ކޮލޮމްބޯ، ސްރީލަންކާ (މޭ 20) - ސްރީލަންކާގެ ގިނަ ޕާޓީތައް ހިމެނޭ ސަރުކާރުގެ ކެބިނެޓަށް ހުކުރު ދުވަހު އިތުރު ނުވަ މިނިސްޓަރު އައްޔަނު ކުރި އިރު ވެސް ފިނޭންސް މިނިސްޓަރަކު ނެތެވެ.
އާ ބޮޑު ވަޒީރު ރަނިލް ވިކްރަމަސިންހަގެ އަމާޒަކީ ގިނަ ޕާޓީތައް ހިމެނޭ އެއްބައިވަންތަ ސަރުކާރަކާ އެކު ގައުމަށް ދިމާވެފައިވާ އިގްތިސާދީ، އިޖްތިމާއީ އަދި ސިޔާސީ ކާރިސާއަށް ހައްލު ހޯދުމެވެ.
އަލަށް އައްޔަނު ކުރި މިނިސްޓަރުން ވަނީ ރައީސް ގޮތަބަޔާ ރާޖަޕަކްސަގެ ކުރިފުޅުމަތީގައި މަގާމުގެ ހުވާ ކުރައްވާފަ އެވެ. އާ މިނިސްޓަރުންގެ ތެރޭގައި މައި އިދިކޮޅު އެސްޖޭބީ ޕާޓީގެ ދެ ޕާލިމެންޓް މެމްބަރުން ހިމެނެ އެވެ.
ސަރުކާރަށް ތާއީދު ކުރަން ނިންމި އެހެން އިދިކޮޅު ޕާޓީއެއް ކަމަށްވާ ސްރީލަންކާ ފްރީޑަމް ޕާޓީ (އެސްއެލްއެފްޕީ) އަށް ވަނީ އެއް މިނިސްޓްރީ ލިބިފަ އެވެ.
އިގްތިސާދީ ކާރިސާއިން އަރައިގަތުމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ އެހީ ހޯދުމަށް މަޝްވަރާތައް ފަށާފައިވީ ނަމަވެސް ފިނޭންސް މިނިސްޓްރީގެ މަގާމަށް ބޭފުޅަކު ހަމަޖައްސާފައެއް ނުވެ އެވެ.
ނަމަވެސް ބޮޑު ވަޒީރުގެ އޮފީހުން އޭއެފްޕީއަށް ބުނީ އެ މަގާމަށް އަންނަ ހަފްތާގައި ބޭފުޅަކު ހަމަޖައްސާނެ ކަމަށެވެ.
ބުރާސްފަތި ދުވަހު މަރުކަޒީ ބޭންކުގެ ގަވަރުނަރު ވިދާޅުވީ ފިނޭންސް މިނިސްޓަރަކު ނެތި ލަސްވުމަކީ އައިއެމްއެފްއާ އެކު ފަށާފައިވާ މަޝްވަރާ ލަސްވާނެ ސަބަބެއް ކަމަށެވެ.
