އޭއެފްސީ ކަޕްގެ ގްރޫޕް ޑީގެ ފަހު ދެ މެޗު އެއް ވަގުތެއްގައި ނުކުޅޭތީ ގޯކުލަމް ކެރަލާ އެފްސީ އާއި ބަޝުންދަރާ ކިންގްސް އިން މެޗުގެ ކުރިން އޮތް ނޫސްވެރިންގެ ބައްދަލުވުމުގައި ކަންބޮޑުވުން ފާޅުކޮށްފި އެވެ.
ކަލްކަތާގައި ސެންޓްރަލައިޒްކޮށް މިހާރު ކުރިއަށްދާ އޭއެފްސީ ކަޕްގެ މެޗުތަކުގައި ކޮންމެ ޓީމެއް މިހާތަނަށް ދެ މެޗު ކުޅެފައިވާއިރު، ގްރޫޕް ޑީގެ އެއް ވަނައިގައި އޭޓީކޭ މޯހަން ބަގާން އޮތީ ތިން ޕޮއިންޓާއި ފައިދާ ދެ ގޯލާ އެކު އެވެ. ގޯކުލަމް ކެރަލާ އެފްސީ ދެ ވަނައިގައި އޮތީ ތިން ޕޮއިންޓާ އެކު ފައިދާ އެއް ގޯލު އޮތުމުންނެވެ. ތިން ވަނައިގައި އޮތް, ރާއްޖޭގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަން އަށް ތިން ޕޮއިންޓް ލިބުނަސް ފައިދާ ގޯލެއް ނެތެވެ. ބަންގްލަދޭޝްގެ ޗެމްޕިއަން، ބަޝުންދަރާ ކިންގްސް ފުލުގައި އޮތީ ތިން ޕޮއިންޓާ އެކު ގެއްލުން ތިން ގޯލުއާ އެކު އެވެ.
ކަލްކަތާގެ މަޝްހޫރު ސޯލްޓް ލޭކް ސްޓޭޑިއަމްގައި، މާދަމާ ހަވީރު 16:00 ގައި ގޯކުލަމް އާއި ބަޝުންދަރާ ކުޅޭ މެޗު އޮންނާނެ އެވެ. ގްރޫޕްގެ ފަހު މެޗުގައި އޭޓީކޭ މޯހަން ބަގާން އާއި މާޒިޔާ ބައްދަލުކުރާނީ މާދަމާރޭ 20:00 ގަ އެވެ.
ބަޝުންދަރާ އާއި ގޯކުލަމް އާއި މާދަމާ ހަވީރު ކުޅޭ މެޗުން މޮޅުވެގެން ވެސް އަނެއް ބުރުގެ ފުރުސަތު ލިބޭނެކަން ޔަގީންވާނީ މާދަމާރޭގެ މެޗަށް ފަހު އެވެ. މީގެ ކުރިން އާންމު ގޮތެއްގައި އޭއެފްސީ ކަޕްގެ ގްރޫޕް ސްޓޭޖުގެ ފަހު ދެ މެޗު ކުޅެނީ އެއްވަގުތެއްގަ އެވެ. އެކަމަކު، ފަހަކަށް އައިސް ފަހު ދެ މެޗު ކުޅެނީ ތަފާތު ދެ ވަގުތެއްގަ އެވެ. ހާއްސަކޮށް ސެންޓްރަލައިޒްކޮށް ކުޅޭއިރު، ކުޅެން ޖެހެނީ ދެ ވަގުތެއްގަ އެވެ. އެއީ އެއް ދަނޑެއްގައި ހުރިހާ މެޗެއް ކުޅޭތީ އެވެ.
މާދަމާގެ މެޗުގެ ކުރިން މިއަދު އޮތް ނޫސްވެރިންގެ ބައްދަލުވުމުގައި ބަޝުންދަރާގެ ކޯޗު އޮސްކާ ބްރުޒޮން ބުނީ ގްރޫޕްގެ ފަހު ދެ މެޗު އެއް ވަގުތެއްގައި ކުޅޭ ގޮތަށް ހަދަން އެޕީލްކުރި ކަމަށާއި އެކަމަކު، އޭއެފްސީ އެ ގޮތަށް އަމަލެއް ނުކުރި ކަމަށެވެ.
