ސޯލް، ދެކުނު ކޮރެއާ (މޭ 22) - މަންކީޕޮކްސްއާ މެދު ހުރިހާ އެންމެން ވެސް ސަމާލުވުން މުހިއްމު ކަމަށާއި އެ ބަލި އިތުރަށް ފެތުރޭ ނަމަ ނަތީޖާ ގޯސްވެދާނެ ކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެ އެވެ.
މޭ މަހުގެ ކުރީކޮޅުން ފެށިގެން މަންކީޕޮކްސްގެ ކޭސްތަކެއް އުތުރު އެމެރިކާ އާއި ޔޫރަޕުން ރިޕޯޓުކޮށްފައިވެ އެވެ. އެހެންވެ، އެފްރިކާގެ ބައެއް ހިސާބުތަކުން ދޭތެރެ ދޭތެރެއިން ފެންނަ މި ބަލި އެހެން ހިސާބުތަކުގައި ހަލުވިކަމާއެކު ފެތުރެމުންދާ ކަމުގެ ބިރު އެބަ އޮތެވެ.
ރައީސް ކަމަށް ވަޑައިގެންނެވި ފަހުން ބައިޑެން އޭޝިއާއަށް ކުރައްވާ ފުރަތަމަ ދަތުރުފުޅުގައި ދެކުނުގެ ކޮރެއާގެ ވެރިރަށް ސޯލްގައި ހުންނަވައި ނޫސްވެރިންނަށް ވިދާޅުވީ އެމެރިކާގައި މަންކީޕޮކްސްގެ ހާލަތު އޮތް ގޮތާ ގުޅޭ ފުރިހަމަ މައުލޫމާތު މިހާތަނަށް ލިބިވަޑައިގެންފައި ނުވާ ކަމަށެވެ.
"އެކަމަކު އެއީ ހުރިހާ އެންމެން ވެސް ކަންބޮޑުވާން ޖެހޭ ކަމެއް،" ދެކުނު ކޮރެއާއަށް ދޫކުރައްވައި، ޖަޕާނުގެ ޓޯކިޔޯއަށް ފުރާވަޑައިގެންނެވުމުގެ ކުރިން ބައިޑެން ވިދާޅުވި އެވެ.
"އެ ބަލި ކަންބޮޑުވުމަކަށް ވަނީ އެއީ އިތުރަށް ފެތުރޭ ނަމަ އެކަމުގެ ނަތީޖާ ގޯސްވެދާނެތީ،" ބައިޑެން ފާހަގަކުރެއްވި އެވެ.
"އަޅުގަނޑުމެން މި ދަނީ އެ ބައްޔާ ގުޅިގެން ކުރިއަށް ދާނެ ގޮތެއް ކަނޑައެޅުމަށް ބުރަކޮށް މަސައްކަތް ކުރަމުން. އަދި އެ ބައްޔާ ދެކޮޅަށް އެއްވެސް ވެކްސިނެއް ހުރިތޯ ވެސް ބަލަމުން."
މީދަލާއި ރާމާމަކުނުގެ ބާވަތްތަކުން އާއްމުކޮށް ފެންނަ މަންކީޕޮކްސް މެދުތެރޭ އަދި ހުޅަނގު އެފްރިކާގައި ދިރިއުޅޭ އިންސާނުންގެ ގަޔަށް ފޯރައި، އެތައް ހާސް ބަޔަކަށް މީގެ ކުރިން އެ ބަލި ޖެހިފައިވެ އެވެ.
ހަފްތާތަކެއްގެ ތެރޭގައި ގިނަ މީހުން ބަލިން ފަސޭހަވި ނަމަވެސް، ވަރަށް މަދު ހާލަތްތަކުގައި ފުރާނަ ގެއްލިފައިވެ އެވެ.
ހޮނިހިރު ދުވަހު ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނީ މަންކީޕޮކްސް މީގެ ކުރިން ފެތުރިފައި ނުވާ ގައުމުތަކުން މިހާރު 92 ކޭސް ރިޕޯޓުކޮށްފައިވާ ކަމަށެވެ.
