ފަރާތުން އެ ސަރަހައްދަށް ފޮނުވާފައިވާ ކަމަށެވެ.
