ރައްޔިތުންގެ މަޖިލީހުގެ މި އަހަރުގެ ދެ ވަނަ ދައުރު އިއްޔެ ފަށާފައިވާއިރު، މިއަދު ބޭއްވި ދެވަނަ ޖަލްސާ ވެސް ވަރަށް އަވަހަށް ނިންމައިލީ "ކުރާނޭ މަސައްކަތެއް" ނެތިގެންނެވެ. މިއަދުވެސް އޮތީ މިނިސްޓަރު ހާޒިރުކޮށް ސުވާލުކުރުމެވެ.
މިއަދުގެ މަޖިލީހުގެ ޖަލްސާއަށް ހާޒިރުކުރީ ހައުސިން އަދި ޕްލޭނިން މިނިސްޓަރު މުހައްމަދު އަސްލަމެވެ. އޭނާ ހާޒިރުކުރީ ދެ މަޝްރޫއަކާ ގުޅޭ ގޮތުން ދެން މެންބަރުން ސުވާލު ކުރެއްވުމަށެވެ.
ފެލިދޫ ދާއިރާގެ މެންބަރު އިބްރާހީމް ފަޒުލް ރަޝީދު އަސްލަމާ ސުވާލުކުރެއްވީ ފެލިދޫ ގިރާ ސަރަހައްދު ހިމާޔަތް ނުކުރެވި ލަސްވާ ސަބަބާ ގުޅޭ ގޮތުންނެވެ. އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ އެ މައްސަލަ ލަސްވަނީ ކައުންސިލަށް ފޮނުވާފައިވާ ކޮންސެޕްޓަށް މިހާތަނަށް ޖަވާބެއް ލިބިފައި ނުވާތީ ކަމަށެވެ.
އަސްލަމާ މިއަދު ކުރެއްވި ދެ ވަނަ ސުވާލަކީ ގއ. ބިލިނގިލި ބަނދަރުގެ އެއްގަމު ތޮށްޓާއި ބޭރު ތޮށީގެ މަސައްކަތް ލަސްވާތީ ވިލިނގިލި ދާއިރާގެ މެންބަރު ސައުދު ހުސައިން ކުރެއްވި ސުވާލެވެ. އަސްލަމް ވިދާޅުވީ އެ މަޝްރޫއު ކުރިއަށް ގެންދާ ގޮތާ މެދު މިނިސްޓްރީއާއި ރަށު ކައުންސިލާ ދެމެދު ހިޔާލު ތަފާތުވުމެއް އުޅޭ ކަމަށާއި އެހެންނަމަވެސް އެ ކަން ހައްލު ކުރުމުގެ މަސައްކަތް ކުރިއަށްދާ ކަމަށެވެ.
އޭގެ އިތުރުން އެހެނިހެން ސުވާލުގެ ގޮތުގައި 17 މެންބަރަކު ސުވާލުކުރެވި އެވެ.
މިއަދުގެ ހާޒިރީ
- ހާޒިރުވެވަޑައިގެންނެވީ 29 މެންބަރުން
- ސަލާމުގައި 4 މެންބަރުން
ދުވަހުގެ ފޮޓޯ
އިމްތިޔާޒް އަދި ސުލޫކު ކޮމިޓީގެ ފުރަތަމަ ބައްދަލުން-- ފޮޓޯ: މަޖިލިސް
މިނިސްޓަރު އަސްލަމާ ސުވާލުކުރުމަށް ފަހު މިއަދުގެ ޖަލްސާ ނިންމައިލީ ގަޑިއެއްހާއިރުގެ ތެރޭގަ އެވެ. މަޖިލީހުގެ ރައީސް މުހައްމަދު ނަޝީދު ވިދާޅުވީ މިއަދު ވެސް މަޖިލީހުގެ ތަޅުމުގައި "ކުރާނެ މަސައްކަތެއް" ނެތް ކަމަށެވެ. އެހެން ނަމަވެސް މަޖިލީހުގެ ކޮމިޓީގެ މަސައްކަތްތައް އޭގެ ފަހުން ވެސް ކުރިއަށް ދިޔަ އެވެ.
ކޮމިޓީތަކުން މިއަދު ކުރި މުހިންމު މަސައްކަތްތަކުގެ ތެރޭގައި އިމްތިޔާޒާއި ސުލޫކު ކޮމިޓީގެ ފުރަތަމަ ޖަލްސާ ބާއްވާ، ނަޝީދު އަވަހާރަކޮށްލަން މިދިޔަ އަހަރު ބަޔަކު ދިން ބޮމުގެ ހަމަލާއާ ގުޅުވައި އެ މަނިކުފާނު ހެންވޭރު ދެކުނު ދާއިރާގެ މެމްބަރު ހުސައިން ޝަހީމް (އަނދުން ހުސައިން)އަށް ކުރައްވާފައިވާ ތުހުމަތު ބަލަން އެ ކޮމިޓީން ވަނީ ފާސްކޮށްފަ އެވެ.
ދުވަހުގެ ކޯޓޭޝަން
ޕްލޭނިން މިނިސްޓަރުގެ ހައިސިއްޔަތުން ހަމަގައިމު ވެސް އަޅުގަނޑު ތަރުހީބުދޭ ކަމެއް ވެސް ނޫން، އަޅުގަނޑު ބާރު އަޅާ ކަމެއް ވެސް ނޫން، ސަރުކާރުގެ ސިޔާސަތެއް ވެސް ނެތް އެ މީހުން [ސަރުކާރުގެ ކުންފުނިތައް] ކޮންސްޓްރަކްޝަން އިންޑަސްޓްރީ ތެރެއަށް ވެއްދުމަކަށް،--- ހައުސިން މިނިސްޓަރު އަސްލަމް
