ހައިކޯޓުގެ ދެ ފަނޑިޔާރުން ކަމަށްވާ އަބްދުالله ހަމީދާއި އަބްދުއްރައޫފް އިބްރާހިމްގެ މައްސަލަ ޖޭއެސްސީން ނިންމީ އިޖުރާއަތާ ހިލާފަށް ކަމަށް ބުނެ، މައްސަލަ އަނބުރާ ފޮނުވާލުމަށް މަޖިލީހުގެ ޖުޑިޝަރީ ކޮމިޓީން ނިންމުމުން އެކަން ބަލައި ނުގެން ޖޭއެސްސީން އެ ކޮމިޓީއަށް ރައްދު ދީފި އެވެ.
ޖޭއެސްސީން މިއަދު ނެރުނު ދިގު ބަޔާނެއްގައި ބުނީ ފަނޑިޔާރު އަބްދުއްރައޫފް އިބްރާހީމް އަދި ފަނޑިޔާރު ޢަބްދުﷲ ހަމީދު، ކުރީގެ ސަރުކާރުން ސީދާ އެންގި އެންގުމުގެ މައްޗަށް، ރައްޔިތުންގެ މަޖިލީހުގެ އެއްވެސް ނިންމުމެއް ނެތި، ގާނޫނުއަސާސީއާ ޚިލާފަށް ފްލެޓް ހޯދި މައްސަލަ ކުރިއަށް ގެންގޮސް ތަހްގީގުކޮށް ކޮމިޝަނުން ނިންމައި ރައްޔިތުންގެ މަޖިލީހަށް ފޮނުވާފައިވަނީ ގާނޫނުގައި ބަޔާންކޮށްފައިވާ އެންމެހައި އިޖުރާއަތުތައް ފުރިހަމަވާ ގޮތަށް ކަމަށެވެ.
ޖުޑިޝަރީ ކޮމިޓީން މިއަދު ނިންމި ނިންމުމާ ހަމައަށް އައުމަށް އެކޮމިޓީގެ މެމްބަރުން ދެއްކެެވި ބައެއް ވާހަކަތަކަށް ޖޭއެސްސީގެ ބަޔާނުގައި ވަކިވަކިން ރައްދުދީފައި ވެ އެވެ. ކޮމިޓީގެ މިއަދުގެ ބައްދަލުވުމުގައި ކެންދޫ ދާއިރާގެ ޖޭޕީ މެމްބަރު އަލީ ހުސައިން ވިދާޅުވީ ދެ ފަނޑިޔާރުންގެ މައްޗަށް ހުށަހެޅުނު މައްސަލައިގެ ސީޣާއާ ނުގުޅޭ ކަންތައްތަކަށް ޖޭއެސްސީގެ ނިންމުމުގައި ރިއާޔަތްކޮށްފައިވާ ކަމަށެވެ. ޖޭއެސްސީގެ ބަޔާނުގައި އެ ވާހަކައަށް ރައްދު ދެމުން ބުނީ ދެ ފަނޑިޔާރުންނާ މެދު ބަލަން ނިންމި ސުލޫކީ މައްސަލައިގެ އިބާރާތުގައި އޮންނަނީ މައްސަލަ ރައްދުވާ ފަނޑިޔާރުން ގާނޫނުއަސާސީއާ ގާނޫނާ ހިލާފަށް އިނާޔަތެއް ލިބިގަނެ ބަލައިގެންފައިވާ ކަމަށެވެ.
"...މައްސަލައިގެ މައިގަނޑު ނިންމުމަކީ ވިހިހާސް ރުފިޔާގެ ޑައުން ޕޭމަންޓަކަށް ކުރީގެ ހައުސިންގ މިނިސްޓްރީ މެދުވެރިވެ މާލެއިން ފްލެޓް މި ދެ ފަނޑިޔާރުން ޤާނޫނުއަސާސީއާ ޚިލާފަށް ހޯދާފައިވާތީ، އެކަން އެ ގޮތުގެ މަތިން ހިނގާފައިވާކަން ސާބިތުވާ ކަމެވެ. މައްސަލައިގެ ސީޣާއިން ނުވަތަ މައުލޫއިން ބޭރުން އެއްވެސް ކަމެއް ތަހުގީގުކުރެވި ގޮތް ނިންމާފައި ނުވެއެވެ،" ޖޭއެސްސީގެ ބަޔާނުގައި ވެ އެވެ.
މައްސަލަ ޖޭއެސްސީއަށް އަނބުރައި ފޮނުވައިލަން ކޮމިޓީގެ މިއަދުގެ ބައްދަލުވުމުގައި ހުށަހަޅުއްވަމުން އަލީ ހުސައިން ނެންގެވި އަނެއް ނުކުތާ އަކީ ދެ ފަނޑިޔާރުންނާ މެދު ކޮމިޝަނުން ނިންމި ނިންމުމަށް ޖަވާބުދާރީވާން ފުރުސަތު ދީފައި ނެތް ކަަމަށް ވިދާޅުވެ ނެންގެވި ނުކުތާއެކެވެ. އެ ވާހަކައަށް ރައްދު ދެމުން ޖޭއެސްސީގެ ބަޔާނުގައި ބުނީ ދެ ފަނޑިޔާރުންނާ މެދު ތަހުގީގުކުރި ސުލޫކީ މައްސަލައިގައި، މައްސަލައިގެ ތަހުގީގު ރިޕޯޓް ފަނޑިޔާރުންނާ ހިއްސާކޮށް އެ ރިޕޯޓަށް ލިޔުމުން ޖަވާބުދަރީވުމަށް ފުރުސަތު ދީފައިވައިވާ ކަމަށެވެ. އެ ފުރުސަތުގެ ބޭނުން ފަނޑިޔާރުން ހިއްޕަވައި ޖަވާބުދާރީވެވަޑައިގެންނެވި ކަމަށް ވެސް އެ ބަޔާނުގައި ބުންޏެވެ.
"...އަދި ހަމައެހެންމެ، މައްސަލައާ މެދެ ގޮތެއް ނިންމުމުގެ ކުރިން ބާއްވަން ޖެހޭ ފަހުގެ އަޑުއެހުމަށް ހާޒިރުވެ ޖަވާބުދާރީވުމުގެ ފުރުސަތު ވެސް އެ ދެ ފަނޑިޔާރުންނަށް ދެވިފައިވެއެވެ،" ޖޭއެސްސީގެ ބަޔާނުގައި ވެ އެވެ.
އެހެން ނަމަވެސް މައްސަލަ ނިންމުމަށް ފަހު ފަައިނަލް ރިޕޯޓަށް ޖަވާބުދާރީވާން ފުރުސަތު ދިނުމަކީ ޖޭއެސްސީގެ ގާނޫނަށް އެންމެ ފަހުން ގެނައި އިސްލާހުން އެ ކޮމިޝަނަށް ލާޒިމުކުރާ ކަމެއް ނޫން ކަމަށް ވެސް އެ ބަޔާނުގައި ބުންޏެވެ. އެ އިސްލާހުގައިވާ އިޖުރާއަތްތަކާ އެއްގޮތަށް ފަނޑިޔާރުން ވަކިކުރަން މީގެ ކުރިން މަޖިލީހަށް ހުށަހެޅުމުން ކޮމިޓީން އެކަން ހަމަ އެގޮތަށް ނިންމައި މަޖިލީހުގެ ތަޅުމުން ފާސްކޮށްފައިވާ ކަމަށް ވެސް އެ ބަޔާނުގައި ބުންޏެވެ.
