އޮކްޓޯބަރު މަހާ ދިމާކޮށް, މަސްވެރިކަން ރަނގަޅުވެގެން ދާ މޫސުމުގެ ކުރިން، ކޫއްޑޫއަށް 800 ޓަނުގެ މަސް ގަނެވޭނެ ގޮތް ހަމަޖެއްސުމުގެ މަސައްކަތް ކުރަމުން އަންނަ ކަމަށް ފިޝަރީޒް މިނިސްޓަރު ޑރ. ހުސެއިން ރަޝީދު ހަސަން މިއަދު ވިދާޅުވެއްޖެ އެވެ.
މަސްވެރިކަން ރަނގަޅު ދުވަސްވަރު މަސް ނުކިރޭ މައްސަލައަށް އެކަށީގެންވާ ހައްލެއް ގެނައުމަށް މިނިސްޓްރީން ކުރަމުން އަންނަނީ ކޮން ކަމެއްތޯ ބެލުމަށް ރައްޔިތުންގެ މަޖިލީހުގެ މިއަދުގެ ޖަލްސާއަށް މިނިސްޓަރު ހާޒިރުކޮށް ވަނީ ސުވާލުކޮށްފަ އެވެ.
"ކުރިއަށް އޮތް މަސްވެރިކަމުގެ މޫސުމުގައި 800 ޓަނު ކޫއްޑޫއަށް ކިރުމަށް ގެންނާނެ ކަމަށް ބަލާއިރު، ޝޯޓް ޓާމް ހައްލެއްގެ ގޮތުން މަދުވެގެން އިތުރު 400 ޓަނު ގަނެވޭނެ އިންތިޒާމު ހަމަޖެހިގެންދާނެ، ކުރިއަށް އޮތް ތިން މަސް ދުވަހުގެ ތެރޭގައި މި ގާބިލްކަން ގާއިމްކުރެވޭނެ ހަމައެކަނި ގޮތަކީ މަސްގަނޑުކޮށް ފިނި ކުރާ ފްރީޒާ ވެސެލްސް ގަތުން،" މިނިސްޓަރު ވިދާޅުވި އެވެ.
މިފަދަ ފްރީޒާ ވެސެލްސް ގަތުމުގެ މަސައްކަތް މިހާރު ކުރިއަށްދާ ކަަމަށާއި އޭގެ ދެ ބޯޓު ނުވަތަ ތިން ބޯޓު ބޭނުންވާ ކަމަށް ވިދާޅުވި އެވެ. ކުރު މުއްދަތެއްގައި މިކަމަށް ހޯދެން އޮތް ހަމައެކަނި ހައްލަކީ މިއީ ކަމުގައި މިނިސްޓަރު ފާހަގަކުރެއްވި އެވެ.
މަސްވެރިކަން ރަނގަޅު މޫސުން ފެށޭނެ ކަމަށް މިނިސްޓްރީން ލަފާކޮށްފައިވަނީ އޮގަސްޓު މަހާ ސެޕްޓެމްބަރު މަސް ހިސާބުގަ އެވެ. އަދި މޫސުން އޮކްޓޯބަރުން ފެށިގެން ޖެނުއަރީއާ ހަމައަށް އާދަޔާ ހިލާފަށް ރަނގަޅުވެގެން ދާނެ އެވެ.
ކޫއްޑޫގައި މިހާރު ހުރި ފްރީޒިން ކެޕޭސިޓީއަކީ ދުވާލަކު 240 ޓަނެވެ. އަދި ކޫއްޑޫގައި ބޭނުންކުރަމުން އަންނަ ކަލިމިންޖާ ބޯޓާއެކު މިހާރު ގަނެވޭނީ ދުވާލަކު 400 ވަރަކަށް ޓަނު ކަމަށް މިނިސްޓްރީން ވަނީ ހާމަކޮށްފަ އެވެ.
ދެކުނުގެ މަސްވެރިކަން އިންތިހާއަށް ރަނގަޅުވާ ދުވަސްވަރު، މިފްކޯގެ ކެޕޭސިޓީއަށް ނުކަތާވަރަށް މަސް ބާނަމުންދާތީ މަސް ގަންނަ މިންވަރު އެ ކުންފުނިން ލިމިޓް ކުރާތީ މަސްވެރިންގެ ގިނަ ކަންބޮޑުވުންތަކެއް އެކަމާ ގުޅިގެން ހުރެ އެވެ.