"އަހަންނަކަށް ނޭނގެ ކީއްވެ ކަމެއް، ދެ މެޗު އެއް ވަގުތެއްގައި ކުޅެވޭނެ ވަރަށް ކަލްކަތާގައި ރީތި ދަނޑު އެބަހުރި، އެކަމަކު ކޮންމެ ވެސް ސަބަބަކާ މި ދެ މެޗު ހަމަ މި ކުޅެނީ ދެ ވަގުތެއްގައި،" އޮސްކާ ބުންޏެވެ.
ބަޝުންދަރާ މާދަމާ ހަވީރު މޮޅުވި ނަމަވެސް އެ ޓީމަށް އަނެއް ބުރަށް ދެވޭނީ މާދަމާރޭ މާޒިޔާ އަތުން އޭޓީކޭ މޯހަން ބަގާން އަށް މޮޅުނުވެވިއްޖެނަމަ އެވެ. އޮސްކާ ބުނީ މުބާރާތުގެ "އަގު ހިފެހެއްޓުމު"ގެ ޒިންމާ އޮތީ މާޒިޔާ އަތުގައި ކަމަށެވެ.
"ދެ މެޗު އެއް ވަގުތެއްގައި ނުކުޅުމަކީ މީގެ ބައިވަރު އުނދަގޫތަކެއް ދެ ޓީމަށް ވެސް ހުންނާނެ ކަމެއް. އަހަރެމެން މާދަމާ ހަވީރު މޮޅުވެއްޖިއްޔާ، އެ ހިސާބުން މާޒިޔާ މެޗަށް ނުކުތުމުގެ ކުރިން އެ މީހުންނަށް މުބާރާތް ނިމުނީ، އެހެންވީމަ އަހަރެންގެ ނަޒަރުގައި މާޒިޔާ ބޮލުގައި އެބައޮތް މުބާރާތުގެ އިންޓަގްރިޓީ ހިފެހެއްޓުމުގެ ޒިންމާ،" އޮސްކާ ބުންޏެވެ.
މި ފަހަރުގެ މުބާރާތުގައި ބަޝުންދަރާ އިން ކުޅުނު ފުރަތަމަ މެޗުގައި ވަނީ މާޒިޔާ އަތުން 1-0 އިން މޮޅުވެފަ އެވެ. އެކަމަކު، ދެ ވަނަ މެޗުގައި އޭޓީކޭ މޯހަން ބަގާން އަތުން ބަޝުންދަރާ ބަލިވީ 4-0 އިންނެވެ. މިއީ އޮސްކާގެ ކޯޗުކަމުގައި ބަޝުންދަރާގެ އެންމެ ބޮޑު ނާކާމިޔާބީ އެވެ. އެ ވަރުގެ ދަށް ނަތީޖާ އަކުން ބަޝުންދަރާ ތިން ދުވަހުގެ ތެރޭގައި އަރައިގަންނާނީ ކިހިނެއްތޯ އެހުމުން އޮސްކާ ބުނީ ބަޝުންދަރާ އަކީ "ޗެމްޕިއަނެއް" ކަމަށާއި މި ފަަދަ ހާލަތްތަކުން ނުކުމެ ނަތީޖާ ނެރެވޭނެ ފެންވަރު އެ ޓީމުގައި އެބަހުރި ކަމަށެވެ.
"މި ގްރޫޕްގެ ފުރަތަމަ ދެ މެޗުން ބަލިވި ދެ ޓީމު ދެ ވަނަ މެޗުގައި އައިސް މޮޅުވީ. އެހެންވީމަ، އަހަރެންގެ ނަޒަރުގައި ޗެމްޕިއަނުންގެ ސިފަ މި ހަތަރު ޓީމުގައި ވެސް އެބަހުރި، އެހެންވީމަ، އަހަރެެމެން ޓީމު، ބަޝުންދަރާގެ ފަރާތުން ބޭނުންވާ ރިއެކްޝަން ފެންނާނެ ކަމަށް މި ބަލަނީ،" ކުރިން ރާއްޖޭގެ ނިއު ރޭޑިއަންޓަށް އަހަރަކަށް ވުރެ ގިނަ ދުވަހު ކޯޗުކޮށްދިން އޮސްކާ ބުންޏެވެ.
ގޯކުލަމް އަކީ ވަރުގަދަ ޓީމެއް ކަމަށާއި އެ ޓީމުގައި ތިބި ކުޅުންތެރިންނަކީ ނަތީޖާ ނެރެވޭ ވަރަށް ކުޅެވިދާނެ ކުޅުންތެރިންކަން އޭޓީކޭ މެޗުގައި ފެނިގެން ގޮސްފައިވާ ކަމަށާއި އެކަމަށް ސަމާލުވާނެ ކަމަށް އޮސްކާ ވަނީ ބުނެފަ އެވެ.
