ފޮރިން ސާވިސް ގާއިމް ކުރެވި އަމަލު ކުރެވިގެން ދިއުމާއެކު މަސައްކަތްތައް ހަލުވިވެ، ފަސޭހަ ވެގެން ދާނެ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ.
ފޮރިން ސާވިސްގެ ބިލަށް މިއަދު އަމަލު ކުރަން ފެށުމާއެކު ރާއްޖޭގެ ހާރިޖީ ސިޔާސަތު ހަރުދަނާކޮށް، ބައިނަލްއަގުވާމީ ގޮތުން ފެންވަރު ރަނގަޅު މިންގަނޑަކަށް ފެއްތުމަށްޓަކައި ބޭނުންވާ ހާއްސަ ތަމްރީނާއި ހުނަރާއި ތަޖުރިބާ ލިބިފައިވާ ޕްރޮފެޝަނަލް ފޮރިން ސާވިސްއެއް ބިނާކުރެވިގެން ދާނެ އެވެ.
"ދިވެހިރާއްޖޭގެ ފޮރިން ސާވިސްގެ އެންމެ އިސް ވާޖިބަކީ ދިވެހިރާއްޖޭގެ ސަރަހައްދުގެ މިނިވަންކަމާއި ރައްކާތެރިކަން ދެމެހެއްޓުމަށްޓަކައި އަދި ބައިނަލްއަގްވާމީ މުޖުތަމައުގައި ދިވެހިރާއްޖޭގެ ގައުމީ ސިޔާސަތަށް އިހުތިރާމު ކުރުން އިތުރުކުރުމާއެކު ދިވެހިރާއްޖޭން ބައިނަލްއަގްވާމީ މުޖުތަމައަށް އަދާކުރަން ޖެހޭ ޒިންމާތައް ފުރިހަމައަށް އަދާކުރުމުގައި، ރައީސުލްޖުމްހޫރިއްޔާ ކަނޑައަޅުއްވާ ސިޔާސަތު ތަންފީޒުކުރުން،" މިނިސްޓަރު ޝާހިދު ވިދާޅުވި އެވެ.
ޝާހިދު ވިދާޅުވީ ވަކިން އެކުލަވާލެވިފައި އޮންނަ ފޮރިން ސާވިސް އުފެދުމަކީ ވަރަށް ދިގު އިންތިޒާރެއްގެ ނިމުން ކަމަށާއި މިއާއެކު މަސައްކަތްތައް އިތުރަށް ހަލުވިވެ، ވަރަށް ބޮޑު ކުރިއެރުމެއް ލިބިގެންދާނެ ކަމަށެވެ.
ފޮރިން ސާވިސްގެ ހިދުމަތް ހަގީގަތަކަށް ހެއްދެވުމުގެ ތަސައްވަރު އެންމެ ފުރަތަމަ ގެންގުޅުއްވި ކުރީގެ ހާރިޖީ ވަޒީރު ފަތުހުﷲ ޖަމީލްގެ ހަނދާން އާ ކުރައްވާ، މި ކަން ހަގީގަތަކަށް ހައްދަވައި ދެއްވާ މި ދާއިރާގައި ލިބެމުން އަންނަ ކާމިޔާތަކަށް ރައީސް އިބްރާހިމް މުހައްމަދު ސޯލިހަށް ޝުކުރު އަދާ ކުރެއްވެވި އެވެ.
"އ.ދ.ގެ 76 ވަނަ އާންމު މަޖިލީހުގެ ރިޔާސަތަށް ރާއްޖެ ހޮވިގެން ދިއުމަކީ ބައިނަލް އަގްވާމީ މައިދާނުގައި ރާއްޖެއަށް މިހާތަނަށް ލިބިފައި ވާ ބޮޑު ކާމިޔާބީއެކެވެ. މި ކާމިޔާބީއަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ހާރިޖީ ސިޔާސަތުގެ ހަރުދަނާކަމާއި ދިވެހި ހާރިޖިއްޔާގެ ހީވާގި މުވައްޒަފުންގެ ބުރަ މަސައްކަތުގެ ފޮނި ނަތީޖާ،" ޝާހިދު ވިދާޅުވި އެވެ.
ފޮރިން ސާވިސްއަކީ ރާއްޖޭގެ މިނިވަންކަމާއި ރައްކާތެރިކަން ދެމެހެއްޓުމަށްޓަކައި އެންމެ ކުރީ ސަފުގައި އަބަދުވެސް ތިބެންޖެހޭނެ ބައެއް ކަން ފާހަގަ ކުރައްވާ ޝާހިދު އިތުރަށް ވިދާޅުވީ މި ސާވިސްގެ އެންމެ އިސް ވާޖިބަކީ ދިވެހިރާއްޖޭގެ ސަރަހައްދުގެ މިނިވަންކަމާއި ރައްކާތެރިކަން ދެމެހެއްޓުމަށްޓަކައި އަދި ބައިނަލްއަގްވާމީ މުޖުތަމައުގައި ގައުމީ ސިޔާސަތަށް އިހުތިރާމު ކުރުން އިތުރުކުރުން ކަމަށެވެ.
