ރާއްޖޭގައި ގިނަ އަދަދެއްގެ ރަށްތަކެއް ގިރަމުން އަންނަ ނަމަވެސް މައްސަލައަށް ހައްލެއް ނުލިބި ލަސްވަނީ އެ މަސައްކަތަށް ކޮންޓްރެކްޓަރުން ލިބުމުގެ ދަތިކަމުގެ ސަބަބުން ކަމަށް ހައުސިން އަދި ޕްލޭނިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
ޕްލޭނިން މިނިސްޓްރީން ކުރިއަށް ގެންދާ ދެ މަޝްރޫއުއަކާ ގުޅޭގޮތުން ސުވާލުކުރުމަށް މިނިސްޓަރު މަޖިލީހަށް މިއަދު ހާޒިރުކޮށްފައިވާއިރު، އިތުރު ސުވާލުކުރަން ލިބުނު ފުރުސަތުގައި ގިނަ މެންބަރުން ވަނީ އެ މެންބަރުންގެ ދާއިރާތަކުގައި ރަށް ގިރުމުގެ މައްސަލައަށް ހައްލެއް ނުލިބޭ ކަމުގެ ޝަކުވާ ކުރައްވާފަ އެވެ.
"މޮޅަދޫގެ ބަނދަރު ހެދުމާއި ހުޅަނގު މޫސުމާއެކު އާދަޔާ ހިލާފަށް ރަށް ގިރަމުން ދޭ، މިނިސްޓަރު ފާހަގަކުރެއްވި ކުއްލިއަކަށް އެ ކަންކަމަށް އެޓެންޑު ކުރެއްވުމުގަ ދަތިތަކެއް ހުންނަ ކަމަށް،" އިހަވަންދޫ ދާއިރާގެ މެންބަރު މުހައްމަދު ޝިފާއު ވިދާޅުވި އެވެ.
ޝިފާއު ވަނީ އެ ދަތިތަކަކީ ކޮބައިތޯއާއި އެ ކަން ހައްލު ކުރުމަށް މަޖިލީހުން ކޮށްދެވޭނީ ކޮން ކަމެއްތޯ ސުވާލުކުރައްވާފަ އެވެ.
އެ ސުވާލަށް ޖަވާބު ދެއްވަމުން އަސްލަމް ވިދާޅުވީ ގިރާ ކަމަށް 40 ރަށް ލިސްޓު ކޮށްފައި އޮތް އިރު، ހައްލު ކުރުމަށް ދިމާވާ އެންމެ ބޮޑު ގޮންޖެހުމަކީ ގާބިލް ކޮންޓްރެކްޓަރުންގެ އަދަދު މަދުވުން ކަމަށެވެ. އެގޮތުން އެމްޓީސީސީގެ އިތުރުން ދެން އޮންނަނީ "ހަތަރު ފަސް ކުންފުންޏެއް" ކަމަށް މިނިސްޓަރު ވިދާޅުވި އެވެ.
"ޑައިރެކްޓް އެވޯޑުގެ ގޮތުގައި މި މަސައްކަތް ކުރެވެން އޮންނަނީ އެންމެ ކުންފުންޏަށް، އެއީ އެމްޓީސީސީ. ދެން އެމްޓީސީސީއަށް ފުނިފުނިން ކޮންޓްރެކްޓް ދިން ކަމަށް ވިޔަސް އެ މަސައްކަތް ނުއެއް ހިންގޭނެ އެ މީހުންނަކަށް، ދެވިދާނެ، އަޅުގަނޑަށް ވަރަށް ފަސޭހަ ވާނެ ހަމަ ޑައިރެކްޓް އެވޯޑު ކޮށްފައި ދީފާނަން،" އަސްލަމް ވިދާޅުވި އެވެ.
މިނިސްޓަރު ވިދާޅުވީ ކޮންމެ ކުންފުންޏަކާ ވެސް ކޮންޓްރެކްޓުތައް ހަވާލުކުރަނީ މާލީ ގާބިލް ކަމަށް ބަލާފައި ކަމަށާއި މިހާރު ހުރި ހުރިހާ ކުންފުންޏަކަށް ވެސް ހުރީ އެ އަދަދަށް މަޝްރޫއުތައް ހަވާލުކުރެވިފައި ކަމަށެވެ.
މި މައްސަލަ ހައްލު ކުރުމަށް ގާނޫނާއި ގަވައިދުތަކަށް ގެންނަން ޖެހޭ ބަދަލުތަކެއް ހުރިކަން ތަފްސީލަށް ވަޑައިނުގަންނަވާ މިނިސްޓަރު ފާހަގަކުރެއްވި އެވެ.
