ކޮލޮމްބޯ، ސްރީލަންކާ (މޭ 14) - ސްރީލަންކާގައި އިދިކޮޅުގެ ބައިވެރިވުމެއް ނެތި "އެއްބައިވަންތަކަމުގެ" ސަރުކާރުން ހޮނިހިރު ދުވަހު މަސައްކަތް ފަށައިފި އެވެ.
މިދިޔަ ބުރާސްފަތި ދުވަހު ބޮޑު ވަޒީރުކަމާ ހަވާލުވެވަޑައިގެންނެވި ރަނިލް ވިކްރަމަސިންހަ ކުރިން ވިދާޅުވީ އެއްބައިވަންތަ ސަރުކާރެއް ހެދުމަށް ބޭނުންވާ ތާއީދު އެބަ އޮތް ކަމަށެވެ.
ނަމަވެސް އިދިކޮޅު ޕާޓީތަކުން ވަނީ ސަރުކާރާ އެކު މަސައްކަތް ކުރުމަށް ދެކޮޅު ހަދާފަ އެވެ. ރަނިލް ބޮޑު ވަޒީރު ކަމަށް ވަޑައިގެންނެވީ ގާނޫނާ ހިލާފަށް ކަމަށް ބައެއް ޕާޓީތަކުން ބުނެ އެވެ.
ސަރުކާރުގެ ހުށަހެޅުންތައް ބަލައިނުގަނެ، ޕާޓީތަކުން ޑިމާންޑް ކުރަނީ އަވަސް އިންތިހާބެއް ބޭއްވުމަށެވެ.
އިދިކޮޅުގެ ތާއީދު ނެތުމާ އެކު، އާ ސަރުކާރު މަސައްކަތް ފެށީ ރައީސް ގޮތަބަޔާ ރާޖަޕަކްސައަށް ތާއީދު ކުރާ ފަރާތްތަކާ އެކު އެވެ.
އެގޮތުން ފޮރިން މިނިސްޓަރު ކަމަށް އައްޔަނު ކުރެއްވީ ކުރިން ވެސް އެ މަގާމުގައި ހުންނެވި ގަމިނީ ޕީރިސް އެވެ. އޭނާއާ އެކު ދެން އައްޔަނު ކުރެއްވި ތިން މިނިސްޓަރުންނަކީ ވެސް ރައީސްގެ ސްރީލަންކާ ޕޮޑުޖަނާ ޕެރަމުނާ ޕާޓީ (އެސްއެލްޕީޕީ) ގެ މެމްބަރުންނެވެ.
ސްރީލަންކާއިން އިންޓަނޭޝަނަލް މަނިޓަރީ ފަންޑް (އައިއެމްއެފް) އާ އެކު މަޝްވަރާ ކުރަމުން ދިޔަ ނަމަވެސް، މިހާތަނަށް އާ ފިނޭންސް މިނިސްޓަރެއް އައްޔަނު ކުރައްވާފައެއް ނުވެ އެވެ.
