ހައިކޯޓުގެ ދެ ފަނޑިޔާރުން ކަމަށްވާ އަބްދުالله ހަމީދާއި އަބްދުއްރައޫފް އިބްރާހިމްގެ މައްސަލަ ޖޭއެސްސީން ނިންމީ އިޖުރާއަތާ ހިލާފަށް ކަމަށް ބުނެ، މައްސަލަ އަނބުރާ ފޮނުވާލުމަށް މަޖިލީހުގެ ޖުޑިޝަރީ ކޮމިޓީން މަސައްކަތް ކުރަމުންދާއިރު, އެއީ ހަގީގަތާ ހިލާފު ވާހަކައެއް ކަމަށް ޖޭއެސްސީން ބުނެފި އެވެ.
ގާނޫނުގައި އޮންނަ ގޮތުން, ފަނޑިޔާރަކު މަގާމުން ވަކި ކުރެވޭނީ އެ ކަމަށް އެދި ޖޭއެސްސީން މަޖިލީހަށް ހުށަހެޅުމުން މައްސަލަ ކޮމިޓީގައި ދިރާސާކޮށް ތަޅުމުގައި ބަހުސްކުރުމަށްފަހު ވޯޓަށް އަހައިގެންނެވެ. ކޮމިޓީން ބަލާނީ ޖޭއެސްސީން ގާނޫނީ އިޖުރާއަތްތައް ފުރިހަމަ ކުރިތޯ ނުވަތަ ނޫންތޯ އެކަންޏެވެ.
އެ މައްސަލާގައި މިއަދުގެ ކޮމެޓީގައި ފާހަގަ ކޮށްފައި ވަނީ ދެ ފަނޑިޔާރުން ވަކިކުރުމުގެ މައްސަލަ ބަލާފައިވަނީ އިޖުރާރީ ގޮތުން ފުރިހަމަ ކުރަން ޖެހޭ ކަންކަން ފުރިހަމަ ނުކޮށް ކަމަށެވެ. އެހެންކަމުން އެ މައްސަލަ އަލުން ބެލުމަށް ޖޭއެސްސީއަށް އެންގުމަށް ވެސް ވަނީ ފާސްކޮށްފަ އެވެ.
ޖޭއެސްސީން މިއަދު "އަދަދު"އަށް ބުނި ގޮތުގައި ހައިކޯޓުގެ ދެ ފަނޑިޔާރުންގެ މައްސަލާގައި ވެސް އަމަލުކޮށްފައިވަނީ މީގެކުރިން ވެސް އެ ކޮމިޝަނުން އަމަލުކުރަމުންދާ ގޮތަށެވެ. މީގެކުރިން ވެސް އެ އިޖުރާއަތުގެ ދަށުން އެ ކޮމިޝަނުން ބަލައި, ފިޔަވަޅު އަޅަން އެންގި މައްސަލަތަކުގައި އެގޮތަށް މަޖިލީހުން އަމަލުކޮށްފައިވާ ކަމަށް ޖޭއެސްސީން ފާހަގަކުރި އެވެ.
ނަމަވެސް, މަޖިލީހުގެ ކޮމިޓީގެ ނައިބު މުގައްރިރު އަދި ފޮނަދޫ ދާއިރާގެ މެންބަރު މޫސާ ސިރާޖް "އަދަދު"އަށް ވިދާޅުވީ ފަނޑިޔާރުން ވަކިކުރަން ނިންމުމުގައި ޖޭއެސްސީން އިޖުރާއަތްތައް ފުރިހަމަނުވާ ކަމުގެ ޝަކުވާގެ އިތުރަށް ތަހުގީގު ރިޕޯޓަށް ބަދަލުތަކެއް ގެނެސްފައިވާ ކަމުގެ ޝަކުވާ ވެސް ކޮށްފައިވާ ކަމަށެވެ.
ދެ ފަނޑިޔާރުން ވަކިކުރަން ޖޭއެސްސީން ފޮނުވީ ފަނޑިޔާރުންތަކަކަށް ފްލެޓްތަކެއް ދިން މައްސަލައެއްގަ އެވެ. ޖޭއެސްސީން ކުރިން ބުނެފައިވާ ގޮތުން، އެ ދެފަނޑިޔާރުންނަށް ހައުސިން ހަމަޖެއްސީ ދައުލަތުން ބަލާ އާންމު އުސޫލުން ބޭރުންނެވެ. އެހެންވެ ފްލެޓްތަކާ އެ ފަނޑިޔާރުން ހަވާލުވީ ގާނޫނީ އަސާސީއާ ހިލާފަށް ކަމަށް ނިންމި އެވެ.
ހައިކޯޓުގެ ދެ ފަނޑިޔާރަކު ވަކިކުރަން ހުށަހަޅަން ޖޭއެސްސީން ނިންމިއިރު, މި މައްސަލަ ކޮމިޝަނަށް ހުށަހެޅީ ދާދި ފަހުން ހައި ކޯޓުގެ ފަނޑިޔާރު ކަމުން އިސްތިއުފާ ދެއްވި އަލީ ސަމީރު ވެސް ހިމެނޭ ގޮތަށެވެ.
ވަކިކުރަން ނިންމި ފަނޑިޔާރުންގެ ތެރެއިން ފަނޑިޔާރު ރައޫފަކީ ޖޭއެސްސީން އުފައްދާފައިވާ ފަނޑިޔާރުންގެ އިސްތިއުނާފް މަޖިލީހުގައި ވެސް އިންނަވާ ފަނޑިޔާރެވެ. ސުޕްރީމް ކޯޓުގެ އާ ބެންޗަށް ރައޫފް އައްޔަން ކުރަން ޖޭއެސްސީން ލަފާ ދެއްވިޔަސް، ސުލޫކީ މައްސަލައެއް އޮތުމުން އެ ނަން އޭރު ނުފޮނުވަ އެވެ.
ފަނޑިޔާރު ހަމީދަކީ, ހައިކޯޓުގައި މިވަގުތު ހުންނެވި އެންމެ ގިނަ ދުވަސްވީ ފަނޑިޔާރެވެ. އެގޮތުން, ފަނޑިޔާރު ހަމީދު ހައިކޯޓުގެ ފަނޑިޔާރު ކަމުގެ ހުވާ ކުރައްވާފައިވަނީ 2007 ވަނަ އަހަރު އެވެ. ފަނޑިޔާރު ހަމީދު ވަނީ މީގެކުރިން ޖޭއެސްސީގެ މެންބަރުކަން ވެސް ކުރައްވާފަ އެވެ.
