ކޮލޮމްބޯ، ސްރީލަންކާ (މޭ 16) - އިގްތިސާދީ، އިޖްތިމާއީ އަދި ސިޔާސީ ކާރިސާއެއްގައި އޮތް ސްރީލަންކާއިން ޕެޓްރޯލް ހުސްވެ، ޒަރޫރީ ތަކެތި އިމްޕޯޓް ކުރާނެ ޑޮލަރު ލިބޭނެ ގޮތެއް ނެތް ކަމަށް ބޮޑު ވަޒީރު ރަނިލް ވިކްރަމަސިންހަ ވިދާޅުވެއްޖެ އެވެ.
"އަޅުގަނޑުމެންގެ އަތުން ޕެޓްރޯލް ހުސްވެއްޖެ. މި ވަގުތު ހުރީ އެންމެ ދުވަހަކަށް ފުދޭ ވަރުގެ ޕެޓްރޯލް ސްޓޮކެއް،" ހޯމަ ދުވަހު ބޮޑު ވަޒީރު ރަނިލް ވިކްރަމަސިންހަ ގައުމާ މުހާތަބު ކުރައްވަމުން ވިދާޅުވި އެވެ.
ރަނިލް ވިދާޅުވީ ތެލުގެ ތިން ޝިޕްމަންޓެއް ކޮލޮމްބޯ ބަނދަރުގައި އެބަ އޮތް ކަމަށާއި ނަމަވެސް ފައިސާ ދެއްކޭނެ ގޮތެއް ނެތުމުން، ކުންފުނިތަކުން ޝިޕްމަންޓް ދޫނުކުރާ ކަމަށެވެ.
"ކުރިއަށް އޮތީ އަޅުގަނޑުމެންގެ ހަޔާތުގައި ކުރިމަތިވާނެ އެންމެ އުނދަގޫ މަސްތައް. ރައްޔިތުންނަށް ހަގީގަތް އޮޅުވާލައި ދޮގު ހެދުމުގެ އެއްވެސް ނިޔަތެއް އަޅުގަނޑުގެ ނެތް،" މިދިޔަ ބުރާސްފަތި ދުވަހު ބޮޑު ވަޒީރުކަމާ ހަވާލުވެވަޑައިގެންނެވި ރަނިލް ވިދާޅުވި އެވެ.
ރަނިލް ރައްޔިތުންގެ ކިބައިން އެދިވަޑައިގެންނެވީ "ކެތްތެރިކަމާ އެކު ކުރިއަށް އޮތް މަސްތަކުގައި ތިއްބެވުމަށެވެ." އަދި ވަގުތު ދެއްވައިފި ނަމަ ކާރިސާއިން ގައުމުން ސަލާމަތް ކުރުމަށް ވައުދުވެވަޑައިގެންނެވި އެވެ.
އޭގެ އިތުރުން މޭ މަހުގެ މުސާރައިގެ ގޮތުގައި 1.4 މިލިއަން ސިވިލް ސާވަންޓުންނަށް ދޭނެ ފައިސާއެއް ނެތް ކަމަށާއި ފައިސާ ޕްރިންޓް ކުރާނީ އެއްވެސް ގޮތެއް ނެތް ހާލަތެއްގައި ކަމަށް ރަނިލް ވިދާޅުވި އެވެ.
ކުރިއަށް އޮތް ތަނުގައި ތެލާއި ކަރަންޓުގެ އަގު ވަރަށް ބޮޑު ތަނުން މަތި ވާނެ ކަމަށާއި ސަރުކާރަށް ލިބޭ މާލީ ގެއްލުން ކުޑަ ކުރުމުގެ ގޮތުން، ގައުމީ އެއާލައިން ވިއްކާލާނެ ކަމަށް އިއުލާނު ކުރެއްވި އެވެ.
އިގްތިސާދީ ކާރިސާއިން އަރައިގަތުމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ އެހީއަށް ލަންކާއިން އެދިފައިވާ އިރު، އެ އިދާރާގެ އެންމެ ބޮޑު އެއް ޑިމާންޑަކީ ސްރީލަންކަން އެއާލައިންސް ފަދަ ގެއްލުމުގައި ހިންގާ ދައުލަތުގެ ކުންފުނިތައް ވިއްކާލުމެވެ.
