ޕެރިސް (މެއި 21) - ފްރާންސްގެ ޕީއެސްޖީގައި ހަތް އަހަރު ހޭދަކޮށްފައިވާ އާޖެންޓީނާގެ ވިންގް، އަންހެލް ޑި މާރިއާ މި ސީޒަނަށް ފަހު އެ ކްލަބު ދޫކޮށްލާނެ ކަމަށް ޕީއެސްޖީން ބުނެފި އެވެ.
ކުރިން ރެއާލް މެޑްރިޑާއި މެންޗެސްޓާ ޔުނައިޓަޑަށް ކުޅުނު ޑިމާރިއާ ،34، ޕީއެސްޖީ އަށް ކުޅޭ ފަހު މެޗަށް ވާނީ ފްރާންސް ލީގުގައި މިރޭ މެޓްޒްއާ ދެކޮޅަށް ޕީއެސްޖީ ކުޅޭ މެޗެވެ. މިއީ މި ސީޒަންގެ ފްރާންސް ލީގުގައި ޕީއެސްޖީ ކުޅޭ ފަހު މެޗެވެ.
ޕީއެސްޖީގެ ރައީސް ނާސިރު އަލް ހަލީފާ ވިދާޅުވީ ޑިމާރިއާ އަކީ ޕީއެސްޖީގެ ޖޯޒީގައި ވަރަށް ހިތްވަރާ އެކު ކުޅުނު ކުޅުންތެރިއެއް ކަމަށެވެ.
އާޖެންޓީނާ އާއި އިޓަލީގެ މީޑިއާ ރިޕޯޓްތައް ބުނާގޮތުން ޑި މާރިއާ ހުރީ ޕީއެސްޖީން އޭނާ އަށް އިތުރު ކޮންޓްރެކްޓެއް ނުދިނުމުން ހިތްހަމަނުޖެހިފަ އެވެ. މިދިޔަ އަހަރު ޕީއެސްޖީން ޑި މާރިއާ އަށް އާ ކޮންޓްރެކްޓެއް ދޭން މަޝްވަރާ ކުރި ނަމަވެސް އެއްބަސްވުމަކާ ހަމައަށް ނުދެވި، އެކަންކަން ދިގުލައި ގޮސް އެންމެ ފަހުން ޑި މާރިއާ އަށް ޖެހިފައިވަނީ ހިލޭ ޓްރާންސްފާއެއްގައި ކްލަބް ބަދަލުކުރުމަށެވެ.
ޕީއެސްޖީ އަށް ކުޅުނު 294 މެޗުގައި، ޑިމާރިއާ ވަނީ 91 ލަނޑު ޖަހައިފަ އެވެ. އަދި ޑި މާރިއާ ވަނީ އެ މެޗުތަކުގައި 118 ގޯލު ޖަހަން ފުރުސަތު ތަަނަވަސްކޮށްދީފަ އެވެ. ޕީއެސްޖީއާ އެކު ޑި މާރިއާ ވަނީ 14 ތަށި ހޯދައިފަ އެވެ. އޭގެ ތެރޭގައި ފަސް ލީގު ތަށި ހިމެނެ އެވެ.
މީޑިއާ ރިޕޯޓްތަކުން ބުނާގޮތުގައި، އަންނަ ސީޒަންގައި ޑިމާރިއާ ފެންނާނީ އިޓަލީގެ ޔުވެންޓަސް އިންނެވެ. ޔުވެންޓަސް އިން ވަނީ ޑި މާރިއާ އަށް ދެ އަހަރުގެ ކޮންޓްރެކްޓެއް ދޭން ނިންމައިފަ އެވެ.
މި އަހަރު ފަހު ކޮޅު ގަތަރުގައި ކުރިއަށްދާ ފީފާ ވޯލްޑް ކަޕަށް ފަހު ޑި މާރިއާ އާޖެންޓީނާ ގައުމީ ޓީމުން ރިޓަޔާކުރަން ވަނީ ނިންމައިފަ އެވެ.
