ރައްޔިތުންގެ މަޖިލީހުގެ މި އަހަރުގެ ދެ ވަނަ ދައުރު މިހަފްތާގައި ފެށިފަހުން މިދިޔަ ދެދުވަހު ބޭއްވި ދެ ޖަލްސާ ފަދައިން މިއަދު ވެސް މަޖިލީހުން ބޭއްވީ ވަރަށް ކުރު ޖަލްސާއެކެވެ. މާ ގިނަ މަސައްކަތްތަކެއް ނެތި މިއަދުގެ ޖަލްސާ ވެސް ގަޑިއެއްހާ އިރުގެ ތެރޭގައި ނިންމައިލި އެވެ.
މިއަދުގެ ޖަލްސާއަށް އެޖެންޑާ ކޮށްފައި އޮތީ ދެ ބިލެއްގެ ފުރަތަމަ ކިޔުން އިއްވުމާއި މިނިސްޓާ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗާ ޑރ.ހުސައިން ރަޝީދު ހަސަންއާ ސުވާލުކުރުން އަދި ޕެންޝަން ފުރިހަމައަށް ދޭން ގޮވާލައި ތިމަރަފުށީ ދާއިރާގެ މެންބަރު ހުށަހެޅުއްވި މައްސަލަ އެކެވެ.
ސަރުކާރުގެ ފަރާތުން، ކޮމަންޑޫ ދާއިރާގެ މެންބަރު މުހައްމަދު ރާޝިދު ހުށަހެޅުއްވި، ކުނި މެނޭޖުކުރުމުގެ ބިލާއި ދަނގެތި ދާއިރާގެ މެންބަރު މުހައްމަދު ނާޒިމް ހުށަހަޅުއްވި، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނައުމުގެ ބިލުގެ ފުރަތަމަ ކިޔުން މިއަދު އިއްވި އެވެ.
މިއަދުގެ ޖަލްސާގައި ވަޒީރުންނާ ސުވާލުކުރުމުގެ ވަގުތުގައި މެމްބަރުން ސުވާލުކުރެއްވީ ފިޝަރީޒް މިނިސްޓަރު ޑރ. ހުސައިކން ރަޝީދު ހަސަނާ އެވެ. އއ. ރަސްދޫގައި ގާއިމްކުރާ އައިސްޕްލާންޓާ ގުޅޭ ގޮތުން ފިޝަރީޒް މިނިސްޓަރާ ސުވާލު ކުރެއްވީ ތޮއްޑޫ ދާއިރާގެ މެންބަރު ހަސަން ޝިޔާނެވެ. ޝިޔާންގެ ސުވާލަށް ޖަވާބު ދެއްވަމުން ހުސައިން ވިދާޅުވީ އެ މަސައްކަތް ނިމި ހިދުމަތް ދެވެން ފެށޭނީ އަންނަ އަހަރު ކަމަށް ލަފާ ކުރާ ކަމަށެވެ.
އިތުރު ސުވާލަށް ހުޅުވާލި ފުރުސަތުގައި ނުވަ މެންބަރަކު ސުވާލުކުރެއްވި އިރު، "ގޭދޮށު މަސްފެކްޓަރީ" ނާޅާތީ ކިޔަމުން އަންނަ ފާޑުކިޔުންތަކަށް މިނިސްޓަރު ރައްދު ދެއްވި އެވެ. އޭނާ ވިދާޅުވީ ސަރުކާރުން ތަންފީޒު ކުރަމުން އަންނަނީ ވަކި ޕާޓީއެއްގެ ސިޔާސަތުތައް ނޫން ކަމަށާއި ތަންފީޒު ކުރަނީ ރައީސް އިބްރާހިމް މުހައްމަދު ސޯލިހު ހުއްދަ ދެއްވާ މި ސަރުކާރުގެ ސިޔާސަތުތައް ކަމަށެވެ.
ޕެންޝަން ފުރިހަމައަށް ދިނުމަށް ގޮވާލައި ކިނބިދޫ ދާއިރާގެ މެމްބަރު އަބްދުﷲ ރިޔާޒު މިއަދުގެ ޖަލްސާއަށް މައްސަަލައެއް ހުށަހެޅުއްވި ނަމަވެސް މެމްބަރުން ފާސްކުރީ އެ މައްސަލަ ބަލައިނުގަތުމަށެވެ.
މިއަދުގެ ހާޒިރީ
- ހާޒިރުވެވަޑައިގެންނެވީ: 28 މެމްބަރުން
- ސަލާމުގައި: 04 މެމްބަރުން
ތަޅުމުގައި ކުރިއަށް ގެންދިޔަ ޖަލްސާ ކުރު ނަމަވެސް، ކޮމިޓީތަކުން ވަނީ މިއަދު މުހިންމު މަސައްކަތްތަކެއް ކޮށްފަ އެވެ. އެގޮތުން ހައިކޯޓުގެ ދެ ފަނޑިޔާރުން ކަމަށްވާ އަބްދުالله ހަމީދާއި އަބްދުއްރައޫފް އިބްރާހިމްގެ މައްސަލަ ޖޭއެސްސީން ނިންމީ އިޖުރާއަތާ ހިލާފަށް ކަމަށް ބުނެ، މައްސަލަ އަނބުރާ ފޮނުވާލުމަށް މަޖިލީހުގެ ޖުޑިޝަރީ ކޮމިޓީން ވަނީ ނިންމާފަ އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މިދިޔަ އަހަރު ބަޔަކު ދިން ބޮމުގެ ހަމަލާއާ ގުޅުވައި މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސައިން) އަށް ތުހުމަތުތަކެއް ކުރައްވައި ފޮނުއްވި މެސެޖްތައް ތަހުގީގަށް ދޭން އާއްމު ކޮމިޓީން ފާސްކުރުމަކީ ވެސް ކޮމިޓީ މަސައްކަތްތަކުގެ ތެރެއިން މިއަދު ނިންމި ފާހަގަކުރެވޭ ނިންމުމެކެވެ.
މިއަދުގެ ފޮޓޯ
އދގެ ސްޕެޝަލް ރެޕަޓުއަރ އޮން ޕްރޮމޯޝަން އެންޑް ޕްރޮޓެކްޝަން އޮފް ހިއުމަން ރައިޓްސް އެންޑް ފަންޑަމެންޓަލް ފްރީޑަމްސް، މިސް ފިއޮނުއަލާ ނި އޯލައިން،ރައީސް ނަޝީދާ ބައްދަލުކުރެއްވުން--ފޮޓޯ: މަޖިލިސް
މިއަދުގެ ކުއޯޓޭޝަން
ދިވެހި ސަރުކާރުން ތަންފީޒު ކުރާ ކޮންމެ ކަމެއް ކުރަނީ ދިވެހި ސަރުކާރުގެ ސިޔާސަތާ އެއްގޮތަށް، އެއީ ވަކި ޕާޓީއެއްގެ ސިޔާސަތު ކަމަށް އަޅުގަނޑަކަށް ގަބޫލެއް ނުކުރެވޭ، އެއީ އެމްޑީީޕީ ވެސް ހިމެނޭ ގޮތަށް އުފެދިފައި އޮތް ކޯލިޝަން ސަރުކާރުގެ ސިޔާސަތުތައް ތަންފީޒު ކުރަމުން މިދަނީ,- ފިޝަރީޒް މިނިސްޓަރު ޑޜ. ހުސައިން
