އެމްޓީސީސީ ސާފް ލީގުގެ ދެ ވަނަ މުބާރާތުގެ ކުއާާޓާ ފައިނަލު ހީޓުން ރާއްޖޭގެ ގައުމީ ޗެމްޕިއަން ހޫދު އަހުމަދު ޖާގަ ހޯދައިފި އެވެ.
"މުލީކޮޅު ރާޅުގަނޑު" ނަމުގައި ބާއްވާމުން އަންނަ މުބާރާތަކީ އެމްޓީސީސީ ސާފް ލީގުގެ ދެ ވަނަ މުބާރާތެވެ. މ. މުލީގައި ކުރިއަށްދާ މުބާރާތުގެ ފިރިހެން އޯޕަން ބައިގައި 32 ރާޅާ އެޅުންތެރިން ވާދަކުރާއިރު، ޖޫނިއާ ބައިގައި 16 ރާޅާ އެޅުންތެރިން ވާދަކުރެ އެވެ.
މުބާރާތުގެ ކުއާޓާ ފައިނަލް ހީޓުތައް މިއަދު ފެށުމަށް ހަމަޖެހިފައިވާއިރު، އެންމެ ރަނގަޅު ސްކޯއަކާ އެކު ކުއާޓާ ފައިނަލުން ޖާގަ ހޯދީ މިދިޔަ އަހަރުގެ ގައުމީ ޗެމްޕިއަން ހޫދު އެެވެ. މުލީ މުބާރާތުގައި މިހާތަނަށް ނުކުތް ނަތީޖާތަކަށް ބަލާއިރު، ރާއްޖޭގެ އެއް ވަނަ ސާފަރު އިސްމާއިލް ރަޝީދު (ސްމައިލީ) ވަނީ މުބާރާތުގެ ހަތަރު ވަނަ ބުރުން ކަޓައިފަ އެވެ.
ކުއާޓާ ފައިނަލުން ހޫދު ޖާގަ ހޯދީ މި މުބާރާތުގައި އުއްމީދީ ހުނަރެއް ދައްކަމުން އައި މ.މުލި އަށް އުފަން އައިހަމް އަދުނާނުގެ މައްޗަށް ކުރި ހޯދައިގެންނެވެ. ހޫދު، 13.67 ގެ ސްކޯއެއް ހޯދިއިރު، އައިހަމް އަށް ހެދުނީ 9.50 ގެ ސްކޯ އެކެވެ.
ކުއާޓާ ފައިނަލުގައި ހޫދު ނުކުންނާނީ ގައުމީ ޓީމްގެ ޒުވާން ސާފަރު ނަޖާހު މުހައްމަދު އާއި ޖިނާން އަހުމަދާއި ދެކޮޅަށެވެ.
ނަޖާހު އަށް ކުއާޓާގެ ޖާގަ ލިބުނީ އޭނާއާ ދެކޮޅަށް ވާދަކުރަން އޮތް އާދަމް މުއީން އިބްރާހީމްގެ ބޮލަށް ފަސް ވަނަ ބުރުގެ ހީޓުގައި ލިބުނު އަނިޔާގެ ސަބަބުން މުބާރާތުގައި އިތުރަށް ކުރިއަށް ނުގެންދެވުމުންނެވެ. ޖިނާން ކުއާޓާ ފައިނަލުން ޖާގަ ހޯދީ މުބާރާތުގައި ރަނގަޅު ފޯމެއްގައި ހުރި އަހުމަދު އަރުޒަންގެ މައްޗަށް ކުރި ހޯދައިގެންނެވެ.
ކުއާޓާ ފައިނަލް އަނެއް ހީޓުގައި ވާދަކުރާނީ ޖައިލަމް ނިޒާރު އާއި މުހައްމަދު ފަޔާޒު އަދި އަހުމަދު އާގިލް (އައްމަޑޭ) އެވެ. ޖައިލަމް ވަނީ އިސްމާއިލް މިގްލާލްގެ މައްޗަށް ކުރި ހޯދާފަ އެވެ. ފަޔާ ކުރި ހޯދީ ހަސަން ނާސިހުގެ މައްޗަށެވެ. އަދި ގައުމި ޓީމްގެ އައްމަޑޭ ކުރި ހޯދީ ޒުވާން ސާފަރު ޝާނިފް ޝަފީގުގެ މައްޗަށެވެ.
ކުއާޓާ ފައިނަލް ދެ ހީޓާއި، ސެމީ ފައިނަލް ދެ ހީޓު އަދި ފައިނަލް ހީޓު އޮންނާނީ މިއަދެވެ. ސެމީ ފައިނަލުން ޖާގަ ލިބޭނީ ކުއާާޓާ ފައިނަލުގައި ވާދަކުރާ ހަ ރާޅާ އެޅުންތެރިންގެ ތެރެއިން ހަތަރު ރާޅާ އެޅުންތެރިންނަށެވެ.
އެމްއެސްއޭގެ ގައުމީ ސާފް ލީގު މި އަހަރު ރާއްޖޭގެ ފަސް ސަރަހައްދެއްގައި ބާއްވާން ނިންމާފައިވާއިރު ފުރަތަމަ މުބާރާތް ގދ. ގައްދޫގައި ބާއްވާފައިވަނީ މިދިޔަ ފެބްރުއަރީ މަހުގަ އެވެ. ދެ ވަނަ މުބާރާތް މ.މުލީގަ ކުރިއަށްދާއިރު، ތިންވަނަ މުބާރާތް ރ.ކިނޮޅަހުގައި އޮންނާނީ ޖުލައި މަހުގެ 5-9 އަށެވެ. ހަތަރު ވަނަ މުބާރާތް ހިންމަފުށީގައި އޮންނާނީ އޮކްޓޯބަރު 4-8 އަށެވެ. އަދި ފަހު މުބާރާތް ކަމަށްވާ "ރަންނަމާރި ޗެލެންޖް" މާލޭގައި އޮންނާނީ ނޮވެމްބަރު މަހުގެ 18-25 އަށެވެ.
