ލޮސް އެންޖެލިސް، އެމެރިކާ (މޭ 20) - މީގެ ހަ އަހަރު ކުރިން ފްލައިޓް އެޓެންޑެންޓަކަށް ޖިންސީ ފުރައްސާރަ ކުރި ކަމަށް ކުރާ ތުހުމަތު އެލޮން މަސްކް ދޮގުކޮށްފި އެވެ.
"އެއީ އެއްވެސް ހަގީގަތެއް ހުރި ވާހަކަތަކެއް ނޫން،" ދުނިޔޭގެ އެންމެ ބޮޑު މަހުޖަނު ކުރި ޓްވީޓެއްގައި ބުންޏެވެ. އޭނާ މިހާރު މަސައްކަތް ކުރަނީ 44 ބިލިއަން ޑޮލަރަށް ޓްވިޓާ ގަތުމަށެވެ.
މަސްކްގެ ޖިންސީ ފުރައްސާރައިގެ ވާހަކަ ރިޕޯޓު ކުރީ މިދިޔަ ބުރާސްފަތި ދުވަހު އިންސައިޑާ ނޫހުންނެވެ. އެ ނޫހުން ބުނީ 2018 ވަނަ އަހަރު މައްސަލަ ބޮޑުވުމުން، މަސްކްގެ ސްޕޭސް އެކްސް ކުންފުނިން އަންހެން މީހާއަށް 250،000 އެމެރިކާ ޑޮލަރު ދެއްކި ކަމަށެވެ.
އެ ނޫހުން ބުނީ މަސްކް ފްލައިޓް އެޓެންޑެންޓަށް ފުރައްސާރަ ކުރީ ޕްރައިވެޓް ޖެޓެއްގައި ލަންޑަނަށް ކުރި ދަތުރެއްގައި ކަމަށެވެ. އެ ދަތުރު މަތީގައި މަސާޖެއް ނަގަން ނިންމައި، އަންހެން މީހާގެ ހުއްދަ ނެތި ގައިގައި އަތްލައި، ޖިންސީ ގުނަވަން ދައްކައި ހެދި ކަމަށް އެ ނޫހުން ބުންޏެވެ.
އިންސައިޑާ ނޫހުން އެ ހަބަރު ރިޕޯޓު ކުރީ ފްލައިޓް އެޓެންޑެންޓްގެ ގާތް އެކުވެރިޔަކާ ހަވާލަދީ އެވެ.
"އަޅުގަނޑާ ދެކޮޅަށް ދިން މި ހަމަލާއަށް ނަޒަރު ހިންގަން ޖެހޭނީ ސިޔާސީ ލެންސަކުން. މިއީ އެ މީހުން އާއްމުކޮށް ވެސް އަމަލު ކުރާ ގޮތް،" މަސްކް ކުރި ޓްވީޓުގައި ބުންޏެވެ.
މަސްކުގެ ޓްވީޓުގައި "އެ މީހުން" ގެ ގޮތުގައި ނިސްބަތް ކުރީ ކޮން ބަޔަކަށް ކަމެއް ހާމައެއް ނުކުރެ އެވެ. ނަމަވެސް އެ ހަބަރު ރިޕޯޓު ކުރުމުގެ ކުރިން މަސްކް ބުނެފައި ވަނީ އެމެރިކާގެ ޑިމޮކްރެޓިކް ޕާޓީއަށް ތާއީދު ކުރުން ހުއްޓާލަން ނިންމައި، ރިޕަބްލިކަން ޕާޓީއަށް ބަދަލު ވާން ނިންމާފައިވާ ކަމަށެވެ.
