ޓިއުރިން (މެއި 21) - އިޓާލިއަން ލީގުގައި ރޭ ޓޮރީނޯ ދަނޑުގައި 3-0 އިން ރޯމާ މޮޅުވި މެޗުގައި އެ ޓީމުގެ އިނގިރޭސި ފޯވާޑް ޓަމީ އަބްރަހަމް ދެ ގޯލު ޖަހައި، 60 އަހަރުވީ ރެކޯޑެއް މުގުރާލައިފި އެވެ.
މި ސީޒަނުގައި ޗެލްސީ ދޫކޮށް ރޯމާ އަށް ބަދަލުވި އަބްރަހަމް އަކީ އިޓާލިއަން ލީގުގެ އެއް ސީޒަނެއްގައި އެންމެ ގިނަ ގޯލު ޖެހި އިނގިރޭސި ކުޅުންތެރިޔާ އެވެ. ރޭގެ މެޗުގައި ޖެހި ދެ ގޯލާ އެކު އަބްރަހަމް މި ފަހަރު ލީގުގައި ޖެހި ޖުމްލަ ގޯލުގެ އަދަދަކީ 17 އެވެ. ކުރިން އިޓާލިއަން ލީގުގައި އިނގިރޭސި ކުޅުންތެރިއަކު އެންމެ ގިނަ ގޯލު ޖެހީ 1961-1962 ވަނަ ސީޒަނުގަ އެވެ. އެ ފަހަރު އިޓާލިއަން ލީގުގައި 16 ގޯލު ޖަހައިގެން، މި ސީޒަނާ ހަމަ އަށް ރެކޯޑް ހަދާފައި އޮތީ، އޭރު އިންޓަ މިލާނަށް ކުޅުނު ގެރީ ހިޗެންސް އެވެ.
ސާޅީސް މިލިއަން ޑޮލަރުގެ ފީ އަކަށް ރޯމާއާ ގުޅުނު އަބްރަހަމް ވަނީ މުޅި ސީޒަން އެއްކޮށް ބަލާނަމަ ރޯމާ އަށް 51 މެޗުން 26 ގޯލު ޖަހައިދީފަ އެވެ.
ޓޮރިނޯ ދަނޑުގައި ރޭ ރޯމާ އިން ލީޑުނެގީ 33 ވަނަ މިނިޓްގައި އަބްރަހަމް ޖެހި ގޯލުންނެވެ. މިއީ ލޮރެންޒޯ ޕެލެގްރީނީ އޭރިއާތެރެއިން ހުސްކޮށްލާފައި އަބްރަހަމް އަށް ދިން ބޯޅައަކުން، ޓޮރީނޯ ޑިފެންޑަރެއް ކައިރިން ނައްޓާފައި އަބްރަހަމް ޖެހި ގޯލެކެވެ. ފުރަތަމަ ހާފު ނިމުމުގެ ކުރިން އަބްރަހަމް ވަނީ ރޯމާގެ ލީޑުފުޅާކޮށްދީފަ އެވެ. މިއީ ޕެނަލްޓީ އަކުން އަބްރަަހަމް ޖެހި ގޯލެކެވެ. މި ޕެނަލްޓީ ދިނީ އަބްރަހަމް އަށް ޓޮރިނޯގެ ކީޕަރު އެޓްރިޓް ބެރީޝާ ކުރި ފައުލަކަށެވެ.
ދެ ވަނަ ހާފުގައި ޓޮރިނޯގެ ޓޮމާސޯ ޕޮބޭގާ ގޯލެއް ޖަހަން ފޮނުވާލި ބޯޅަ ރޯމާގެ ކީޕަރު ރުއީ ޕެޓްރީޝިއޯ ވަނީ މަތަކޮށްފަ އެވެ. ރޯމާގެ ތިން ވަނަ ގޯލު ޖަހަން ޖޯޑަން ވެރެޓޫޓް ޖެހި ޝޮޓް ކީޕަރު ބެރީޝާ ވަނީ ހުއްޓުވައިފަ އެވެ.
ރޯމާ އިން ތިން ވަނަ ގޯލު ޖެހީ ވެސް ޕެނަލްޓީ އަކުންނެވެ. މެޗުގެ 78 ވަނަ މިިނިޓްގައި ނިކޯލަ ޒަނިއޯލޯ އަށް ކުރި ފައުލަަކަށް ދިން ޕެނަލްޓީ ޕެލެގްރީނީ ވަނީ ކާމިޔާބުކޮށްފަ އެވެ.
ހޯސޭ މޮރީނިއޯގެ ކޯޗުކަމުގައި ކުޅޭ ރޯމާ އިން ލީގު ނިންމާލީ ހަ ވަނައިގަ އޮވެ އެވެ. އެއީ 38 މެޗުން 63 ޕޮއިންޓާ އެކު އެވެ. ރޯމާ އަށް އަދި މި ސީޒަނުގައި ބާކީ އެއް މެޗު އެބައޮތެވެ. ބުދަ ދުވަހުގެރޭ ޔުއެފާ ކޮންފަރެންސް ލީގުގެ ފައިނަލުގައި ރޯމާ އިން ނުކުންނާނީ ނެދަލެންޑްސްގެ ފެޔަނޫޑާ ދެކޮޅަށެވެ.
