ސްރީލަންކާގެ ކުރީގެ ރައީސް މައިތްރިޕާލާ ސިރިސޭނާގެ ޕާޓީން، އާ ބޮޑު ވަޒީރު ރަނިލް ވިކްރަމަސިންހަގެ ސަރުކާރަށް ތާއީދު ކުރަން ނިންމައިފި އެވެ.
ސިރިސޭނާ ފޮނުއްވި ސިޓީއެއްގައި ވިދާޅުވީ ސްރީލަންކާ ފްރީޑަމް ޕާޓީ (އެސްއެލްއެފްޕީ) އިން އާ ސަރުކާރެއް ގާއިމް ކުރަން ތާއީދު ކުރާ ކަމަށެވެ.
ޕާޓީގެ އިސް މެމްބަރުން އެދެނީ ބޮޑު ވަޒީރާއެކު އެކަމާ ގުޅޭ މަޝްވަރާ ކުރެއްވުމަށް ކަމަށް ސިޓީގައިވެ އެވެ. ރިޕޯޓުތައް ބުނާ ގޮތުން މަޝްވަރާ ބައްދަލުވުން އޮންނާނެ އިރެއް ވަރަށް އަވަހަށް ނިންމާނެ އެވެ.
މިހާތަނަށް ރަނިލްގެ ސަރުކާރަށް ތާއީދު ކުރަން ނިންމީ އެސްއެލްއެސްޕީގެ އިތުރުން ރައީސް ގޮތަބަޔާ ރާޖަޕަކްސަގެ ސްރީލަންކާ ޕޮޑުޖަނާ ޕެރަމުނާ ޕާޓީ (އެސްއެލްޕީޕީ) އިންނެވެ.
އެސްއެލްޕީޕީގެ ހަތަރު މިނިސްޓަރުންނާއެކު އާ ސަރުކާރު މަސައްކަތް ފެށީ ހޮނިހިރު ދުވަހު އެވެ. އެސްއެލްއެފްޕީގެ ތާއީދު ލިބުމާ އެކު އިތުރު މިނިސްޓްރީތަކަށް އެ ޕާޓީގެ އިސް މެމްބަރުން އައްޔަނު ކުރައްވާނެ އެވެ.
މިދިޔަ ބުރާސްފަތި ދުވަހު ބޮޑު ވަޒީރުކަމާ ހަވާލުވެވަޑައިގެންނެވި ރަނިލް ކުރިން ވިދާޅުވީ އެއްބައިވަންތަ ސަރުކާރެއް ހެދުމަށް ބޭނުންވާ ތާއީދު އެބަ އޮތް ކަމަށެވެ.
ނަމަވެސް އިދިކޮޅު ޕާޓީތަކުން ވަނީ ސަރުކާރާ އެކު މަސައްކަތް ކުރުމަށް ދެކޮޅު ހަދާފަ އެވެ. ރަނިލް ބޮޑު ވަޒީރު ކަމަށް ވަޑައިގެންނެވީ ގާނޫނާ ހިލާފަށް ކަމަށް ބައެއް ޕާޓީތަކުން ބުނެ އެވެ.
ސަރުކާރުގެ ހުށަހެޅުންތައް ބަލައިނުގަނެ، ޕާޓީތަކުން ޑިމާންޑް ކުރަނީ އަވަސް އިންތިހާބެއް ބޭއްވުމަށެވެ.
