ޓިއުރިން (މެއި 17) - ޔުވެންޓަސް ދަނޑުގައި ޕައޮލޯ ޑިބާލާ އާއި ޖިއޮޖިއޯ ކިއެލީނީ ކުޅުނު ފަހު މެޗުގައި ރޭ، އިޓާލިއަން ލީގުގައި ޔުވެންޓަސް އާއި ލާޒިއޯ ފަހު ވަގުތު 2-2 އިން އެއްވަރުވެއްޖެ އެވެ.
ޔުވެންޓަސް އިން އާ ކޮންޓްރެކްޓެއް ދޭން ކުރި މަސައްކަތުގައި އެއްބަސްވުމަކަށް ނާދެވި ޑިބާލާ ވަނީ އެ ކްލަބް ދޫކޮށްލަން ނިންމައިފަ އެވެ. ހަތް އަހަރު ޔުވެންޓަސް އަށް ކުޅެދިން ޑިބާލާ ފަހަކަށް އައިސް އެ ޓީމުގެ ކެޕްޓަން ބޭންޑް އަޅައިގެން ގިނަ މެޗުތަކެއް ކުޅުނުއިރު، ޔުވެންޓަސްއާ އެކު އޭނާ ވަނީ 12 ތަށި ހޯދައިފަ އެވެ. އޭގެ ތެރެއިން ފަސް ތަށްޓަކީ އިޓާލިއަން ލީގެވެ. ޑިބާލާ، 28، ވަނީ ޔުވެންޓަސް އަށް 291 މެޗުން 115 ގޯލު ޖަަހައިފަ އެވެ.
ސަތާރަ އަހަރު ކޮށްފައި، ޔުވެންޓަސް ދޫކޮށްލަން ނިންމި ކިއެލީނީ ރޭގެ މެޗުގައި ވަނީ 18 ވަނަ މިނިޓްގައި ބަދަލުކޮށްފަ އެވެ. ފިއޮރެންޓީނާ ދޫކޮށް 2005 ވަނަ އަހަރު ޔުވެންޓަސްއާ ގުޅުނު ކިއެލީނީ ވަނީ އެ ޓީމާ އެކު ނުވަ ލީގު ތަށްޓާއި ފަސް އިޓާލިއަން ކަޕް ކާމިޔާބުކޮށްފަ އެވެ. އިޓަލީ ގައުމީ ޓީމުން މިދިޔަ އަހަރު ރިޓަޔާކުރި އުމުރުން 37 އަހަރުގެ ކިއެލީނީ ދެން ކުޅޭނެ ކްލަބެއް އަދި ނުނިންމަ އެވެ.
ޔުވެންޓަސް ދަނޑުގައި ރޭ މެޗުގެ ކުރީކޮޅުގައި ލީޑުނެގުމާ ގާތަށް ޖެހިލީ ލާޒިއޯ އިންނެވެ. ޑަނީލޯ ކަޓާލްޑީ ޖެހި ބޯޅަ އަމާޒުވީ ގޯލުގެ ހުރަސްދަނޑިއަށެވެ. އެކަމަކު، ޔުވެންޓަސް އިން ވަނީ ފުރަތަމަ ހާފުގައި ދެ ގޯލުގެ ލީޑެއްނަގައިފަ އެވެ. މެޗުގެ 10 ވަނަ މިނިޓްގައި އަލްވާރޯ މޮރާޓާ ނެގި ހުރަހަކުން ފުރަތަމަ ގޯލު ޖެހީ ޑޫސާން ވްލަހޯވިޗް ބޮލުންނެވެ. އަދި މެޗުގެ 36 ވަަނަ މިނިޓްގައި ހުއާން ކުއަޑްރާޑޯ ދިން ބޯޅައެއްގައި އޭރިއާތެރެއިން ރަނގަޅު ވަގުތު ހޯދުމަށް ފަހު މޮރާޓާ ޖެހި ބޯޅަ އަމާޒުވީ ގޯލުގެ ދުރު ކަނަށެވެ.
މައުރީޒިއޯ ސާރީގެ ކޯޗުކަމުގައި ކުޅޭ ލާޒިއޯ އިން ނަތީޖާ ހަމަހަމަކުރީ ދެ ވަނަ ހާފުގަ އެވެ. މެޗުގެ 51 ވަނަ މިނިޓްގައި ލާޒިއޯގެ ޕެޓްރިކް ބޮލުން ޖެހި ބޯޅަ ދިފާއުކުރަން އުޅުމުގެ ތެރޭގައި ޔުވެންޓަސްގެ އަލެކްސް ސަންޑްރޯ ފައިގައި ޖެހިފައި ވަނީ ބައިކޮޅަށެވެ. ލާޒިއޯ އިން އެއްވަރުކުރީ އިތުރު ވަގުތުގެ ހަ ވަނަ މިނިޓްގަ އެވެ. މިއީ ޓޯމާ ބަސިޗް ޖެހި ޝޮޓެއް ޔުވެންޓަސްގެ ކީޕަރު މަޓިއާ ޕެރިން އަތުގައި ޖެހިފައި ނުކުތް ވަގުތު ލާޒިއޯގެ ސާގޭއި މިލިންކޮވިޗް-ސަވިޗް ރީބައުންސް ބޯޅައަކުން ޖެހި ގޯލެކެވެ.
މި މެޗުން ހޯދި ޕޮއިންޓާ އެކު ލާޒިއޯ ވަނީ އަންނަ ސީޒަނުގެ ޔޫރޮޕާ ލީގުގެ ޖާގައެއް ކަށަވަރުކޮށްފަ އެވެ. ޔުވެންޓަސް ހަތަރެެއްގައި އޮތީ 37 މެޗުން 70 ޕޮއިންޓާ އެކު އެވެ. ލާޒިއޯ ފަސް ވަނައިގައި އޮތީ 37 މެޗުން 63 ޕޮއިންޓް ހޯދައިގެންނެވެ.
