މަސްވެރިކަން ރަނގަޅުވާ ކޮންމެ ދުވަސްވަރެއްގައި، ކޫއްޑޫގެ ކެޕޭސިޓީއަށް ނުކަތާ ވަރަށް ދެކުނުގައި މަސް ބާނަ އެވެ. ބާނާ ހުރިހާ މަހެއް ނުކިރުވުމަކީ މަސްވެރިންގެ އެެންމެ ބޮޑު ކަންބޮޑުވުން ވެސް މެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ މި ކަންބޮޑުވުންތަކާ ގުޅޭ ގޮތުން ސުވާލު ކުރުމަށް މަސްވެރިކަމާ ގުޅޭ ވަޒީރު ޑރ. ހުސެއިން ރަޝީދު މަޖިލީހަށް ހާޒިރުކޮށް ސުވާލުކުރައްވާފަ އެވެ.
ވިލިނގިލި ދާއިރާގެ މެންބަރު ސައުދު ހުސައިން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު ވަނީ މަސްވެރިކަން ރަނގަޅުވާ ދުވަސްވަރަށް ވަގުތީ އަދި ދާއިމީ ހައްލުތަކެއް ހޯދުމުގެ މަސައްކަތް ކުރަމުން އަންނަ ކަމަށް ވިދާޅުވެފަ އެވެ. މިގޮތުން ވަގުތީ ހައްލެއްގެ ގޮތުން މަސްކިރަން ބޭރުން ބޯޓެއް ގަނެ، ކޫއްޑޫގެ ކެޕޭސިޓީ ދެ ގުނަ ކުރަން ނިންމާފައިވާ ކަމަށް ވިދާޅުވި އެވެ.
"ކުރިއަށް އޮތް މަސްވެރިކަމުގެ މޫސުމުގައި 800 ޓަނު ކޫއްޑޫއަށް ކިރުމަށް ގެންނާނެ ކަމަށް ބަލާއިރު، ޝޯޓް ޓާމް ހައްލެއްގެ ގޮތުން މަދުވެގެން އިތުރު 400 ޓަނު ގަނެވޭނެ އިންތިޒާމު ހަމަޖެހިގެންދާނެ، ކުރިއަށް އޮތް ތިން މަސް ދުވަހުގެ ތެރޭގައި މި ގާބިލްކަން ގާއިމްކުރެވޭނެ ހަމައެކަނި ގޮތަކީ މަސްގަނޑުކޮށް ފިނި ކުރާ ފްރީޒާ ވެސެލްސް ގަތުން،" މިނިސްޓަރު ވިދާޅުވި އެވެ.
އިތުރު ސުވާލު ކުރުމަށް ހުޅުވާލި ފުރުސަތުގައި މިނިސްޓަރު ވަނި އެކި ރަށްރަށުގެ އައިސްޕްލާންޓުތަކުގެ އަޕްޑޭޓު މެންބަރުންނަށް ދެއްވާފަ އެވެ.
މިނިސްޓަރާ ސުވާލު ކުރުމުގެ އިތުރުން ދައުލަތުގެ މާލިއްޔަތު ގާނޫނަށް އިސްލާހު ގެނައުމުގެ ބިލުގެ ފުރަތަމަ ކިޔުން ވަނީ އިއްވާފަ އެވެ. މި ބިލު މަޖިލީހަށް ހުށަހަޅާފައިވަނީ ސަރުކާރުގެ ފަރާތުން ފުވައްމުލަކު ދެކުނު ދާއިރާގެ މެންބަރު މުޙައްމަދު މުމްތާޒެވެ.
މަޖިލިސް ތަޅުމުގައި މިއަދު ވެސް މާ ގިނަ މަސައްކަތްތަކެއް ކުރިއަށް ގެންގޮސްފައެއް ނުވެ އެވެ. އިދިކޮޅު ޕީޕީއެމް/ޕީއެންސީ ކޯލިޝަނުން މައްސަލައެއް ހުށަހެޅި ނަމަވެސް އެ މައްސަލަ ވަނީ ބަހުސް ކުރުމެއް ނެތި ބޭރުކޮށްލާފަ އެވެ. އިދިކޮޅުން ހުށަހެޅީ އާންމުންނަށް ނޭނގި ޕާޓީގެ ދަފްތަރުގައި ރެޖިސްޓާ ވާ ކަމަށް ބުނެ އާންމުން ކަންބޮޑުވުން ފާޅުކުރަމުން އަންނާތީ އެ ކަމާ ގުޅޭ މައްސަލައެކެވެ.
މިއަދުގެ ހާޒިރީ
ހާޒިރުވެވަޑައިގެންނެވި: 26 މެމްބަރުން
ސަލާމުގައި: 4 މެމްބަރުން
ތަޅުމުގައި މާ ގިނަ މަސައްކަތްތަކެއް ކުރިއަށް ނުގެންދިޔަ ނަމަވެސް މިއަދު ވެސް ކޮމިޓީތަކުގެ ގިނަ މަސައްކަތްތަކެއް ވަނީ ކޮށްފަ އެވެ. ކޮމިޓީތަކުން މިއަދު ކުރިއަށް ގެންދިޔަ މުހިންމު މަސައްކަތްތަކުގެ ތެރޭގައި ވަޒީރުން ރައްޔިތުންގެ މަޖިލީހަށް ހާޒިރުކޮށް ކުރާ ސުވާލުތަކަށް ދޭ ޖަވާބަކާ ގުޅިގެން، އިތުރު ސުވާލު ކުރަން ލިބޭ ވަގުތު 30 މިނެއްޓާ ހަމައަށް އިތުރުކުރަން މަޖިލީހުގެ ކަމާގުޅޭ ކޮމިޓީން ވަނީ ފާސްކޮށްފަ އެވެ.
ދުވަހުގެ ފޮޓޯ
ރައްޔިތުންގެ މަޖިލީހުގެ ނައިބު ރައީސް އީވާ ޢަބްދުﷲ، "ޕްރެކްޓިސް ޕާލަމެންޓް ފޯރ ވިމެން" ގެ ބައިވެރިންނާ ބައްދަލުކުރެއްވުން
ދުވަހުގެ ކޯޓޭޝަން
"މަހުގެ އަގު އަޅުގަނޑު ބޭނުންވަނީ ދެވެން އޮތް އެންމެ ބޮޑު އަގެއް ލިބޭނެ ގޮތަށް ހަމަ ޖައްސަން، އެކަމަކު އެއީ މަސް ގަންނަ ކުންފުންޏަކަށް ދެވޭ އަގަކަށް ވެގެން އެ އަގު ދެވޭނީ، އަޅުގަނޑު ހިތްހަމަ ޖެހޭ ގޮތަށް ކަނޑައަޅަން ޖެހޭ އަގެއް ނޫން އެއީ،" މިނިސްޓަރު ޑޜ. ހުސެއިން ރަޝީދު
