ދިވެހި ސާފިން ލީގުގެ ދެ ވަނަ މުބާރާތް ކަމަށްވާ، "މުލީކޮޅު ރާޅުގަނޑު"ގެ، ޗެމްޕިއަންކަން އަހްމަދު އާގިލް (އަންމަޑޭ) ހޯދައިފި އެވެ.
"މުލީކޮޅު ރާޅުގަނޑު" ނަމުގައި ބާއްވާމުން އަންނަ މުބާރާތަކީ އެމްޓީސީސީ ސާފް ލީގުގެ ދެ ވަނަ މުބާރާތެވެ. މ. މުލީގައި ކުރިއަށްދިޔަ މި މުބާރާތުގެ ފިރިހެން އޯޕަން ބައިގައި 32 ރާޅާ އެޅުންތެރިން ވާދަކުރާއިރު، ޖޫނިއާ ބައިގައި 16 ރާޅާ އެޅުންތެރިން ވާދަކުރި އެވެ.
މ. މުލީގައި އިއްޔެ ނިމުނު މުބާރާތުގެ ފިރިހެން އޯޕަން ކެޓަގަރީގެ ޗެމްޕިއަންކަން އައްމަޑޭ ހޯދީ ފައިނަލުގައި ގދ.ގައްދޫގެ ނަޖާހު މުހައްމަދު (ކަބޯ) ބަލިކޮށްގެންނެވެ. މުބާރާތުގެ ޖޫނިއާ ބައިގެ ޗެމްޕިއަންކަން ހޯދީ މ.މުލީގެ ޝާނިފް ޝަފީގު އެވެ.
ރާޅާ އެޅުމުގެ ގައުމީ ފެންވަރުގެ ފުރަތަމަ ބޮޑު ކާމިޔާބީ ހޯދި ކ.ތުލުސްދޫގެ އައްމަޑޭ ފައިނަލުގައި ވަނީ 13.67ގެ ސްކޯއެއް ހޯދައިފަ އެވެ. ފައިނަލުން ބަލިވި ކަބޯ އަށް ލިބުނީ 9.24 ގެ ސްކޯ އެކެވެ.
ނަޖާހު ވަނީ ގައުމީ ސާފް ލީގުގެ ފުރަތަމަ މުބާރާތް ކަމަށްވާ ގދ.ގައްދޫގައ ކުރިއަށްދިޔަ "ކަޅެގަލެކޮޑާ"ގެ ފައިނަލުގައި ވެސް ވާދަކޮށްފަ އެވެ. އެ ފަހަރު ކަބޯ ފައިނަލުން ބަލިވީ ގައުމީ ޓީމުގެ އިސްމާއިލް ރަޝީދު (ސްމައިލީ) އަތުންނެވެ.
ޖޫނިއާ ބައިގެ ޗެމްޕިއަންކަން މުލީގެ އުންމީދީ ސާފަރު ޝާނިފް ހޯދީ މުލަކުގެ ޖުމާން މުހައްމަދު ބަލިކޮށްގެންނެވެ. ފައިނަލްގެ ހީޓްގައި ޝާނިފް ވަނީ 14.43 ޕޮއިންޓްގެ ސްކޯ އެއް ހޯދައިފަ އެވެ. ޖުމާނަށް ހޯދުނީ 11.54 ގެ ސްކޯ އެކެވެ. މި ހީޓުގެ ފަހުކޮޅަށް ދިޔައިރު ޖުމާން އޮތީ ކުރީގަ އެވެ. ޝާނިފް މޮޅުވީ އޭނާގެ ހަތް ވަނަ ރާޅުގައި ހޯދި 7.50 ގެ ސްކޯއެއް ހޯދައިގެންނެވެ.
އެއްވެސް ސާފަރަކު ބައިވެރި ނުވާތީ "މުލީކޮޅު ރާޅުގަނޑު"ގައި މި ފަހަރު އަންހެން އޯޕަން ބައެއް ކުރިއަށް ނުގެންދެ އެވެ.
ގައުމީ ސާފް ލީގުގެ ދެ ވަނަ މުބާރާތާ އެކު ގައުމީ ރޭންކިން އަށް ވަނީ ބަދަލުތަކެއް އައިސްފަ އެވެ. މި ގޮތުން ގައުމީ ޗެމްޕިއަން ހޫދު އަހުމަދު ވަނީ މިހާރު ރޭންކިންގެ ފަސް ވަނަ އަށް ވެއްޓިފަ އެވެ. ކުރިން އެއް ވަނައިގައި އޮތް ސްމައިލީ މިހާރު އުޅެނީ ހަތަރު ވަނައިގަ އެވެ. އެއް ވަނައިގައި އޮތީ ނަޖާހު މުހައްމަދު (ކަބޯ) އެވެ. ދެ ވަނައިގައި އައްމަޑޭ އޮތްއިރު، ފަސް ވަނައިގައި އޮތީ ޖައިލަމް ނިޒާރު އެވެ.
ގައުމީ ސާފް ލީގުގެ ތިންވަނަ މުބާރާތް ރ.ކިނޮޅަހުގައި އޮންނާނީ ޖުލައި މަހުގެ 5-9 އަށެވެ. ހަތަރު ވަނަ މުބާރާތް ހިންމަފުށީގައި އޮންނާނީ އޮކްޓޯބަރު 4-8 އަށެވެ. އަދި ފަހު މުބާރާތް ކަމަށްވާ "ރަންނަމާރި ޗެލެންޖް" މާލޭގައި އޮންނާނީ ނޮވެމްބަރު މަހުގެ 18-25 އަށެވެ.
