ކޮލޮމްބޯ، ސްރީލަންކާ (މޭ 23) - ފައިސާގެ ދަތިކަން ކުރިމަތިވެފައިވާ ސްރީލަންކާގެ "އިގްތިސާދީ ހަނގުރާމަ ކުރާ ކެބިނެޓަށް" އިތުރު ހަ މިނިސްޓަރުން ހޯމަ ދުވަހު އައްޔަނު ކުރި ނަމަވެސް، ފިނޭންސް މިނިސްޓަރުގެ މަގާމު އަދިވެސް އޮތީ ހުހަށެވެ.
ސްރީލަންކާގެ ތާރީހުގައި ދުވަހަކު ވެސް ކުރިމަތި ނުވާ ފަދަ ބޮޑު އިގްތިސާދީ ކާރިސާއެއް މިހާރު ކުރިމަތިވެފައިވާ އިރު، ބޭރު ފައިސާގެ ދަތިކަމާ ހެދި އާއްމު ދިރިއުޅުމަށް ވަނީ ހުރަސް އެޅިފަ އެވެ. އެގޮތުން ޒަރޫރީ ކާބޯތަކެއްޗާއި، ބޭސް އަދި ތެލާއި ގޭސް އިމްޕޯޓް ކުރެވޭނެ ގޮތެއް ނެތެވެ.
މިދިޔަ ހަފްތާގައި ބޮޑު ވަޒީރު ރަނިލް ވިކްރަމަސިންހަގެ އޮފީހުން ބުނީ ފިނޭންސް މިނިސްޓަރުގެ މަގާމަށް އެމަނިކުފާނު އައްޔަނު ކުރައްވާނެ ކަމަށެވެ. ނަމަވެސް ހޯމަ ދުވަހު އާ މިނިސްޓަރުންތަކެއް އައްޔަނު ކުރެއްވި އިރު، ބޮޑު ވަޒީރަށް ފިނޭންސް މިނިސްޓަރުގެ ޒިންމާތައް ހަވާލުނުކުރެއްވީ ކީއްވެ ކަމެއް ރައީސް ގޮތަބަޔާ ރާޖަޕަކްސަގެ އޮފީހުން ހާމައެއް ނުކުރެ އެވެ.
ބައެއް މަސްދަރުތަކުން ބުނީ ރައީސްގެ ސްރީލަންކާ ޕޮޑަޖުނަ ޕެރަމުނަ ޕާޓީ (އެސްއެލްޕީޕީ) އާއި އެއްބައިވަންތަ ސަރުކާރުގައި ހިމެނޭ އެހެން ޕާޓީތަކާ ދެމެދު "ޓެންޝަން" އެބަ އޮތް ކަމަށެވެ.
މޭ މަހުގެ ކުރީކޮޅު ރަނިލް ބޮޑު ވަޒީރު ކަމަށް ވަޑައިގެންނެވީ ރައީސްގެ ބޭބޭފުޅު މަހިންދަ ރާޖަޕަކްސަ ބޮޑު ވަޒީރުކަމުން އިސްތިއުފާ ދެއްވުމާ ގުޅިގެންނެވެ. މަހިންދަ ރާޖަޕަކްސަ އިސްތިއުފާ ދެއްވީ އެމަނިކުފާނުގެ ސަޕޯޓަރުން ސުލްހަވެރި މުޒާހަރާއަށް ހުރަސް އެޅުމުން އުފެދުނު ހަމަނުޖެހުމުގެ ތެރެއިން ޕްރެޝަރު ބޮޑުވުމުންނެވެ. އެ ހަމަނުޖެހުމުގައި ބޮޑެތި ގެއްލުންތަކެއް ކުރިމަތިވެ، ނުވަ މީހުން މަރުވި އެވެ.
އުމުރުން 73 އަހަރުގެ އާ ބޮޑު ވަޒީރު ރަނިލް ވައުދުވެވަޑައިގެންނެވީ ހުރިހާ ޕާޓީތަކެއް ހިމެނޭ އެއްބައިވަންތަ ސަރުކާރެއް ގާއިމް ކުރުމަށެވެ.
އިގްތިސާދީ ކާރިސާއިން އަރައިގަތުމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ އެހީ ހޯދުމަށް މަޝްވަރާތައް ފަށާފައިވާ އިރު ފިނޭންސް މިނިސްޓަރަކު ނެތި ލަސްވުމަކީ އައިއެމްއެފްއާ އެކު ފަށާފައިވާ މަޝްވަރާ ލަސްވާނެ ސަބަބެއް ކަމަށް މަރުކަޒީ ބޭންކުގެ ގަވަރުނަރު މިދިޔަ ބުރާސްފަތި ދުވަހު ވިދާޅުވި އެވެ.
