ވޮޝިންޓަން، އެމެރިކާ (މޭ 22) - އެމެރިކާގައި ތުއްތު ކުދިންގެ ފޯމިއުލާ ނުވަތަ ކިރުގެ ދަތިކަން ވަރަށް ބޮޑަށް ދިމާވެފައި ވާތީ، ފޯމިއުލާ އުފައްދާ ކުންފުނި އެބޮޓްގެ ވެރިޔާ މައާފަށް އެދިއްޖެ އެވެ.
"މިކަމުގެ އަސަރުކޮށްފައިވާ ހުރިހާ އާއިލާއެއްގެ ކިބައިން އަޅުގަނޑުމެން މައާފަށް އެދެން،" އެބޮޓް ކުންފުނީގެ ސީއީއޯ ރޮބަޓް ފޯޑް ވޮޝިންޓަން ޕޯސްޓް ނޫހުގައި ޝާއިއުކުރި ލިޔުމެއްގައިވެ އެވެ.
އެމެރިކާގައި ފޯމިއުލާގެ ދަތިކަން ދިމާވާން ފެށީ ސަޕްލައި ކުރުމުގައި ހުރި ހުރަސްތަކެއް ސަބަބުން އަދި ބަލިމަޑުކަމާ ހެދި އެކަށީގެންވާ އަދަދަށް މުވައްޒަފުން ނެތުމުގެ ސަބަބުންނެވެ.
އޭގެ ފަހުން މިދިޔަ ފެބްރުއަރީ މަހު ދެ ތުއްތު ކުދިން މަރުވުމާ އެކު، އެމެރިކާގެ މިޝިގަންގައި ހުންނަ ފެކްޓްރީގައި އެބޮޓް ކުންފުނިން އުފެއްދި ހުރިހާ ޕްރޮޑަކްޓެއް މާކެޓުން އަނބުރާ ގެންދިޔަ އެވެ.
ޕްރޮޑަކްޓްތައް މާކެޓުން ނެގުމަށް ފަހު މިޝިގަން ފެކްޓްރީ ބަންދު ކުރި އެވެ. ފޯމިއުލާގެ ދަތިކަން އިތުރަށް ދިމާވާން ފެށީ ގިނަ އަދަދެއްގެ ޕްރޮޑަކްޓްތައް އަނބުރާ ގެންދިޔުމުންނެވެ.
އެބޮޓް ކުންފުނިން ބުނީ މާކެޓުން އަނބުރާ ގެންދިޔަ ފޯމިއުލާ ގަނެ، އެ ބޭނުން ކުރުމުގެ ސަބަބުން ބަލިވެ ހޮސްޕިޓަލުގައި އެޑްމިޓް ކުރި ކުދިންގެ އާއިލާތަކަށް ފަސް މިލިއަން ޑޮލަރުގެ ފަންޑެއް ހަމަޖައްސާނެ ކަމަށެވެ.
އޭގެ އިތުރުން އެބޮޓް ކުންފުނީގެ އެހެން ފެކްޓްރީތަކުގެ އުފެއްދުންތެރިކަން މަތިކޮށް އަވަސް ކުރުމަށް ގިނަ ފިޔަވަޅުތަކެއް އަޅަމުންދާ ކަމަށް ކުންފުނިން ބުންޏެވެ.
ޖޫން މަސް ނިމުމުގެ ކުރިން، ސަޕްލައި ކުރާ ވަރު މަތި ކުރެވޭނެ ކަމަށާއި ކުރިމަގުގައި މިފަދަ ކަމެއް ނުވާނެކަން ކަށަވަރު ކުރުމަށް ފިޔަވަޅު އަޅަމުންދާ ކަމަށް ކުންފުނިން ބުނެ އެވެ.
ފޯމިއުލާގެ ދަތިކަން ހައްލު ކުރުމަށް ހާއްސަ ފިޔަވަޅުތަކެއް އަޅަން ރައީސް ޖޯ ބައިޑެން ވަނީ ނިންމަވާފަ އެވެ. އެގޮތުން އެހެން ގައުމުތަކުން ފޯމިއުލާ އިމްޕޯޓް ކުރުމުގެ މަސައްކަތް މިދިޔަ ހަފްތާގައި ފެށި އެވެ.
