ކާބުލް، އަފްގާނިސްތާން (މޭ 18) - ޕާކިސްތާނުގެ ސަރުކާރާއި އެ ގައުމުގެ ތާލިބާނުންނާ ދެމެދު ސުލްހަ ގާއިމް ކުރުމަށް މެދުވެރިއެއްގެ ގޮތުގައި އަފްގާނިސްތާނުގެ ތާލިބާނުން ހަރަކާތްތެރި ވާން ފަށައިފި އެވެ.
މިދިޔަ އަހަރު އަފްގާނިސްތާނުގެ ވެރިކަން ތާލިބާނުންނަށް ލިބުނު ފަހުން، ޕާކިސްތާނުގައި ތެހްރީކޭ ތާލިބާން ޕާކިސްތާން (ޓީޓީޕީ) ގެ ހަމަލާތައް ވަނީ އިތުރުވެފަ އެވެ. ގިނަ ހަމަލާތައް ދެނީ އަފްގާނިސްތާނާއި ޕާކިސްތާން ގުޅޭ ބޯޑަރު ސަރަހައްދުގަ އެވެ.
ޓީޓީޕީއަކީ ޕާކިސްތާނުގައި އުފެދުނު ޖަމާއަތެއް ނަމަވެސް، އަފްގާނިސްތާނުގެ ތާލިބާނުންނާ ފިކުރު އެއް ގޮތެވެ. ޕާކިސްތާން ސަރުކާރުން ތުހުމަތު ކުރާ ގޮތުގައި ޓީޓީޕީގެ މެމްބަރުން އަފްގާނިސްތާނުގައި ފިލައި ތިބެ، ޕާކިސްތާނަށް ހަމަލާ ދިނުމުގެ ފުރުސަތު އަފްގާން ތާލިބާނުން ފަހިކޮށްދެ އެވެ.
"ޕާކިސްތާން ސަރުކާރާއި ތެހްރީކޭ ތާލިބާން ޕާކިސްތާންއާ ދެމެދު މަޝްވަރާ ކުރިއަށް ދިޔައީ ކާބުލްގައި،" އަފްގާން ސަރުކާރުގެ ތަރުޖަމާނު ޒަބީހުﷲ މުޖާހިދު ބުންޏެވެ.
"އަޅުގަނޑުމެންގެ އުއްމީދަކީ ދެ ފަރާތުން ވެސް ކެތްތެރިކަމާއި ދޫދިނުން އިސްކޮށް ކާމިޔާބު ސުލްހައިގެ މަޝްވަރާއަކަށް ފުރުސަތު ދިނުން،" އޭނާ ކުރި ޓްވީޓެއްގައި ބުންޏެވެ.
ފިތުރު އީދާ ދިމާކޮށް ހަމަލާ ބަދަލު ކުރުން ހުއްޓާލަން ވެފައިވާ އެއްބަސްވުން މޭ 30 ވަނަ ދުވަހާ ހަމައަށް ދިގުދަންމާލަން ނިންމާފައިވާ ކަމަށް ރިޕޯޓުތައް ބުނެ އެވެ.
މަޝްވަރާއާ ގުޅޭ ގޮތުން ޕާކިސްތާން ސަރުކާރުން އަދި ވަކި އެއްޗެއް ނުބުނެ އެވެ.
މިދިޔަ މަހު، އަފްގާނިސްތާނުގެ ސަރުކާރުން ތުހުމަތު ކުރި ގޮތުގައި ޕާކިސްތާން ސިފައިން ދިން ވައިގެ ހަމަލާއެއްގައި 47 މީހުން މަރުވި އެވެ. އެކަމާ ގުޅޭ ގޮތުން ވެސް ޕާކިސްތާނުން ސީދާ އެއްޗެއް ނުބުނެ އެވެ.
އަފްގާނިސްތާނުން ބުނީ އެ ހަމަލާއަކީ އަފްގާނިސްތާނާއި ޕާކިސްތާނާ ދެމެދު ރުޅިވެރިކަން އުފެދުމަށް މަގުފަހިވާ ފަދަ އަނިޔާވެރި ހަމަލާއެއް ކަމަށެވެ.
