އިންޑިއަން އޯޝަން ޓޫނާ ކޮމިޝަން (އައިއޯޓީސީ)އިން ސައިންޓިފިކް ކޮމިޓީން ހުށަހަޅާފައިވާ ކެޗް ލިމިޓާ އެއް ހަމައެއްގައި ކަޅުބިލަމަސް ބާނާ މިންވަރު ހިފެހެއްޓުމަށް އެ ކޮމިޝަންގެ 26 ވަނަ ބައްދަލުވުމުގައި ރާއްޖޭން އިއްޔެ ގޮވާލައިފި އެވެ.
މި މަހުގެ 16 އިން ފެށިގެން ކުރިއަށްދާ މި ބައްދަލުވުމުގައި ރާއްޖޭން ވަނީ ތިން ހުށަހެޅުމެއް ހުށަހަޅާފަ އެވެ. މިގޮތުން ކަޅުބިލަމަސް ބާނާ މިންވަރު ހިފެހެއްޓުމަށް ހުށަހެޅުމުގެ އިތުރުން އިންޑިއާ ކަނޑުގެ ރީނދޫ އުރަހަ ކަންނެލީގެ އާބާދީ އާލާވުމަށް ފުރުސަތު ދިނުމުގެ ގޮތުން، މިހާރު އަޅައިފައިވާ ފިޔަވަޅުތައް އިތުރަށް ވަރުގަދަ ކުރުމަށާއި މޫސުމަށް އަންނަ ބަދަލުތަކުގެ ސަބަބުން ކަނޑުމަހުގެ އާބާދީއަށް ކުރާ ނޭދެވޭ އަސަރުތައް ދެނެގަތުމުގެގޮތުން ކުރާ މަސައްކަތްތައް އިތުރަށް ހަރުދަނާ ކުރުމަށް ރާއްޖޭން ވަނީ ގޮވާލާފަ އެވެ.
ރީނދޫ އުރަހަ ކަންނެލީގެ އާބާދީ އިތުރު ކުރުން
އިންޑިއާ ކަނޑުގައި ކުރެވޭ ރީނދޫއުރަހަ ކަންނެލީގެ މަސްވެރިކަން ކުރެވެމުންދަނީ އާބާދީއަށް ގެއްލުންވާނޭ މިންވަރަކަށް ކަމަށާއި، އިތުރު ފިޔަވަޅެއް ނާޅައިފިނަމަ މުސްތަގުބަލަށް ދެމެހެއްޓޭނެ މިންވަރަށްވުރެ އާބާދީ ދަށްވެފައިވާ ކަމަށް އައިއޯޓީސީގެ ސައިންޓިފިކް ކޮމިޓީއިން ވަނީ ލަފާ ދީފަ އެވެ. ފިޝަރީޒް މިނިސްޓްރީން ބުނީ މި ދަނޑިވަޅުގައި މެންބަރު ގައުމުތަކުން ގުޅިގެން ވީހާ ވެސް އަވަސް ފުރުސަތެއްގައި ހަރުދަނާ ފިޔަވަޅުތަކެއް އެޅުމަށް މި ބައްދަލުވުމުގައި ރާއްޖޭން ގޮވާލާފައިވާ ކަމަށެވެ.
"އައިއޯޓީސީގެ ސައިންޓިފިކް ކޮމިޓީގެ ލަފަޔާ އެއް ގޮތަށް، 2020 ވަނަ އަހަރު މެންބަރު ގައުމުތަކުން ރީނދޫއުރަހަ ކަންނެލި ބާނާފައިވާ މިންވަރަށް ވުރެ ކުރިއަށް އޮތް އަހަރުތަކުގައި ބާނާ ކަންނެލީގެ މިންވަރު 22 ޕަސަންޓަށް މަދުކުރުމަށް [ރާއްޖެއިން ގޮވާލާފައިވޭ]،" މިނިސްޓްރީން ނެރުނު ބަޔާނުގައި ބުނެފައިވެ އެވެ.
ހަމައެހެންމެ އޮޔާދާ ކަނދުފަތި ބޭނުންކޮށްގެން ކުރާ މަސްވެރިކަމުން ރީނދޫއުރަހަ ކަންނެލީގެ އާބާދީއަށް ކުރާ ނޭދެވޭ އަސަރުތަކަށް އަލި އަޅުވައިލައި، މި ބާވަތުގެ މަސްވެރިކަން ކުރުން ވަކި މުއްދަތަކަށް މަނާކޮށް، މި މަސްވެރިކަމުގައި ބޭނޭ ކުދި ރީނދޫއުރަހަ ކަންނެލީގެ މިންވަރު މަދުކުރުމަށް ވެސް ރާއްޖޭގެ ހުށަހެޅުމުގައި ހިމަނައިފައިވާނެ ކަމަށް ވެސް މިނިސްޓްރީން ބުންޏެވެ.
ކަޅުބިލަމަސް ބާނާ މިންވަރު ކޮންޓްރޯލް ކުރުން
އައިއޯޓީސީގެ ސައިންޓިފިކް ކޮމިޓީން ހުށަހަޅާފައިވާ ކެޗް ލިމިޓާ އެއް ހަމައެއްގައި ކަޅުބިލަމަސް ބާނާ މިންވަރު ހިފެހެއްޓުމަށް ގޮވާލައި އެކިއެކި މެންބަރު ގައުމުތަކުން މަސް ބާނާ މިންވަރަށް ގެންނަންޖެހޭ ބަދަލުތައް ވެސް ބަޔާންކޮށްފައިވާނެ ކަމަށް މިނިސްޓްރީން ބުނެފައިވެ އެވެ.
"މި ބަދަލުތައް ކަނޑައެޅުމުގައި ގައުމުތަކުން މީގެ ކުރިން ކަޅުބިލަމަސް ބާނާފައިވާ މިންވަރަށާއި، ގައުމުތައް ތަރައްގީވެފައިވާ މިންވަރަށާއި، މިނޫންވެސް އެހެނިހެން ކަންކަމަށް ރިއާޔަތްކޮށްފައިވޭ،" ބަޔާނުގައި ބުންޏެވެ.
މޫސުމަށް އަންނަ ބަދަލުތަކުގެ ސަބަބުން ކަނޑުމަހުގެ އާބާދީއަށް ކުރާ ނޭދެވޭ އަސަރުތައް ދެނެގަތުން
މި މަސައްކަތް އިތުރަށް ހަރުދަނާކޮށް، މިހާރަށްވުރެ ފުޅާ ދާއިރާއެއްގައި މަސައްކަތް ކުރުމަށް ރާއްޖޭން ގޮވާލާފައިވެ އެވެ.
މެންބަރު ގައުމުތަކުގެ މެދުގައި މޫސުމަށް އަންނަ ބަދަލުތަކާ ގުޅިގެން ކުރާ ދިރާސާތައް ކުރުމުގެ އަހުލިއްޔަތު އިތުރުކޮށް، ހާއްސަ ގޮތެއްގައި އެންމެ ކުޑަކޮށް ތަރައްގީވެފައިވާ ގައުމުތަކާއި، ތަރައްގީވަމުން އަންނަ ގައުމުތަކާއި، ރާއްޖެ ފަދަ ކުދި ޖަޒީރާ ގައުމުތަކުގައި މިފަދަ ދިރާސާތައް ކުރުމަށް ކުރެވޭ މަސައްކަތް ކުރި އެރުވުމަށް ރާއްޖޭން ބާރު އަޅާފައިވެ އެވެ.
