ފާއިތުވީ 25 އަހަރު އުޅެމުން އައީ އެ ތަދާއެކުގަ އެވެ. ހަލާކުވެފައިވާ ކޮނޑުހުޅުގެ ސަބަބުން ލިބެމުން ދިޔަ ވޭނުގަ އެވެ. ކޮނޑުން އާންމު ހަރަކާތް ކުރަން ދައްޗެވެ.
މިއީ މި މަހުގެ 12 ވަނަ ދުވަހު އޭޑީކޭ ހޮސްޕިޓަލުގައި ކޮނޑުހުޅު ބަދަލު ކުރުމުގެ ފުރަތަމަ އޮޕަރޭޝަން ކުރި މީހާގެ ވާހަކަ އެވެ. މިއީ ރާއްޖޭގައި ކުރި މިފަދަ ފުރަތަމަ އޮޕަރޭޝަނެވެ. އުމުރުން 59 އަހަރުގެ ބަލި މީހާގެ އޮޕަރޭޝަނަށް ފަހު މިހާރު ގެއަށް ދޫކޮށްލަން ތައްޔާރުވެފައިވާއިރު، އޭނާގެ ހާލަތު މިހާރު ވަނީ ވަރަށް ބޮޑަށް ރަނގަޅުވެފަ އެވެ. އޮޕަރޭޝަނުން ރިކަވާ ވުމުން އޭނާގެ ކޮނޑުހުޅުގެ ރިހުން އެއްކޮށް ހައްލު ވެގެން ދާނެ ކަމަށް ޑޮކްޓަރުން ވިދާޅުވެ އެވެ.
"ކޮނޑުހުޅު ބަދަލު ކުރަނީ ކަކުލު ހުޅު ބަދަލު ކުރާ ވަރަށް ވުރެ މަދުން، އެއީ ކޮނޑުގެ މަޑުކަށީގައި އިންނަ ފަށަލަ ހަލާކުވެގެން ދިމާވާ ކަމެއް، އެހެން ދިމާވާއިރު ކަކުލު ހުޅަށް ވުރެ ބޮޑަށް ތަދުވެ، ހަރަކާތްތައް މާ ބޮޑަށް ގެއްލިގެންދޭ،" އޭޑީކޭގެ ކޮންސަލްޓެންޓް އިން އޯތޮޕީޑިކްސް ޑރ. މުހައްމަދު މިޝްވާރު އަޝްފާގު ވިދާޅުވި އެވެ.
ކޮނޑުހުޅު ބަދަލު ކުރުމުގެ އޮޕަރޭޝަނަކީ މީގެ ކުރިން ރާއްޖެއިން ބޭރަށް ގޮސްގެން ކުރަމުން އައި އޮޕަރޭޝަނެއް ނަމަވެސް އޭޑީކޭއިން ވަނީ މިހާރު މި ހިދުމަތް ރާއްޖޭގައި ދޭން ފަށައިފަ އެވެ. ރާއްޖޭގައި ކުރެވުނު މީގެ އެންމެ ފުރަތަމަ އޮޕަރޭޝަން ކޮށްފައިވަނީ ޑރ. މިޝްވާރުގެ އިތުރުން އެ ހޮސްޕިޓަލުގެ ސީނިއަ ކޮންސަލްޓެންޓް އިން އޯތޮޕީޑިކްސް ޑރ. ހުސައިން ޝަކީލެވެ. އަދި ފަންނީ ގޮތުން ތައިލޭންޑްގެ ޕްރޮފެސަރެއް ކަމަށްވާ ޑރ. ބަންޗާ ޗަންޗޫޖިތު ވަނީ ހަރަކާތްތެރިވެފަ އެވެ.
ބޯޅައަކާ ސޮކެޓެއްގެ ގޮތަށް އިންނަ ކޮނޑު ހުޅު ހަލާކު ވަނީ ބޯޅައިގެ މަޑުކަށީގައި އިންނަ ފަށަލަ ހަލާކުވުމުން ކަށިގަނޑާ ކަށިގަނޑު ގުޅުވައިދޭ ކަށިތައް ހަރަކާތް ކުރަަން އުނދަގޫ ވެގެން ކަމަށް ކަމަށް އޮޕަރޭޝަން ކުރެއްވި ޑރ. މިޝްވާރު ވިދާޅުވިއެވެ.
"އެ ކަމާ ހުރެ ކޮނޑުގެ އެ ފަޅިއަށް އޮވެގެން ނިދަން އޮވުމާ، އާންމު ދިރިއުޅުމުގައި ކޮނޑުގެ ހަރަކާތްތައް ގެންނަން އުނދަގޫވެގެން ދަނީ، އެ ހިސާބުން ޑޮކްޓަރުން ރިކަމެންޑު ކުރަނީ އޮޕަރޭޝަން ކުރަން،" ޑރ. މިޝްވާރު ވިދާޅުވިއެވެ.
ޑޮކްޓަރުން ކިޔައިދެއްވި ގޮތުގައި މި އޮޕަރޭޝަން ކުރަނީ ކޮނޑުހުޅަށް ދަގަނޑު އަދި ޕްލާސްޓިކް އެތިކޮޅުތަކެއް ލައްވައިގެންނެވެ. އެ އެއްޗެހި ލައްވަނީ ކަށިގަނޑު ކޮނެގެން އެތެރެއަށެވެ. އޮޕަރޭޝަނަށް ފަހު "ދުވަސް ވާ ވަރަކަށް ކަށި އަރާ، ހުޅު ނެއްޓުމުގެ ޗާންސް" ވަރަށް ކުޑަވެގެން ދެ އެވެ.
"ކަށީގެ ވަރަށް ކުޑަ އެތިކޮޅެއް ނައްޓާލައިގެން، ލައްވާ ބައި މި ލައްވަނީ، އެހެންވީމަ އެހެން ގޮތަކަށް ބުނާ ނަމަ ބޯން ސޭވިންގް ޕްރޮސީޖާއެއް މިއީ،" އޮޕަރޭޝަން ސިފަ ކުރައްވަމުން ޑރ. ޝަކީލް ވިދާޅުވި އެވެ.
ޑރ. ޝަކީލް ވިދާޅުވީ އޭޑީކޭއިން ބޭނުން ކުރަމުން އަންނަނީ ކުރިން ބޭނުން ކުރަމުން އަންނަ އެތިކޮޅުތަކާ ތަފާތު އެތިކޮޅުތަކެއް ކަމަށެވެ. މިގޮތުން ކުރީގައި ބޭނުން ކުރާ ވައްތަރުތަކުން ވަރަށް ބޮޑަށް ކަށިގަނޑު ކޮންނަން ޖެހުނުނަމަވެސް، މިހާރު އެ ތަކުލީފު ކުޑަވާނެ ކަން ފާހަގަކުރެއްވި އެވެ.
މި އޮޕަރޭޝަނަށްފަހު ހޯދަން ޖެހޭ އިތުރު ފަރުވާތައް ހޯދާނަމަ، 8 ހަފުތާއާއި 12 ހަފްތާއާ ދެމެދުގެ މުއްދަތެއްގެ ތެރޭގައި މުޅިން ފަސޭހަވާނެ ކަމަށް ޑޮކްޓަރުން ލަފާ ކުރައްވަ އެވެ. އޭޑީކޭގައި މި އޮޕަރޭޝަން ކުރެވޭ އަގަކީ 117،000 ރުފިޔާ އެވެ.
