ޕެރިސް (މެއި 15) - ފްރެންޗް ލީގުގައި ރޭ ލިއޮނަލް މެސީގެ ދެ ގޯލާ އެކު ޕީއެސްޖީން 4-0 އިން މޮންޓެޕިއޭ ބަލިކޮށްފި އެެވެ.
ބާކީ ހަތަރު މެޗު އޮއްވައި، މި ފަހަރު ފްރެންޗް ލީގު ކާމިޔާބުކުރި ޕީއެސްޖީން ވަނީ 37 މެޗުން 83 ޕޮއިންޓް ހޯދައިފަ އެވެ. ދެ ވަނައިގައި އޮތް މާސޭ އިން ވަނީ 37 މެޗުން 68 ޕޮއިންޓް ހޯދައިފަ އެވެ. ލީގުގައި ކޮންމެ ޓީމަކަށް ވެސް ބާކީ މެޗެއް އެބައޮތެވެ.
މޮންޓެޕިއޭ ދަނޑުގައި ކުޅުނު މެޗު ފަށައިގެން ހަ ވަނަ މިނިޓްގައި މެސީ ވަނީ ޕީއެސްޖީ އަށް ލީޑުނަގައިދީފަ އެވެ. ކީލިއަން އެމްބާޕޭ އޭރިއާތެރެއިން ދިން ބޯޅަ މެސީ ވަނީ ގޯލުގެ ދުރު ކަނަށް ފޮނުވާލައިފަ އެވެ. މެޗުގެ 20 ވަނަ މިނިޓްގައި މެސީ ވަނީ ޕީއެސްޖީ އަށް ލީޑުުފުޅާކޮށްދީފަ އެވެ. މިއީ އެމްބާޕޭ ދިން ބޯޅައެއް އޭރިއާތެރެއިން ކޮންޓްރޯލް ކުރުމަށް ފަހު މޮންޓެޕިއޭގެ ކީޕަރު ޑިމިޓްރީ ބާޓޯ ކައިރިން ނައްޓާފައި މެސީ ޖެހި ގޯލެކެވެ. މިއީ މި ފަހަރު ލީގުގައި 25 މެޗުން މެސީ ޖެހި ހަ ވަނަ ގޯލެވެ.
ޕީއެސްޖީން ތިން ވަނަ ލަނޑު ކާމިޔާބުކުރީ އެންހެލް ޑި މާރިއާ އެވެ. މެޗުގެ 26 ވަނަ މިނިޓްގައި ޑި މާރިއާ އޭރިއާތެރެއިން ވޮލީ އަކުން ފޮނުވާލި ބޯޅަ ގޯލަށް ވަނީ މޮންޓެޕިއޭ ޑިފެންޑަރެއް ފައިގައި ޖެހިފަ އެވެ.
މޮންޓެޕިއޭ އިން ވެސް ގޯލެއް ޖެހޭތޯ ގިނަ މަސައްކަތްތަކެއް ކުރި މި މެޗުގައި ޕީއެސްޖީން ހަތަރު ވަނަ ގޯލު ޖެހީ ދެ ވަނަ ހާފުގަ އެވެ. މި ގޯލަކީ މެޗުގެ 60 ވަނަ މިނިޓްގައި ޕެނަލްޓީ އަކުން އެމްބާޕޭ ޖެހި ގޯލެކެވެ. މިއީ އެމްބާޕޭ އަށް ކުރި ފައުލަކަށް ދިން ޕެނަލްޓީ އެކެވެ.
