ގައުމު މުޅިން އާ މިސްރާބަކަށް ގެންގޮސް، މޫސުމީ ބަދަލާ ގުޅޭ ސިޔާސަތަށް ބޮޑު އިންގިލާބެއް ގެނުވާނެ ކަމަށް އޮސްޓްރޭލިއާގެ އާ ލީޑަރު އެންތަނީ އަލްބަނީޒް ވައުދުވެވަޑައިގެންފި އެވެ.
ހޮނިހިރު ދުވަހު ބޭއްވި އިންތިހާބުން ކުރި ހޯއްދެވި އަލްބަނީޒްއަކީ ލޭބާ ޕާޓީގެ ކެންޑިޑޭޓެވެ. އެމަނިކުފާނު ވިދާޅުވީ އިއާދަކުރަނިވި ހަކަތައިގެ ގަދަ ބާރަކަށް އޮސްޓްރޭލިއާ ބަދަލު ކުރެވިދާނެ ކަމަށެވެ.
"އޮސްޓްރޭލިއާގެ ވިޔަފާރިތަކަށް ސާފުވާ ކަމަކީ މޫސުމީ ބަދަލާ ގުޅޭ ރަނގަޅު ފިޔަވަޅިތައް އެޅުމުން، ވަޒީފާތަކަށް ރަނގަޅުވެ އިގްތިސާދަށް ވެސް ރަނގަޅުވާކަން. އެހެންވީމާ ދުނިޔޭގެ މި މަސައްކަތުގައި ބައިވެރިވާން އަޅުގަނޑު ބޭނުން،" ބީބީސީއަށް ދެއްވި އިންޓަވިއުގައި އަލްބަނީޒް ވިދާޅުވި އެވެ.
ހޯމަ ދުވަހުގެ ވަގުތެއްގައި އަލްބަނީޒް ބޮޑު ވަޒީރުކަމުގެ ހުވާ ކުރައްވާނެ އެވެ. ނަމަވެސް ޕާލިމެންޓްގެ މެޖޯރިޓީ އެމަނިކުފާނުގެ ޕާޓީއަށް ލިބޭނެ ކަމެއް އަދި ސާފެއް ނޫނެވެ.
ފާއިތުވި ތިން އަހަރު އޮސްޓްރޭލިއާގައި ރެކޯޑް އަދަދުތަކުގެ ފެންބޮޑުވެ، ޖަންގަލީގައި ރޯވުމުގެ ހާދިސާތައް ހިނގާފައިވާ އިރު، މޫސުމީ ބަދަލަކީ ވޯޓުލީ މީހުން އެންމެ ކަންބޮޑުވާ އެއް މައްސަލަ އެވެ.
ކުރީގެ ބޮޑު ވަޒީރު ސްކޮޓް މޮރިސަން ވަނީ އޮސްޓްރޭލިއާ ރައްޔިތުންގެ ނިންމެވުމަށް މަރުހަބާ ވިދާޅުވެ، ބަލި ގަބޫލު ކުރައްވާ ކަމަށް ވިދާޅުވެފަ އެވެ.
ވޯޓު ގުނުމުގެ މަސައްކަތް އަދިވެސް ކުރިއަށްދާ އިރު، ޕާލިމެންޓުގެ ތިރިގޭގެ 151 ގޮނޑީގެ ތެރެއިން 76 ގޮނޑިއާ އެކު ލޭބާ ޕާޓީއަށް މެޖޯރިޓީ ލިބޭނެ ކަމެއް ކަށަވަރެއް ނޫނެވެ.
ޕޯސްޓް މެދުވެރިކޮށް ލާފައިވާ ތިން މިލިއަން ވޯޓު ގުނުމުގެ މަސައްކަތް ހޯމަ ދުވަހު ފަށާފައި ވާތީ، ރަސްމީ ނަތީޖާ އިއުލާން ކުރުމަށް އަދިވެސް ދުވަސްތަކެއް ނަގާނެ ކަމަށް ބެލެވެ އެވެ.
ލޭބާ ޕާޓީއަށް މެޖޯރިޓީ ނުލިބޭ ނަމަ، އާ ސަރުކާރުގެ ސިޔާސަތުތައް ބައްޓަން ކުރުމުގައި ގްރީންސް ޕާޓީ އަދި މިނިވަނުންގެ ގޮތުގައި ތިބޭ މެމްބަރުންގެ ނުފޫޒު ބޮޑު ވާނެ ކަމަށް ލަފާ ކުރެވެ އެވެ.
