ސައުތު އޭޝިއަން ފުޓްބޯލް ފެޑެރޭޝަން (ސާފް) އިން ބާއްވާ 20 އަހަރުން ދަށުގެ ފުޓްބޯޅަ މުބާރާތް އަންނަ ޖުލައި މަހު އިންޑިއާގައި ބާއްވަން ތައްޔާރުވެއްޖެ އެވެ.
އެހެން ފަހަރުތަކުުގައި 19 އަހަރާއި 18 އަހަރުން ދަށަށް ބާއްވަމުން އައި ސާފް ޔޫތު މުބާރާތް މި ފަހަރު އިންޑިއާގެ ބުބަނޭޝްވަރުގައި ކުރިއަށްދާނީ އަންނަ ޖުލައި މަހުގެ 25 އިން އޮގަސްޓް ފަސް ވަނަ ދުވަހުގެ ނިޔަލަށެވެ. މި ފަހަރުގެ މުބާރާތުގައި ރާއްޖެ އާއި އިންޑިއާގެ އިތުރުން ދެން ބައިވެރިވީ ނޭޕާލް، ބަންގްލަދޭޝް އަދި ސްރީ ލަންކާ އެވެ. ޕާކިސްތާން، ފީފާގެ ސަސްޕެންޝަނެއްގައި އޮތްއިރު، ބޫޓާން ފުޓްބޯޅަ އޮތީ ހުއްޓުމެއްގަ އެވެ.
ސާފް، 20 އަހަރުން ދަށުގެ މުބާރާތަށް ތައްޔާރުވުމަށާއި ޔޫތު ފުޓްބޯޅަ ވަރުގަދަ ކުރުމަށް މި އަހަރު ތެރޭ އެފްއޭއެމުން ވަނީ 19 އަހަރުން ދަށުގެ ޔޫތު ފުޓްބޯޅަ މުބާރާތެއް ބާއްވައިފަ އެވެ. އެ މުބާރާތުން ފާހަގަކުރެވުނު ކުޅުންތެރިންނާ އެކު 20 އަހަރުން ދަށުގެ ޓީމެއްގެ ޕްރިމިލިނަރީ ސްކޮޑެއް އެކުލަވާލައި، ޓީމުގެ ޕްރެކްޓިސްތައް ކުރިއަށްގެންދަނީ ކޯޗު، އަހުމަދު ޝާކިރު (ޝާކިއްޓެ)ގެ އިރުޝާދުގެ ދަށުންނެވެ.
ކުރިން ގައުމީ ސީނިއާ ޓީމުގެ އެސިސްޓަންޓް ކޯޗަކަށް ހުރި ޝާކިއްޓެ، ވަނީ މީގެ ކުރިން 19 އަހަރުން ދަށުގެ ގައުމީ ޓީމަށް ކޯޗުކޮށްދީފަ އެވެ. ރާއްޖޭގައި ބާއްވާ ޔޫތު ޗެމްޕިއަންޝިޕް ފުޓްބޯޅަ މުބާރާތުގެ އެންމެ ކާމިޔާބު ކޯޗަކީ ވެސް ޝާކިއްޓެ އެވެ. ޝާކިއްޓެގެ ބެލުމުގެ ދަށުން ޓީމު ފަރިތަކުރަމުން އަންނައިރު، 20 އަހަރުން ދަށުގެ ޓީމުގައި ހިމެނޭ ބައެއް ކުޅުންތެރިން އަންނަނީ ސީނިއާ ގައުމީ ޓީމުގެ ޕްރެކްޓިހުގައި ވެސް ބައިވެރިވަމުންނެވެ.
މި ފަހަރުގެ ސާފް މުބާރާތުގެ ފޯމެޓް އޮތީ ފަސް ޓީމުގެ މެދުގައި ލީގު ބުރެއް ކުޅުމަށް ފަހު އެންމެ ގިނަ ޕޮއިންޓް ހޯދާ ދެ ޓީމެއް ފައިނަލަށް ދާ ގޮތަށެވެ. އެ ގޮތުން ރާއްޖެ ފުރަތަމަ މެޗުގައި ޖުލައި 25 ވަނަ ދުވަހު ކުޅޭނީ ނޭޕާލްއާ އެވެ. އޭގެ ހަަތަރު ދުވަސް ފަހުން، ޖުލައި 29 ވަނަ ދުވަހު ބަންގްލަދޭޝްއާ ކުޅޭނެ އެވެ. ދެ ދުވަހުގެ ބްރޭކަކަށް ފަހު، ޖުލައި 31 ގައި ނުކުންނާނީ ސްރީ ލަންކާއާ ދެކޮޅަށެވެ. އަދި ލީގު ބުރުގެ ފަހު މެޗުގައި އޮގަސްޓް ދެ ވަނަ ދުވަހު އިންޑިއާއާ ކުޅޭނެ އެވެ.
ނަވާރަ އަހަރުން ދަށުގެ ސާފް ޗެމްޕިއަންޝިޕެއް އެންމެ ފަހުން ބޭއްވީ 2019 ވަނަ އަހަރު ނޭޕާލްގެ ކަތުމަންޑޫގަ އެވެ. އެ ފަހަރު ރާއްޖޭން ވަނީ ބޫޓާން ބަލިކޮށް މުބާރާތުގެ ތިން ވަނަ ހޯދައިފަ އެެެވެ. މިއީ ސާފްގެ ޔޫތު މުބާރާތެއްގައި ޖޫނިއާ ޓީމެއްގެ އެންމެ ރަނގަޅު ނަތީޖާ އެވެ. އެ ފަހަރު ޓީމުގެ ކޯޗަކަށް ހުރީ މުހައްމަދު ޝާޒްލީ (ޝާޒް) އެވެ.
