ގދ. ހޯނޑެއްދޫގައި ހޮރައިޒަން ފިޝަރީޒް އިން ތަރައްގީކުރަމުން އަންނަ ކޯލްޑް ސްޓޯރޭޖުގެ ހިދުމަތް މިއަދާ ހަމައަށް ވެސް ފެށިފައިނުވާތީ، އެ ކަމުގެ ކަންބޮޑުވުން ފާޅުކޮށް އެ ރަށުގެ ރައްޔިތުން ޕެޓިޝަނެއްގައި އިއްޔެ ސޮއިކުރަން ފަށައިފި އެވެ.
ހޮރައިޒަނުން އެ ރަށުގައި ކޯލްޑް ސްޓޯރޭޖެއް ގާއިމް ކުރުމުގެ މަސައްކަތް ފަށާފައިވަނީ 2005 ވަނަ އަހަރު އެވެ. އެ ތަނުގެ މަސައްކަތް ނުނިމި ލަސްވުމަކީ އެ ރަށު ރައްޔިތުންގެ އެންމެ ބޮޑު އެއް ކަންބޮޑުވުން ކަމަށް ޕެޓިޝަނުގައި ބުނެފައިވެ އެވެ.
"ކޯލްޑް ސްޓޯރޭޖް ހެދުމަށް 13 ހެކްޓަރުގެ ބިން ހޯނޑެއްދޫއިން ދޫކޮށްފައި އޮންނަތާ 16 އަހަރު ވެފައިވާއިރު، މި ތަން އޮޕަރޭޝަނަށް ނުގެނެވި އޮތުމަކީ ހޯނޑެއްދޫ އަދި ހުވަދު އަތޮޅު ރައްޔިތުންގެ ހައްގުތަކެއް ގެއްލިގެންދާ ކަމެއް ކަމުގައި ދެކެމެވެ. މި ދެންނެވި 13 ހެކްޓަރުގެ ބިމުން ހޯނޑެއްދޫ ރައްޔިތުންނަށް އެކަށީގެންވާ ކުއްޔެއް ނުލިބުމުގެ އިތުރަށް ހޯނޑެއްދޫ އެތައް ޒުވާނުންނަށް ފަހިވާން އޮތް އެތައް ވަޒީފާގެ ފުރުސަތު ވެސް ބަންދު ވެފައިވާ ކަމަށް ދެކެމެވެ." އެ ރަށު ރައްޔިތުން ސޮއި ކުރަމުން އަންނަ ޕެޓިޝަނުގައި ބުނެފައިވެ އެވެ.
މިހާތަނަށް އެއްވެސް ސަރުކާރަކުން މި ހިދުމަތް ހޯނޑެއްދޫ ރައްޔިތުންނާއި މަސްވެރިންނަށް ހޯދައި ދިނުމަށް އެކަށީގެންވާ މަސައްކަތެއް ކޮށްފައި ނުވާ ކަން ފާހަގަކޮށް މި ކަމަށް ހައްލެއް ހޯދައި ދިނުމަށް ޕެޓިޝަނުގައި އެދިފައިވެ އެވެ.
ޕެޓިޝަނުގައި އެ ރަށުގެ ރައްޔިތުން ވަނީ ތިން ހުށަހެޅުމެއް ހުށަހަޅާފަ އެވެ. އެއީ:
- ކޯލްޑް ސްޓޯރޭޖުގެ ބިމުގެ އެއްބަސްވުން ކައުންސިލަށް މައްޗަށް ބަދަލު ކުރުން
- ބިން ކައުންސިލާ ހަވާލުކޮށް، އެކަށީގެންވާ ކުއްޔަކަށް ކުލި ބޮޑު ކުރުން؛ މިހާރު އެ ތަނުގެ ކުއްޔަކީ 2 ލައްކަ ރުފިޔާ
- އެއް އަހަރު ތެރޭގައި ހިދުމަތް ދޭން ނުފެށިއްޖެނަމަ، ހޮރައިޒަންއާއެކު ވެފައިވާ އެއްބަސްވުން ބާތިލްކޮށް ކައުންސިލާ ހަވާލުކުރުން
މި ޕެޓިޝަނަށް ރަށުގެ ރައްޔިތުންގެ ބޮޑު ތަރުހީބެއް ލިބެމުން އަންނަ ކަމަށް އެ ރަށުގެ ކައުންސިލްގެ ރައީސް ހުސައިން ވާރިޝް ވިދާޅުވި އެވެ.
"ޕެޓިޝަންގައި ތިން ކަމަކަށް ގޮވާލާފައި ވަނީ، ރައްޔިތުންގެ ފަރާތުން ވެސް ބޮޑު ތަރުހީބެއް އަންނަނީ ލިބެމުން، ގިނަ ބަޔަކު ވަނީ [ޕެޓިޝަނުގައި] ސޮއިކޮށްފައި މިހާރު، ރައީސް އޮފީހަށް ހުށަހެޅުމަށް މަސައްކަތް ކުރަމުން މިދަނީ، އެޕޮއިންޓްމެންޓަކަށް އަޅުގަނޑުމެން މިހާރު ވާނީ އެދިފައި،" ވާރިޝް ވިދާޅުވި އެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާއަށް ފިޝަރީޒް މިނިސްޓަރު ޑރ. ހުސެއިން ރަޝީދު ހަސަން ހާޒިރުކޮށް ސުވާލުކޮށްފައިވާއިރު، ދާންދޫ ދާއިރާގެ މެންބަރު ޔައުގޫބް އަބްދުﷲ ވަނީ ކޯލްޑް ސްޓޯރޭޖު ހިދުމަތަށް ގެނެވޭނެ ތާރީހަކާ ގުޅޭ ގޮތުން ސުވާލުކުރައްވާފަ އެވެ.
މި ސުވާލަށް ޖަވާބު ދެއްވަމުން މިނިސްޓަރު ވިދާޅުވީ އެންމެ ފަހުން ތަން ނިންމާނެ ކަމަށް ބުނި ތާރީހަށް ވެސް ނިންމާފައިނުވާ ކަމަށާއި އެ ތަން ހުޅުވޭނީ "ކޮން ދުވަހަކު ކަމެއް މިވަގުތަކު ދެންނެވޭކަށް" ނެތް ކަމަށެވެ. އަދި މިފްކޯއިން މަސް ގަންނަ އަގުގައި އެ ތަން ހުޅުވައިގެން ހިދުމަތް ނުދެވޭނެ ކަމަށް ހޮރައިޒަން އިން ބުނާ ކަމަށް ވެސް މިނިސްޓަރު ވިދާޅުވި އެވެ.
"އެ ބޭފުޅުން ވިދާޅުވަމުން ގެންދަވަނީ މިހާރު މަހުގެ އަގު ހުރި ގޮތުން ތިމަންނަމެންނަށް މި ދެންނެވި، މި ފެސިލިޓީ ހަދައިގެން އަދި ނިންމި ނަމަވެސް، މަސްގަތުމުގެ އޮޕަރޭޝަނެއް ކުރިއަކަށް ނުގެންދެވޭނޭ."
