ވޮލީބޯލް އެސޯސިއޭޝަން ކަޕްގެ ޕްރިލިމިނަރީ ބުރުގެ ފުރަތަމަ ދުވަހުގެ މެޗުތަކުން މޮޅުވެ، އޮއްފު އެފްސީ އާއި ކުލަބު ވެމްކޯ ފެށުން ރަނގަޅު ކޮށްފި އެވެ.
ވޮލީބޯޅަ ސީޒަންގެ ފުރަތަމަ މުބާރާތް ކަމަށްވާ ވޮލީބޯޅަ އެސޯސިއޭޝަން ކަޕްގެ ކޮލިފައިން ބުރުގައި ވާދަކުރަނީ ހަތަރު ޓީމެވެ. އެއީ ކުލަބު ވެމްކޯ އާއި އޮއްފު އެފްސީގެ އިތުރުން އެސްޕިރޭޝަން ފޯ އޯލް އިނީޝިއޭޓިވް ސްޕޯޓްސް (އާއި ސްޕޯޓްސް) އަދި އައްޑޫ ސްޕޯޓްސް ކުލަބެވެ.
ކޮލިފައިން ބުރުގެ ފުރަތަމަ މެޗުގައި އޮފް އެފްސީ ނުކުތީ އާއި ސްޕޯޓްސްއާ ދެކޮޅަށެވެ. މި މެޗު ސީދާ ތިން ސެޓުން އޮފް އެފްސީ ކާމިޔާބުކުރީ ފަސޭހަކަމާ އެކު ސީދާ ތިން ސެޓުންނެވެ. މެޗުގެ ސެޓުތައް އެ ޓީމުން ގެންދިޔައީ 12-25، 17-25 އަދި 12-25 ންނެވެ. މެޗުގެ މޮޅު ކުޅުންތެރިޔާގެ މަގާމް ހޯދީ އޮއްފު އެފްސީގެ ހުސެއިން ސައީދު (ސެންޑީ) އެވެ.
ދެ ވަނަ މެޗުގައި އައްޑޫ ސްޕޯޓްސް ކުލަބު ނުކުތީ މި ސީޒަނަށް ރަނގަޅަށް ތައްޔާރުވެފައި އޮތް ކުލަބް ވެމްކޯއާ ދެކޮޅަށެވެ. އިސްމާއިލް ސާޖިދު (ކުޑަކާއްޓޭ) އާއި އަޝްފާގު އާދަމް (އައްކަޅޭ) އެޓޭކުގައި ލީޑު ކުރި ކުލަބް ވެމްކޯ މެޗު ކާމިޔާބު ސީދާ ތިން ސެޓުންނެވެ. ފުރަތަމަ ސެޓު ފަސޭހަކަމާ އެކު 25-12 އިން ވެމްކޯ އިން ކާމިޔާބުކުރި އެވެ. ދެ ވަނަ ސެޓުގެ ފަށައިގެން ވާދަވެރިކޮށް ދިޔައިރު، ސެޓުގެ މެދުތެރެއިން އައްޑޫ އިން ދެ ޕޮއިންޓްގެ ލީޑެއްވެސް ނެގި އެވެ. ނަމަވެސް ކުޑަކާއްޓޭގެ ބާރު ހަމަލާތަކާ އެކު މި ސެޓު 25-18 އިން އެޓީމުން ހޯދި އެވެ.
ކުރީގެ އެއް ވަނަ ވޮލީބޯޅަ ކުޅުންތެރިޔާ އިބްރާހިމް ނިޒާރު (ބޮޑޭ)ގެ ކޯޗުކަމުގެ ދަށުން ކުޅުނު ވެމްކޯ އިން މެޗުގެ ފަހު ސެޓު ކާމިޔާބުކުރީ 17-25 ންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ ވެމްކޯގެ ކުޑަކާއްޓޭ އެވެ.
އެސޯސިއޭޝަން ކަޕްގެ ޕްރިލިމިނަރީ ބުރުގެ ކުރިއަށްދާނީ ލީގު އުސޫލުންނެވެ. ލީގު ބުރުގެ މެޗުތައް ނިމޭއިރު ކުރި ހޯދާ ދެ ޓީމް އެސޯސިއޭޝަން ކަޕުގެ ފައިނަލް ބުރަށް ކޮލިފައިވާނެ އެވެ. އަދި މި އަހަރުގެ ގައުމީ ލީގުން ވެސް މި ދެ ޓީމަށް ޖާގަ ލިބޭނެ އެވެ.
އެސޯސިއޭޝަން ކަޕްގެ ލީގު ބުރުގެ މެޗުތައް މިރޭވެސް ކުޅޭނެ އެވެ. ފުރަތަމަ މެޗުގައި އާއި ސްޕޯޓްސް ނުކުންނާނީ އައްޑޫ ސްޕޯޓްސް ކުލަބާ ދެކޮޅަށެވެ. މިރޭ ކުޅޭ ދެ ވަނަ މެޗުގައި ކުލަބް ވެމްކޯ ނުކުންނާނީ އޮއްފު އެފްސީ އާ ދެކޮޅަށެވެ. މި ދެ ޓީމް ވެސް ކުޅުނު ފުރަތަމަ މެޗު ކާމިޔާބުކޮށްފައި ވާތީ، މިރޭގެ މެޗުން މޮޅުވާ ޓީމަކަށް އެސޯސިއޭޝަން ކަޕުން ޖާގަ ކަށަވަރު ވާނެ އެވެ.