ދެ މެޗު ދެ ވަގުތެއްގައި ކުޅުން އިންސާފުވެރިއެއް ނޫން
ގޯކުލަމް ކެރަލާގެ ކޯޗު ވިންޗެންޒޯ އަލްބާޓޯ ބުނީ ފަހު ދެ މެޗު އެއް ވަގުތެއްގައި ކުޅުނު ނަމަ ހުރިހާ ޓީމަކަށް ވެސް ހަމަހަމަ ފުރުސަތެއް އޮންނާނެ ކަމަށެވެ. އެކަމަކު، މިހާރު ރޭވިފައި އޮތްގޮތުން ދެ މެޗު ދެ ވަގުތެއްގައި ކުޅޭއިރު، "ނާއިންސާފުން" ކަންކަން ދިމާވުމުގެ ބިރު އެބައޮތް ކަމަށް ވިންޗެންޒޯ ވަނީ ބުނެފަ އެވެ.
"ދުނިޔޭގެ ކޮންމެ ތަނެއްގައި އޮތް މުބާރާތެއް ކަމަށް ވިޔަސް، ފަހު ދެ މެޗު މި ކުޅެނީ އެއް ވަގުތެއްގައި. އަހަންނަށް ނޭނގެ މި މުބާރާތް ވީމަ މި ތަފާތުވީ ކީއްވެ ކަމެއް، ގައިމު ވެސް އަހަންނަށް ފުޓްބޯޅަ އެނގޭ މިންވަރަށް ބަލާއިރު، މި ދެ މެޗު އެންމެ ރަނގަޅީ އެއް ވަގުތެއްގައި ކުުޅުން،" ވިންޗެންޒޯ ބުންޏެވެ.
"އެއް ވަގުތެއްގައި ނުކުޅުމަކީ، މުބާރާތް އިންތިޒާމްކުރާ ފަރާތުގެ ނިންމުމެއް ކަމަށްވާނަމަ އެ އަށް ބޯލަނބައިގެން ޕްރޮފެޝަނަލުންގެ ގޮތުގައި ކުރިއަށްދިއުން ނޫން ގޮތެއް ނެތް،"
ގޯކުލަމް އަށް އަނެއް ބުރަށް ދެވެން އޮތީ އެ ޓީމުން ބަޝުންދަރާ އަތުން މޮޅުވެ، މާޒިޔާ އަަށް އޭޓީކޭ މޯހަން ބަގާން ބަލިނުކުރެވިއްޖެނަމަ އެވެ. މާދަމާގެ ދެ މެޗުން ގޯކުލަމް އާއި މާޒިޔާ މޮޅުވެއްޖެނަމަ އަނެއް ބުރަށް ދާނީ މާޒިޔާ އެވެ. އެއީ ހެޑް ޓު ހެޑް އިން އެ ޓީމަށް ކުރި ލިބޭތީ އެވެ. ގޯކުލަމް މޮޅުވެއްޖެނަމަ އެ ޓީމު އަނެއް ބުރަށް ދާނީ މާދަމާރޭ މާޒިޔާ އަށް މޮޅެއް ނުހޯދިއްޖެނަމަ އެވެ.
މާދަމާގެ މެޗަކީ ގޯކުލަމް ޓީމުގައި ތިބި ވަރަށް ގިނަ ކުޅުންތެރިން އެ ޓީމަށް ކުޅެދޭނެ ފަހު މެޗަށް ވެދާނެ ކަމަށާއި އެހެންކަމުން އެ ކުޅުންތެރިންގެ ފަރާތުން އެދެނީ ވަދާއީ މެޗުގައި ކްލަބަށް ބޮޑު ކަމެއް ހާސިލްކޮށްފައި ދިއުން ކަމަށް ވިންޗެންޒޯ ވަނީ ބުނެފަ އެވެ. އަދި ގޯކުލަމް އިން ކޮންމެ ގޮތެއް ވިޔަސް މޮޅެއް ނޫން ނަތީޖާ އަކަށް ފަހު މެޗުގައި ނުވިސްނާނެ ކަމަށް ވިންޗެންޒޯ ބުންޏެވެ.
