ލޯކަލް ކައުންސިލްތަކުން ތައްޔާރު ކުރާ ތަރައްގީގެ ޕްލޭނާއި ބިން ބޭނުން ކުރާނެ ގޮތުގެ ޕްލޭން ނުވަތަ ލޭންޑް ޔޫޒް ޕްލޭން ފާސްނުކޮށް ގައުމީ އިދާރާގައި ދިގު މުއްދަތަކަށް ހިފަހައްޓާފައިވާ ބޭއްވުން ހުއްޓުމަކަށް ގެންނަން މޯލްޑިވްސް ނޭޝަނަލް ޕާޓީ (އެމްއެންޕީ) އިން ރައްޔިތުންގެ މަޖިލީހަށް ބިލެއް ހުށަހަޅައިފި އެވެ.
ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު މިހާރު އޮންނަ ގޮތުން ރަށު ކައުންސިލްތަކުން ގައުމީ އިދާރާއަށް ހުށަހަޅާ ލޭންޑް ޔޫޒް ޕްލޭން ފާސްނުކޮށް ދިގު މުއްދަތަކަށް ބޭއްވުމުގެ ފުރުސަތު ގައުމީ އިދާރާއަށް ލިބިގެންވެ އެވެ.
އެމްއެންޕީން ބުނީ ރަށްރަށުގެ ރައްޔިތަކު ރުހުމާއެކު ރަށު ކައުންސިލުން ފާސްކޮށް ގައުމީ އިދާރާއަށް ފޮނުވާ ލޭންޑް ޔޫޒް ޕްލޭން ތަފާތު ސަބަބުތަކާއެކު ފާސްކޮށްނުދީ ދިގު މުއްދަތަކަށް އެ ގޮތަށް ހިފެހެއްޓުމަކީ ލާމަރުކަޒު ކުރުމުގެ އުސޫލާ ހިލާފު ކަމެއް ގޮތުގައި އެ ޕާޓީން ގަބޫލު ކުރާ ކަމަށެވެ.
ލާމަރުކަޒީ ގާނޫނަށް އިސްލާހު ގެންނަން އެ ޕާޓީން ހުށަހެޅި ބިލުގައި ވަނީ ކައުންސިލްތަކުން ގައުމީ އިދާރާއަށް ހުށަހެޅޭ އެ ޕްލޭންތައް ގިނަވެގެން 60 ދުވަހުގެ ތެރޭގައި ގައުމީ އިދާރާއިން ފާސްކުރަން ވާނެ ކަމަށެވެ.
ލޭންޑް ޔޫޒް ޕްލޭންއާ ގުޅޭ ގޮތުން ވަކި ކަމެއް އިސްލާހު ކުރަން ޖެހޭ ކަމަށް ގައުމީ އިދާރާއަށް ފެންނަ ނަމަ އެކަމަކާ ގުޅޭ ގޮތުން ކައުންސިލާ މަޝްވަރާކޮށް އެ ކަމެއް އިސްލާހުކޮށް ގާނޫނުގައި ބަޔާންކުރާ 60 ދުވަހުގެ ތެރޭގައި ފާސްކޮށް ނިންމަން ވާނެ ކަމަށް ވެސް ބިލުގައިވެ އެވެ.
"ރައްޔިތުންގެ މަޖިލީހުގައި ހިމެނޭ ސިޔާސީ ޕާޓީތަކުގެ ތާއީދާއެކު މި އިސްލާހު ފާސްވެގެން ދިއުމަކީ މުހިންމުކަމެއް ކަމަށް މި ޕާޓީން ދެކެމެވެ." މި ބިލު ހުށަހެޅިކަން ހާމަކޮށް އެމްއެންޕީން ނެރުނު ނޫސް ބަޔާނުގައި ލިޔެފައިވެ އެވެ.
ދާދި ފަހުން އުފެއްދި އެމްއެންޕީގެ ލީޑާޝިޕްގެ ބޭފުޅުން އެކި ރަށްރަށަށް ކުރެއްވި ދަތުރުފުޅުގައި ރަށްރަށުގެ ގިނަ ކައުންސިލްތަކަކުން އެ ޝަކުވާ ފާހަކޮށް އޭގެ ސަބަބުން ކައުންސިލްތަކުން ކުރަން ރަވާފައިވާ ކަންކަން ނުކުރެވި ދިގުލައިގެންދާ ކަން އެ ކައުންސިލްތަކުން ފާހަގަކޮށްފައިވާ ކަމަށް އެ ޕާޓީން ބުންޏެވެ.
އެމްއެންޕީގެ ޕާލިމެންޓްރީ ގްރޫޕުން އެ ބިލު މިއަދު މަޖިލީހަށް ހުށަހެޅިއިރު މަޖިލިހުގައި އެ ޕާޓީ ތަމްސީލް ކުރައްވަނީ ތިން މެންބަރެކެވެ. އެއީ ޕާޓީގެ ރައީސް އަދި ދަނގެތި ދާއިރާގެ މެންބަރު މުހައްމަދު ނާޒިމް (ކާނަލް) އާއި، ޕާޓީގެ ނައިބު ރައީސުން ކަމުގައިވާ ތިމަރަފުށި ދާއިރާގެ މެންބަރު އަބްދުﷲ ރިޔާޒްއާއި، ވިލިމާލެ ދާއިރާގެ މެންބަރު އަހްމަދު އުޝާމް އެވެ.
