ރާއްޖޭގެ އިގްތިސޯދީ ސަރަހައްދުގައި އިންޑިއާގެ މަސްބޯޓުތަކުން ގަވައިދާ ހިލާފަށް މަސްވެރިކަން ކުރާ ކަމުގެ ޝަކުވާތައް ނުލިބޭ ކަމަށް ފިޝަރީޒް މިނިސްޓަރު ޑރ. ހުސެއިން ރަޝީދު ހަސަން މިއަދު ވިދާޅުވެއްޖެ އެވެ.
މަޖިލީހަށް މިނިސްޓަރު ހާޒިރުކޮށް ސުވާލުކޮށްފައިވާއިރު، އިންޑިއާގެ ބޯޓުތަކުން ރާއްޖޭގައި މަސްވެރިކަން ކުރޭތޯ ސުވާލުކުރެއްވީ ހޯރަފުށީ ދާއިރާގެ މެންބަރު އަހުމަދު ސަލީމެވެ. ސަލީމް މި ސުވާލުކުރެއްވީ ކުރީގެ ރައީސް އަބްދުﷲ ޔާމީން އަބްދުލްގައްޔޫމް ކުރެއްވި ތުހުމަތަކާ ގުޅިގެންނެވެ. 30 ޑިސެންބަރު 2021 ގައި ކާނިވާ ސަރަހައްދުގައި ބޭއްވި ޖަލްސާއެއްގައި ޔާމީން ވަނީ "މިތާ އުތުރުން އެއޮތް މަސް ބާނާ ނަގަނީއޭ އިންޑިއާ މަސްވެރިން،" ވިދާޅުވެފަ އެވެ.
"ގަވައިދާ ހިލާފަށް އަޅުގަނޑުމެންގެ ސަރަހައްދަށް ވަދެގެން މަސްވެރިކަން ކުރާ ކަމުގެ ޝަކުވާ ކޯސްޓު ގާޑުން އަޅުގަނޑުމެންނަށް ލިބިފައެއް ނެތް، ގާނޫނު ހަމަޖެހިފައި އިންނަ ގޮތުން އެމްއެންޑީއެފްގެ ކޯސްޓު ގާޑުން ރާއްޖޭގެ އިގްތިސޯދީ ސަރަހައްދު ބަލަހައްޓަނީ، އެގޮތަށް ބޯޓުތައް ހިފެހެއްޓުމަށް ފަހު ބަނދަރަކަށް ގެނެސް މި ޕޮލިހާ ހަވާލުކޮށް އަޅުގަނޑުމެންނާ ހަވާލުކުރޭ," އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ވަކި ގައުމެއްގެ އުޅަނދަކަށްވުމުން ފިޔަވަޅު ނާޅާ ދޫކޮށްލާފައި ނުވާނެ ކަމަށެވެ. މަސްވެރިކަމުގެ ގާނޫނަށް 2019 ވަނަ އަހަރު އަމަލު ކުރަން ފެށި ފަހުން މިހާތަނަށް ހައްޔަރުކޮށްފައިވަނީ އަށް ބޯޓެއް ކަމަށާއި އޭގެ ތެރެއިން ފަސް ބޯޓަކަށް ފިޔަވަޅު އަޅާފައިވާ ކަމަށް ވިދާޅުވި އެވެ.
ރާއްޖެ އާއި އިންޑިއާއަކީ އެއް ބޯޑަރެއް ހިއްސާ ކުރާ ދެ ގައުމަށް ވުމުން، އެއް ގައުމުގެ އުޅަނދުތައް ނޭނގި ނަމަވެސް, އަނެއް ގައުމުގެ ސަރަހައްދަށް ވަދެވުމަކީ ހިނގާ ކަމެއް ކަމަށް މިނިސްޓަރު ވިދާޅުވި އެވެ.
"އަޅުގަނޑުމެންނަށް ޝަކުވާ ލިބޭ މަސްވެރިންގެ ކިބައިން އިންޑިއާގެ ބޯޓު ފަހަރު ރާއްޖޭގެ ސަރަހައްދަށް ވަންނަ ވާހަކަ އަދި ރާއްޖޭގެ ސަރަހައްދު ކައިރިއަށް އަންނަ ވާހަކަ، ހަމަ އެގޮތަށް އަޅުގަނޑުމެންގެ ބައެއް ދޯނި ފަހަރަށް ވެސް ވެސެލް ޓްރެކިން ހަރުކޮށްފައި ހުންނާތީ އިންޑިއާގެ ކަނޑުގެ ސަރަހައްދަށް ވަދެވޭ، އަދި ވަދެފަ ނިކުމޭ," މިނިސްޓަރު ވިދާޅުވި އެވެ.
